കൊച്ചി: (KVARTHA) അവയവദാനം പ്രധാന പ്രമേയമായി വരുന്ന സത്യൻ അന്തിക്കാട്-മോഹൻലാൽ ചിത്രം 'ഹൃദയപൂർവ്വം' വിമർശനത്തിൽ. ഡോക്ടർ ഹാരിസ് ചിറക്കലാണ് സിനിമയിലെ ശാസ്ത്രീയ പിഴവുകൾ ചൂണ്ടിക്കാട്ടി വിമർശനം ഉന്നയിച്ചിരിക്കുന്നത്. ഇത്ര സീനിയറായ ഒരു സംവിധായകൻ വളരെ അലക്ഷ്യമായിട്ടാണ് വിഷയം കൈകാര്യം ചെയ്തതെന്നും, അവയവം മാറ്റിവെച്ച വ്യക്തി എടുക്കേണ്ട കരുതലുകൾ ഒന്നും തന്നെ ചിത്രത്തിൽ പ്രതിപാദിക്കുന്നില്ലെന്നും അദ്ദേഹം ചൂണ്ടിക്കാട്ടി. 'ഹൃദയത്തിൽ കൂടി സ്വഭാവങ്ങൾ, ശീലങ്ങൾ, വികാരങ്ങൾ ഇതൊക്കെ കൈമാറ്റം ചെയ്യുന്നു' എന്നതൊക്കെ വെറും ബാലഭൂമി കഥകൾ മാത്രമാണെന്നും ഡോക്ടർ പറയുന്നു.

ഡോക്ടർ ഹാരിസ് ചിറക്കൽ തന്റെ ഫേസ്ബുക്ക് കുറിപ്പിൽ ഇങ്ങനെയാണ് പ്രതികരിച്ചത്: 'ഹൃദയപൂർവ്വം എന്ന സിനിമ കണ്ടു. ഒരു കാര്യവും നന്നായി പഠിക്കുകയോ മനസിലാക്കുകയോ ചെയ്യാതെയാണ് മിക്ക മലയാളം സിനിമകളും ഇത്തരം വിഷയങ്ങൾ കൈകാര്യം ചെയ്യുന്നത്. ജോസഫ് എന്ന സിനിമ മസ്തിഷ്‌ക മരണ അവയവ ദാനത്തിന് ഏൽപ്പിച്ച പ്രഹരം മാരകമായിരുന്നു. തലയിൽ ചുറ്റിക കൊണ്ട് അടിച്ച്, ബ്രെയിൻ ഡെത്ത് (Brain Death) അവസ്ഥയിൽ എത്തിക്കുമത്രെ. വിദൂര സാധ്യതപോലും ഇല്ലാത്ത ആരോപണമാണത്. ഹൃദയപൂർവ്വത്തിൽ ഇത്ര സീനിയറായ ഒരു സംവിധായകൻ എത്ര അലക്ഷ്യമായിട്ടാണ് ഈ വിഷയം കൈകാര്യം ചെയ്യുന്നത്. അവയവം മാറ്റിവെച്ച വ്യക്തി എടുക്കേണ്ട കരുതലുകൾ ഒന്നും ചിത്രം കാണിക്കുന്നില്ല. ഒക്കെ വെറും തമാശ.'

അവയവ ദാനം ചെയ്ത വ്യക്തിയോടും കുടുംബത്തോടും ബഹുമാനം മാത്രമാണ് ദാനം സ്വീകരിച്ചവർക്കും അവരുടെ ബന്ധുക്കൾക്കും സമൂഹത്തിനും ഉണ്ടാകേണ്ടതെന്നും ഇവിടെ കോമഡിക്ക് സ്ഥാനമില്ലെന്നും ഡോക്ടർ പറഞ്ഞു. അവയവം സ്വീകരിച്ച വ്യക്തിക്ക് ഒരുപാട് നിയന്ത്രണങ്ങൾ ആവശ്യമാണെന്നും പ്രതിരോധശേഷി കുറയുന്ന അവസ്ഥയിൽ അണുബാധകൾ ഉണ്ടാകാനുള്ള സാധ്യതയുണ്ടെന്നും ഡോക്ടർ ചൂണ്ടിക്കാട്ടി. 'മാസ്ക് ഉപയോഗിക്കുക, ധാരാളം ജനക്കൂട്ടം ഉള്ള സ്ഥലങ്ങൾ ഒഴിവാക്കുക, മൃഗങ്ങളുമായി അടുത്ത് ഇടപഴകാതിരിക്കുക. ഇത്തരം കാര്യങ്ങൾ ശ്രദ്ധിക്കണം', ഡോക്ടർ കൂട്ടിച്ചേർത്തു.

'വെറും പേശികളും അതിനെ നിയന്ത്രിക്കുന്ന നാഡികളും മാത്രമുള്ള ഒരു പമ്പ് മാത്രമാണ് ഹൃദയം. അല്ലാതെ അതിൽ കൂടി 'വികാരം' ഒന്നും മാറ്റിവെയ്ക്കപ്പെടുന്നില്ല. സയൻസിനെ പോലും വളച്ചും ഒടിച്ചും വക്രീകരിച്ചും കാണിക്കുന്നതിലൂടെ നഷ്ടപ്പെടുന്നത് ജനങ്ങളുടെ ശാസ്ത്രാവബോധവും സിനിമയുടെ ക്രെഡിബിലിറ്റിയും (Credibility) അഥവാ വിശ്വാസ്യതയുമാണ്', ഡോക്ടർ കുറിപ്പിൽ പറഞ്ഞു.

വമ്പൻ വിജയമായി 'ഹൃദയപൂർവ്വം'

അതേസമയം, ഹൃദയപൂർവ്വം എന്ന ചിത്രം വലിയ വിജയമാണ് നേടിയത്. ആഗോള ബോക്സ് ഓഫീസിൽ ചിത്രം 67.75 കോടി കളക്ഷൻ നേടി. വിദേശത്ത് നിന്ന് മാത്രം 27.85 കോടി രൂപയും ചിത്രം നേടിയതായി ട്രേഡ് അനലിസ്റ്റുകളായ സാക്‌നിൽക്ക് റിപ്പോർട്ട് ചെയ്യുന്നു. മോഹൻലാൽ, ലാലു അലക്സ്, സംഗീത് പ്രതാപ്, മാളവിക മോഹനൻ, സംഗീത, സിദ്ദിഖ്, ബാബുരാജ്, സബിത ആനന്ദ് തുടങ്ങി വലിയൊരു താരനിര തന്നെ ചിത്രത്തിൽ അണിനിരന്നിരുന്നു. ആശിർവാദ് സിനിമാസും സത്യൻ അന്തിക്കാടും ഒന്നിക്കുന്ന അഞ്ചാമത്തെ ചിത്രം കൂടിയാണിത്. 2015-ൽ പുറത്തിറങ്ങിയ 'എന്നും എപ്പോഴും' എന്ന ചിത്രമാണ് ഇതിന് മുൻപ് ഈ കൂട്ടുകെട്ടിൽ പുറത്തിറങ്ങിയത്.

സത്യൻ അന്തിക്കാടിന്റെ മക്കളായ അഖിൽ സത്യനും അനൂപ് സത്യനും അദ്ദേഹത്തിനൊപ്പം പ്രവർത്തിക്കുന്നു എന്ന പ്രത്യേകതയും 'ഹൃദയപൂർവ്വം' സിനിമയ്ക്കുണ്ട്. ചിത്രത്തിന്റെ കഥ ഒരുക്കിയത് അഖിൽ സത്യനാണ്. നവാഗതനായ ടി പി സോനു തിരക്കഥയും എഴുതി. അനൂപ് സത്യനാണ് ചിത്രത്തിന്റെ പ്രധാന സംവിധാന സഹായി.
 

സിനിമയിലെ ഈ ശാസ്ത്രീയ പിഴവുകളെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക.

Article Summary: Doctor criticizes Sathyan Anthikad's 'Hridayapoorvam' movie.

#Hridayapoorvam #Mohanlal #SathyanAnthikad #OrganDonation #MovieReview #DrHarisChirakkal