Health Scare | നെയ്യാറ്റിന്‍കരയിലെ കുളം മസ്തിഷ്‌കജ്വരത്തിന്റെ കേന്ദ്രം? 4 പേര്‍ കൂടി ചികിത്സയില്‍

തിരുവനന്തപുരം: (KVARTHA) നെയ്യാറ്റിന്‍കരയില്‍ കുളത്തില്‍ (Neyyattinkara) കുളിച്ച ശേഷം മസ്തിഷ്‌കജ്വരം (Amebic Encephalitis) ബാധിച്ച് ഒരു യുവാവ് മരിച്ച സംഭവം വലിയ ആശങ്ക സൃഷ്ടിച്ചിരിക്കുന്നു. ഇതേ കുളത്തില്‍ ഇറങ്ങിയ നാല് പേര്‍ക്കും കടുത്ത പനി ബാധിച്ച് മെഡിക്കല്‍ കോളേജ് ആശുപത്രിയില്‍ (Medical College Hospital) ചികിത്സയിലാണ്. ഇവരില്‍ ഒരാള്‍ക്ക് മസ്തിഷ്‌കജ്വരം സ്ഥിരീകരിച്ചതായി ആശുപത്രി അധികൃതര്‍ അറിയിച്ചു.

26 കാരനായ അനീഷ്, 25 കാരനായഅച്ചു, 27 കാരനായ ഹരീഷ്, 26 കാരനായ ധനുഷ് എന്നിവരാണ് ആശുപത്രിയില്‍ ചികിത്സയിലുള്ളത്. ഇതില്‍ അനീഷിന് മസ്തിഷ്‌കജ്വരം സ്ഥിരീകരിച്ചതോടെ ആരോഗ്യ വകുപ്പ് (Health Department) അടിയന്തര നടപടികള്‍ സ്വീകരിച്ചു. കുളത്തിലെ വെള്ളത്തിന്റെ സാമ്പിള്‍ (Water Sample) ശേഖരിച്ച് പരിശോധനയ്ക്ക് അയച്ചിരിക്കുകയാണ്.

കഴിഞ്ഞ 23ന് മരിച്ച അഖില്‍ (27) എന്ന യുവാവ്, മരിക്കുന്നതിന് പത്ത് ദിവസം മുമ്പ് പനി ബാധിച്ചയാളാണ്. തുടക്കത്തില്‍ വീടിനടുത്തുള്ള സ്വകാര്യ ആശുപത്രിയില്‍ (Private Hospital) ചികിത്സ തേടിയെങ്കിലും അവസ്ഥ ഗുരുതരമായതിനാല്‍ മെഡിക്കല്‍ കോളേജ് ആശുപത്രിയിലെ തീവ്രപരിചരണ വിഭാഗത്തില്‍ പ്രവേശിപ്പിക്കുകയായിരുന്നുു. തലച്ചോറിലെ അണുബാധ (Brain Infection) മൂലമാണ് മരണം സംഭവിച്ചതെന്ന് ഡോക്ടര്‍മാര്‍ സ്ഥിരീകരിച്ചു.

അതേസമയം, പത്ത് വര്‍ഷം മുമ്പ് മരത്തില്‍ നിന്ന് വീണ് തലയ്ക്ക് പരിക്കേറ്റ അഖില്‍ മുന്‍പ് കോലഞ്ചേരി മെഡിക്കല്‍ കോളേജ് ആശുപത്രിയില്‍ ചികിത്സ തേടിയിരുന്നു. ഈ പഴയ പരിക്കിനും ഇപ്പോഴത്തെ അസുഖത്തിനും ബന്ധമുണ്ടോ എന്ന കാര്യം അന്വേഷിക്കുന്നുണ്ട്. ആരോഗ്യ വകുപ്പിന്റെ നിര്‍ദ്ദേശപ്രകാരം കുളത്തില്‍ ഇറങ്ങുന്നത് കര്‍ശനമായി നിരോധിച്ചിരിക്കുകയാണ്.