Health | സംസ്ഥാനത്ത് ഒരാള്‍ക്ക് കൂടി അമീബിക് മസ്തിഷ്കജ്വരം സ്ഥിരീകരിച്ചു; തിരുവനന്തപുരത്ത് ആശങ്ക വർധിക്കുന്നു

തിരുവനന്തപുരം: (KVARTHA) ജില്ലയിൽ അപൂർവമായ അമീബിക് മസ്തിഷ്കജ്വരം (Amebic Meningoencephalitis) പടർന്നുപിടിക്കുന്നത് ആശങ്കയ്ക്ക് ഇടയാക്കുന്നു. ഇതിനോടകം എട്ട് പേർക്ക് ഈ രോഗം സ്ഥിരീകരിച്ചിട്ടുണ്ട്. നാവായിക്കുളം (Navaikulam) ഗ്രാമ പഞ്ചായത്ത് പരിധിയിലെ സ്വദേശിയായ 24-കാരിക്കാണ് ഏറ്റവും പുതിയതായി രോഗബാധ സ്ഥിരീകരിച്ചത്. ഇവർ അടുത്തിടെ നാവായിക്കുളം പഞ്ചായത്തിലെ ഇടമണ്ണിലെ തോട്ടിൽ കുളിച്ചിരുന്നുവെന്ന് ആരോഗ്യ പ്രവർത്തകരെ അറിയിച്ചു. ഇതിന് മുൻപ്, അതിയന്നൂര്‍ ഗ്രാമ പഞ്ചായത്ത്, പേരൂർക്കട പൊലീസ് സ്റ്റേഷന്‍ എന്നിവിടങ്ങളില്‍ നിന്നുള്ളവർക്കും ഈ രോഗം (Disease) ബാധിച്ചിരുന്നു.

ജൂലൈ 23ന് അമീബിക് മസ്തിഷ്‌കജ്വരം ബാധിച്ച് നെയ്യാറ്റിന്‍കര പൊലീസ് സ്റ്റേഷന്‍ പരിധിയിലെ 27 കാരന്‍ മരിച്ചിരുന്നു. തുടര്‍ന്ന് ഇയാളുടെ സുഹൃത്തുക്കളായ അഞ്ചുപേര്‍ക്ക് കൂടി രോഗം ബാധിക്കുകയായിരുന്നു. പിന്നാലെ പേരൂര്‍ക്കട പൊലീസ് സ്റ്റേഷന്‍ പരിധിയിലും  രോഗബാധയുണ്ടായി. രോഗികള്‍ വര്‍ധിച്ചതോടെ പ്രത്യേക മെഡിക്കല്‍ ബോര്‍ഡ് രൂപവത്കരിച്ചായിരുന്നു ചികിത്സ. ചികിത്സയിലുള്ളവരുടെ ആരോഗ്യനില ആശങ്കപ്പെടുത്തുന്നതല്ലെന്നാണ് വിവരം. ഗുരുതരാവസ്ഥയിലായിരുന്ന ഒരു രോഗിയെ നില മെച്ചപ്പെട്ടതിനെ തുടര്‍ന്ന് ഐ.സി.യുവില്‍ നിന്ന് വാര്‍ഡിലേക്ക് മാറ്റിയിട്ടുണ്ട്. 

മേയില്‍ മലപ്പുറത്ത് അഞ്ച് വയസ്സുകാരിയും ജൂണില്‍ കണ്ണൂരില്‍ 13കാരിയും ജൂലൈയില്‍ കോഴിക്കോട്ട് 12കാരനും അമീബിക് മസ്തിഷ്‌ക ജ്വരം ബാധിച്ച് മരിച്ചിരുന്നു. കഴിഞ്ഞ വര്‍ഷം ജൂലൈയില്‍ ആലപ്പുഴയില്‍ 25കാരനും മരിച്ചിരുന്നു.

മലിനമായ വെള്ളം കുടിക്കുന്നതും, കുളിക്കുന്നതും, മുഖം കഴുകുന്നതും രോഗത്തിന് കാരണമാകാം. തീവ്രമായ തലവേദന, പനി, ഓക്കാനം, ഛർദി, കഴുത്ത് തിരിക്കാൻ ബുദ്ധിമുട്ട് തുടങ്ങിയവയാണ് പ്രാഥമിക ലക്ഷണങ്ങൾ. പിന്നീട് ഗുരുതരാവസ്ഥയിൽ എത്തുമ്പോൾ അപസ്മാരം, ബോധക്ഷയം, ഓർമക്കുറവ് തുടങ്ങിയ ലക്ഷണങ്ങളും ഉണ്ടാവുന്നു. ഈ രോഗം കണ്ടെത്തിയാൽ ഉടൻ തന്നെ ആശുപത്രിയിൽ പ്രവേശിപ്പിച്ച് ചികിത്സ തേടണം.

അമീബിക് മസ്തിഷ്കജ്വരം കേരളത്തിൽ പലയിടത്തും വ്യാപകമാകുന്ന സാഹചര്യത്തിൽ, ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ഐസിഎംആർ) സംസ്ഥാനത്തെ ജലാശയങ്ങളിലെ അമീബയുടെ സാന്ദ്രത സംബന്ധിച്ച് പഠനം നടത്താൻ തീരുമാനിച്ചിട്ടുണ്ട്. മലപ്പുറം, കണ്ണൂർ, കോഴിക്കോട്, ആലപ്പുഴ എന്നീ ജില്ലകളിൽ ഇതിനു മുൻപ് ഇത്തരം സംഭവങ്ങൾ റിപ്പോർട്ട് ചെയ്തിട്ടുണ്ട്.

ശുദ്ധജലം ഉപയോഗിക്കുക, മലിനമായ വെള്ളത്തിൽ കുളിക്കുന്നത് ഒഴിവാക്കുക, ശുചിത്വം പാലിക്കുക, രോഗലക്ഷണങ്ങൾ കണ്ടാൽ ഉടൻ തന്നെ ഡോക്ടറെ കാണുക എന്നിവയാണ് പ്രതിരോധ മാർഗങ്ങൾ. ഈ രോഗത്തെക്കുറിച്ച് ജനങ്ങളിൽ അവബോധം സൃഷ്ടിക്കുകയും അതോടൊപ്പം അധികൃതർ അടിയന്തര നടപടികൾ സ്വീകരിക്കുകയും ചെയ്യേണ്ടത് അത്യാവശ്യമാണ്.#AmoebicMeningoencephalitis #Thiruvananthapuram #Kerala #India #HealthAlert #WaterborneDisease #PublicHealth