പാലക്കാട്: (KVARTHA) സംസ്ഥാനത്ത് അമീബിക് മസ്തിഷ്‌ക ജ്വരം സ്ഥിരീകരിച്ച പാലക്കാട് സ്വദേശിയുടെ നില അതീവ ഗുരുതരമായി തുടരുന്നു. കൊടുമ്പ് പഞ്ചായത്ത് പരിധിയിലെ 62 കാരന്‍ വെന്റിലേറ്ററിൽ തുടരുകയാണ്. അത്യപൂർവവും അതീവ ഗുരുതരവുമായ ഈ അണുബാധ വീണ്ടും സ്ഥിരീകരിച്ചതോടെ ആരോഗ്യ വകുപ്പ് ജാഗ്രതയിലാണ്.

രോഗം സ്ഥിരീകരിച്ചയാൾ ഒക്ടോബർ അഞ്ചാം തീയതിയാണ് ചികിത്സ തേടി ആദ്യം കൊടുമ്പ് പ്രാഥമികാരോഗ്യ കേന്ദ്രത്തിലും പിന്നീട് കൊടുവായൂർ കമ്മ്യൂണിറ്റി ഹെൽത്ത് സെന്ററിലേക്കും എത്തിയത്. തുടർന്ന് ജില്ലാ ആശുപത്രിയിലേക്ക് മാറ്റുകയും ആറാം തീയതി നടത്തിയ പ്രാഥമിക പരിശോധനയിൽ രോഗ സൂചന ലഭിക്കുകയും ചെയ്തു. ഒടുവിൽ ഒക്ടോബർ എട്ടാം തീയതി രോഗം സ്ഥിരീകരിച്ചതോടെ തൃശൂർ മെഡിക്കൽ കോളജിലേക്ക് മാറ്റി.

രോഗ ഉറവിടം തേടി

നിലവിൽ രോഗ ഉറവിടം ഇതുവരെ വ്യക്തമായിട്ടില്ലാത്ത സാഹചര്യത്തിൽ, പ്രദേശത്തെ അഞ്ച് ജലസ്രോതസുകളിലെ സാമ്പിളുകൾ പരിശോധനയ്ക്കായി അയച്ചിട്ടുണ്ട്. ഇതിൻ്റെ ഫലം ഉടൻ ലഭ്യമാകും എന്നാണ് കരുതുന്നത്. പ്രദേശത്ത് ആരോഗ്യ വകുപ്പിൻ്റെ വിശദമായ പരിശോധനയും ബോധവൽക്കരണ പ്രവർത്തനങ്ങളും തുടരുകയാണ്. പാലക്കാട് ജില്ലയിൽ ഇതിന് മുൻപ് രണ്ട് പേർക്ക് രോഗം സ്ഥിരീകരിച്ചിരുന്നു.

എന്താണ് അമീബിക് മസ്തിഷ്‌ക ജ്വരം

നെഗ്ലേറിയ ഫൗലേറി, അകാന്തമീബ തുടങ്ങിയ വിഭാഗത്തിൽപ്പെട്ട ഏകകോശ ജീവികളായ അമീബകൾ തലച്ചോറിനെ ബാധിക്കുമ്പോൾ ഉണ്ടാകുന്ന അണുബാധയാണ് അമീബിക് മസ്തിഷ്‌ക ജ്വരം. സാധാരണയായി നെഗ്ലേറിയ ഫൗലേറി എന്ന അമീബയാണ് പ്രൈമറി അമീബിക് മെനിഞ്ചോഎൻസെഫലൈറ്റിസ് എന്ന അണുബാധയ്ക്ക് കാരണമാകുന്നത്.

കെട്ടിക്കിടക്കുന്നതോ മലിനമായതോ ആയ ചൂടുവെള്ളത്തിലാണ് അമീബകൾ പ്രധാനമായും കാണപ്പെടുന്നത്. ഈ വെള്ളം മൂക്കിലൂടെ ശരീരത്തിൽ പ്രവേശിക്കുമ്പോഴാണ് രോഗം പകരുന്നത്. നീന്തൽ, വെള്ളത്തിൽ മുങ്ങിക്കുളിക്കൽ, ഓസ് ഉപയോഗിച്ച് മൂക്കിൽ വെള്ളം ചീറ്റിക്കൽ തുടങ്ങിയ സന്ദർഭങ്ങളിൽ ഇത് സംഭവിക്കാം. മൂക്കിലൂടെ പ്രവേശിക്കുന്ന അമീബ തലച്ചോറിലെത്തുകയും അവിടെ വീക്കം ഉണ്ടാക്കുകയും കോശങ്ങളെ നശിപ്പിക്കുകയും ചെയ്യുന്നതോടെയാണ് രോഗം ഗുരുതരമാകുന്നത്.
 

അമീബിക് മസ്തിഷ്‌ക ജ്വരം വീണ്ടും സ്ഥിരീകരിച്ച സാഹചര്യത്തിൽ പൊതുജനാരോഗ്യത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Amebic Meningoencephalitis confirmed in a 62-year-old Palakkad man; critically ill on ventilator.

#AmebicMeningoencephalitis #KeralaHealth #Palakkad #HealthAlert #NegleriaFowleri #CriticalCondition