അമീബിക് മസ്തിഷ്ക ജ്വരം: കോഴിക്കോട് ചികിത്സയിൽ 10 പേർ, വിദേശത്ത് നിന്ന് മരുന്ന് എത്തിച്ച് നൽകുന്നു

കോഴിക്കോട്: (KVARTHA) കോഴിക്കോട് അമീബിക് മസ്തിഷ്ക ജ്വരം ബാധിച്ച് മരിച്ച സ്ത്രീക്ക് ഹൃദയസംബന്ധമായ അസുഖങ്ങളും ഉണ്ടായിരുന്നതായി കോഴിക്കോട് മെഡിക്കൽ കോളേജ് പ്രിൻസിപ്പൽ ഡോ. സജീത് കുമാർ പറഞ്ഞു.

അമീബിക് മസ്തിഷ്ക ജ്വരം ബാധിച്ച് മരിച്ച മൂന്ന് മാസം പ്രായമുള്ള കുഞ്ഞിന് രോഗപ്രതിരോധശേഷി കുറവായിരുന്നെന്നും അദ്ദേഹം കൂട്ടിച്ചേർത്തു. ഇരുവരും തുടക്കം മുതൽ വെന്റിലേറ്ററിന്റെ സഹായത്തിലായിരുന്നു.

മരിച്ച രണ്ടുപേരുടെയും തലച്ചോറിൽ നെഗ്ലീരിയ വിഭാഗത്തിൽപ്പെട്ട അമീബയാണ് പ്രവേശിച്ചത്. ഇവർക്ക് മികച്ച ചികിത്സയാണ് നൽകിയത്. നിലവിൽ മെഡിക്കൽ കോളേജിൽ 10 പേരാണ് അമീബിക് മസ്തിഷ്ക ജ്വരം ബാധിച്ച് ചികിത്സയിലുള്ളത്.

ഇവരെല്ലാം മറ്റ് ഗുരുതര രോഗങ്ങൾ ഉള്ളവരാണ്. രോഗികൾക്കായി വിദേശത്ത് നിന്ന് മരുന്ന് എത്തിച്ച് നൽകുന്നുണ്ടെന്നും ഡോ. സജീത് കുമാർ അറിയിച്ചു. അമീബിക് മസ്തിഷ്ക ജ്വരം ബാധിച്ച് കഴിഞ്ഞ ദിവസം രണ്ട് പേരാണ് മരിച്ചത്.

മലപ്പുറം കാപ്പിൽ സ്വദേശിയായ 52 വയസ്സുകാരിയും മൂന്ന് മാസം പ്രായമുള്ള കുഞ്ഞുമാണ് മരിച്ചത്. ഒരു മാസമായി കോഴിക്കോട് മെഡിക്കൽ കോളേജിൽ ചികിത്സയിലായിരുന്ന കുഞ്ഞ് കഴിഞ്ഞ ദിവസം രാത്രി പതിനൊന്ന് മണിയോടെയാണ് മരിച്ചത്. അഞ്ചാം തീയതി ആശുപത്രിയിൽ പ്രവേശിപ്പിച്ച 52 വയസ്സുകാരിയും മരണത്തിന് കീഴടങ്ങി.

അമീബിക് മസ്തിഷ്ക ജ്വരത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: 10 patients are under treatment for amebic meningoencephalitis in Kozhikode.

#AmebicMeningoencephalitis #Kozhikode #Health #Kerala #News #Medical