'തെളിവില്ലാതെ ആരോപണം ഉന്നയിക്കരുത്, വൈറലാകാൻ ആരുടെയും ജീവിതം നശിപ്പിക്കരുത്'; ദീപക്കിന്റെ വിയോഗത്തിൽ പ്രതികരിച്ച് രേണു സുധി

കൊച്ചി: (KVARTHA) ബസ് യാത്രക്കിടെ ലൈംഗിക അതിക്രമം നടത്തിയെന്നാരോപിച്ച് യുവതി വീഡിയോ പകർത്തി സോഷ്യൽ മീഡിയയിൽ പ്രചരിപ്പിച്ചതിൽ മനംനൊന്ത് ദീപക് എന്ന യുവാവ് ജീവനൊടുക്കിയ സംഭവത്തിൽ രൂക്ഷ പ്രതികരണവുമായി രേണു സുധി.  കെഎസ്പുരം സുധീർ എന്നയാളുടെ ചോദ്യത്തോട് പ്രതികരിക്കവെയാണ് ഈ വിഷയത്തിൽ രേണു സുധി തന്റെ നിലപാട് വ്യക്തമാക്കിയത്. തെളിവില്ലാതെ ആരോപണങ്ങൾ ഉന്നയിച്ച് ആരുടെയും ജീവിതം നശിപ്പിക്കരുതെന്ന് അവർ ആവശ്യപ്പെട്ടു.

തെറ്റ് ചെയ്യാത്തതുകൊണ്ടാകാം ദീപക് എന്ന യുവാവ് മരിക്കാൻ നിർബന്ധിതനായതെന്ന് രേണു സുധി അഭിപ്രായപ്പെട്ടു. ‘ഇതിന് മുൻപും ഇത്തരം സംഭവങ്ങൾ ഉണ്ടായിട്ടുണ്ട്. എന്നാൽ അവരാരും ജീവനൊടുക്കിയിട്ടില്ല. ഇദ്ദേഹത്തെ സംബന്ധിച്ച് പറയുകയാണെങ്കിൽ അദ്ദേഹം അങ്ങനെയൊന്നും ചെയ്തിട്ടില്ലായിരിക്കും. അതുകൊണ്ടാകാം ജീവനൊടുക്കിയത്. തിരക്കുള്ള ബസിൽ യാത്ര ചെയ്യുമ്പോൾ മുട്ടുകയൊക്കെ ചെയ്യാറുണ്ടല്ലോ. അറിയാതെയായിരിക്കാം അത് സംഭവിച്ചത്,’ രേണു പറഞ്ഞു.

View this post on Instagram

A post shared by Talks Letmetalk (@talksletmetalk)

വീഡിയോ പകർത്തി പ്രചരിപ്പിച്ച യുവതിയുടെ നടപടിയെ രേണു സുധി നിശിതമായി വിമർശിച്ചു. താൻ കണ്ടതും കേട്ടതും വെച്ച് നോക്കുമ്പോൾ ആ യുവതി വൈറലാകാൻ വേണ്ടിത്തന്നെയാണ് അങ്ങനെ ചെയ്തതെന്ന് സംശയിക്കേണ്ടിയിരിക്കുന്നു. അത് വളരെ മോശമായിപ്പോയി. പരാതിയുണ്ടെങ്കിൽ ആ വീഡിയോ പോലീസിന് കൈമാറുകയാണ് ചെയ്യേണ്ടിയിരുന്നത്. അങ്ങനെ ചെയ്താൽ വൈറലാകില്ലല്ലോ. ഇന്ന് സിനിമാ നടി ആകുന്നതിനേക്കാൾ വൈറലാകാനാണ് എല്ലാവരും ആഗ്രഹിക്കുന്നത്. കുറേപ്പേരുണ്ട് അങ്ങനെ ചിന്തിക്കുന്നവർ എന്നും രേണു സുധി കൂട്ടിച്ചേർത്തു.

സ്ത്രീകൾ ആവശ്യമില്ലാത്ത കാര്യങ്ങൾക്ക് വേണ്ടി പ്രതികരിച്ച് വെറുതെ വിഷയങ്ങൾ ഉണ്ടാക്കരുത്. പ്രതികരിക്കേണ്ട കാര്യങ്ങളിൽ മാത്രം കൃത്യമായി പ്രതികരിക്കുക. വെറുതെ തെറ്റിദ്ധാരണയുടെ പുറത്ത് ഇങ്ങനെ ചെയ്തത് വലിയ തെറ്റായിപ്പോയി. ആ മകനെ ആശ്രയിച്ചു കഴിയുന്ന ഒരു അമ്മയുണ്ട്. അവർക്കുണ്ടായ വിഷമം ആലോചിക്കണമായിരുന്നു. ഇത് ചെറിയ കാര്യമല്ല, വലിയ കാര്യമാണ്. ഒരാൾക്കെതിരെ ആരോപണം ഉന്നയിക്കുമ്പോൾ കൃത്യമായ തെളിവുകൾ വേണം. ആരുടെയും ജീവിതം നശിപ്പിക്കരുതെന്നും രേണു സുധി പറഞ്ഞു.

ദീപക്കിന്റെ ജീവൻ പൊലിഞ്ഞതിൽ വലിയ വിഷമമുണ്ടെന്നും അവർ അറിയിച്ചു. അതേസമയം, ദീപക്കിനെതിരെ വീഡിയോ പ്രചരിപ്പിച്ച കുറ്റാരോപിതയായ ഷിംജിതയെ കണ്ടെത്താനുള്ള ശ്രമത്തിലാണ് അന്വേഷണ സംഘം.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: Renu Sudhi strongly reacts to the suicide of Deepak, accusing the woman who filmed him of seeking viral fame without considering the consequences. She emphasizes that unverified allegations can destroy lives.

#RenuSudhi #DeepakSuicide #SocialMediaTrial #KeralaNews #JusticeForDeepak #ViralVideo