കൊച്ചി: (KVARTHA) നവ്യ നായരും സൗബിൻ ഷാഹിറും കേന്ദ്ര കഥാപാത്രങ്ങളായി എത്തുന്ന 'പാതിരാത്രി' വെള്ളിയാഴ്ച (17.10.2025) തീയേറ്ററുകളിലെത്തുകയാണ്. ബെൻസി പ്രൊഡക്ഷൻസിൻ്റെ ബാനറിൽ ഡോ. കെ.വി.അബ്ദുൾ നാസർ, ആഷിയ നാസർ എന്നിവർ ചേർന്നാണ് ഈ ചിത്രം നിർമിക്കുന്നത്. പ്രേക്ഷക-നിരൂപക പ്രശംസ പിടിച്ചുപറ്റിയ മമ്മൂട്ടിയുടെ 'പുഴു' എന്ന സിനിമക്ക് ശേഷം രത്തീന സംവിധാനം ചെയ്യുന്ന രണ്ടാമത്തെ ചിത്രം കൂടിയാണ് 'പാതിരാത്രി'.

യു/എ (മുതിർന്നവരുടെ മേൽനോട്ടത്തിൽ എല്ലാവർക്കും കാണാൻ കഴിയുന്ന) സർട്ടിഫിക്കറ്റോടെ തീയേറ്ററുകളിൽ എത്തുന്ന പുതിയ ചിത്രം ഒരു ക്രൈം ഡ്രാമ ഇൻവെസ്റ്റിഗേഷൻ ത്രില്ലറായാണ് ഒരുക്കിയിരിക്കുന്നത്. ഒരു കൊലപാതകവുമായി ബന്ധപ്പെട്ട അന്വേഷണങ്ങളാണ് 'പാതിരാത്രി'യുടെ കഥാതന്തു എന്നാണ് ട്രെയിലർ സൂചിപ്പിക്കുന്നത്. കേസന്വേഷണവുമായി ബന്ധപ്പെട്ട അപ്രതീക്ഷിതമായ സംഭവ വികാസങ്ങളും കുടുംബബന്ധങ്ങളും ചേർത്തണക്കിയാണ് ട്രെയിലർ വികസിക്കുന്നത്. ഉദ്വേഗഭരിതമായ ട്രെയിലർ രംഗങ്ങൾ പ്രേക്ഷകരിൽ ആകാംഷയും പ്രതീക്ഷയും ഉണർത്തുന്നവയാണ്.

നവ്യ നായർ ആദ്യമായി പോലീസ് വേഷത്തിലെത്തുന്നു എന്നത് തന്നെയാണ് ചിത്രത്തിന്റെ പ്രധാന ആകർഷണം. ജാൻസി എന്ന പോലീസ് കഥാപാത്രമായാണ് നവ്യ എത്തുന്നത്. സൗബിൻ ഷാഹിർ ഹരീഷ് എന്ന പോലീസ് വേഷത്തിൽ നവ്യക്കൊപ്പം ചേരുന്നു. ഇവർക്കൊപ്പം സണ്ണി വെയ്‌നും, ആൻ അഗസ്റ്റിനും ചിത്രത്തിൽ നിർണ്ണായക കഥാപാത്രങ്ങളായാണ് എത്തുന്നത്.

ആത്മീയ രാജൻ, ശബരീഷ് വർമ്മ, ഹരിശ്രീ അശോകൻ, അച്യുത് കുമാർ, ഇന്ദ്രൻസ്, തേജസ് എന്നിവരാണ് ചിത്രത്തിലെ മറ്റ് പ്രധാന താരങ്ങൾ. 'തുടരും', 'ലോക' എന്നീ ഇൻഡസ്ടറി ഹിറ്റ് ചിത്രങ്ങൾക്ക് ശേഷം ജേക്സ് ബിജോയ് സംഗീതമൊരുക്കുന്ന ചിത്രം കൂടിയാണ് 'പാതിരാത്രി'. ചിത്രത്തിലെ പ്രോമോ ഗാനം ട്രെൻഡിങ്ങിൽ തുടരുകയാണ്. ഷാജി മാറാടാണ് ചിത്രത്തിൻ്റെ തിരക്കഥ നിർവഹിച്ചിരിക്കുന്നത്. ഷെഹ്നാദ് ജലാൽ ഛായാഗ്രഹണം നിർവഹിച്ചു.

രത്തീനയുടെ സിനിമാ യാത്ര

2010-ൽ മലയാള സംവിധായിക രേവതിയുടെ സഹായിയായി രത്തീന തൻ്റെ സിനിമാ ജീവിതം ആരംഭിച്ചു. പിന്നീട് കുങ്കുമപ്പൂവ് എന്ന സീരിയലിൻ്റെ പ്രൊഡക്ഷനിലും അവർ ഭാഗമായി. സെവൻ ആർട്സിൻ്റെ പ്രിയദർശൻ പടങ്ങളിലും അവർ പ്രവർത്തിച്ചിട്ടുണ്ട്. സിനിമയുടെ വിവിധ മേഖലകളെക്കുറിച്ച് കൂടുതൽ പഠിക്കുകയും പരിചയപ്പെടുകയും ചെയ്ത രത്തീന ഒരു സ്വതന്ത്ര സംവിധായിക എന്ന നിലയിലുള്ള അവരുടെ അരങ്ങേറ്റം 'പുഴു' എന്ന ചിത്രത്തിലൂടെയാണ് അടയാളപ്പെടുത്തിയത്. 'ഉയരെ', 'ജാനകി ജാനെ' എന്നീ സിനിമകളിൽ എക്സിക്യൂട്ടീവ് പ്രൊഡ്യൂസർ ആയും രത്തീന പ്രവർത്തിച്ചിട്ടുണ്ട്. ഡ്രീം ബിഗ് ഫിലിംസാണ് ചിത്രം കേരളത്തിൽ വിതരണം ചെയ്യുന്നത്.

അണിയറ പ്രവർത്തകർ

സംഗീതം - ജേക്സ് ബിജോയ്, എഡിറ്റർ - ശ്രീജിത്ത് സാരംഗ്, ആർട്ട് - ദിലീപ് നാഥ്, പ്രൊഡക്ഷൻ കൺട്രോളർ - പ്രശാന്ത് നാരായണൻ, മേക്കപ്പ് - ഷാജി പുൽപ്പള്ളി, വസ്ത്രങ്ങൾ - ലിജി പ്രേമൻ, ചീഫ് അസോസിയേറ്റ് ഡയറക്ടർ - അജിത് വേലായുധൻ, അസോസിയേറ്റ് ഡയറക്ടർ - സിബിൻ രാജ്, ആക്ഷൻ - പി സി സ്റ്റണ്ട്സ്, സ്റ്റിൽസ് - നവീൻ മുരളി, ടൈറ്റിൽ ഡിസൈൻ - യെല്ലോ ടൂത്ത്സ്, പോസ്റ്റർ ഡിസൈൻ - ഇല്ലുമിനാർട്ടിസ്റ്റ്.

പോലീസ് വേഷത്തിൽ നവ്യ നായരുടെ ഈ ക്രൈം ത്രില്ലർ കാണാൻ നിങ്ങൾ തയ്യാറാണോ? അഭിപ്രായം പങ്കുവെക്കുക.

Article Summary: Navya Nair and Soubin Shahir's Pathiraathri, directed by Ratheena, is releasing on Friday, Oct 17.

#Pathiraathri #NavyaNair #SoubinShahir #Ratheena #CrimeDrama #JakesBejoy