കൊച്ചി: (KVARTHA) മലയാള സിനിമയുടെ അഭിമാന താരങ്ങളായ മമ്മൂട്ടിയും മോഹൻലാലും വർഷങ്ങളായി മലയാളികൾക്ക് നിരവധി കഥാപാത്രങ്ങളെയാണ് സമ്മാനിച്ചത്. ഇരുവരുടെയും സൗഹൃദം സിനിമാ ലോകത്ത് ഒരു മാതൃകയാണ്. അടുത്തിടെ ഒരു ആരോഗ്യപ്രശ്നത്തെ തുടർന്ന് ചികിത്സയിലായിരുന്ന മമ്മൂട്ടി സുഖം പ്രാപിച്ച് തിരിച്ചെത്തിയിരുന്നു. ഈ അവസരത്തിൽ മമ്മൂട്ടിയെ കുറിച്ചും പുതിയ സിനിമയായ 'പാട്രിയേറ്റിനെ' കുറിച്ചും തുറന്നുപറയുകയാണ് മോഹൻലാൽ.

'നന്ദി ദൈവമേ... ഒരുപാട് പേരുടെ പ്രാർത്ഥന'

മമ്മൂട്ടിയുടെ ആരോഗ്യത്തെക്കുറിച്ചുള്ള ചോദ്യത്തിന്, 'വളരെ സന്തോഷം. നന്ദി ദൈവമേ എന്നാണ് പറയേണ്ടത്. ഒരുപാട് പേരുടെ പ്രാർത്ഥനയാണ് അദ്ദേഹത്തോടൊപ്പം ഉണ്ടായിരുന്നത്. അദ്ദേഹത്തോട് സംസാരിക്കുകയും പോയി കാണുകയും ചെയ്തിരുന്നു,' മോഹൻലാൽ പറഞ്ഞു.

'നമുക്കൊന്നും ചെയ്യാൻ പറ്റാത്ത കാര്യമാണ്. സ്വന്തമായി അനുഭവിക്കേണ്ട കാര്യമാണ്. ഏത് കാര്യമായാലും അങ്ങനെ തന്നെ. മനുഷ്യന്റെ ഉള്ളിൽ സംഭവിക്കുന്ന കാര്യമല്ലേ. ഒരുപാട് പേരുടെ പ്രാർത്ഥന അദ്ദേഹത്തിനുണ്ടായി,' മോഹൻലാൽ കൂട്ടിച്ചേർത്തു.

മമ്മൂട്ടിയുമായി വീണ്ടും ഒന്നിച്ചെത്തുന്നതിനെക്കുറിച്ചും അദ്ദേഹം സംസാരിച്ചു. 'ഞങ്ങൾ വീണ്ടും ഒന്നിച്ചഭിനയിക്കുന്നുണ്ട്. 'പാട്രിയേറ്റ്' എന്ന സിനിമയിൽ. അതിനുവേണ്ടി ഞങ്ങൾ കാത്തിരിക്കുകയാണ്,' മോഹൻലാൽ പറഞ്ഞു.

പാട്രിയേറ്റ് മറ്റൊരു നാഴികക്കല്ലാകുമോ?

'പാട്രിയേറ്റ്' സിനിമ മറ്റൊരു നാഴികക്കല്ലാകുമോ എന്ന ചോദ്യത്തിന് മോഹൻലാലിൻ്റെ മറുപടി ഇങ്ങനെയായിരുന്നു: 'എല്ലാ സിനിമകളും ഓടണം എന്ന് ആഗ്രഹിക്കുന്ന ഒരാളാണ് ഞാൻ. എൻ്റെ സിനിമ മാത്രമല്ല, കാരണം ഇതൊരു വലിയ ഇൻഡസ്ട്രിയല്ലേ? തിയേറ്ററുകൾക്ക് റൺ ചെയ്ത് പോകണമെങ്കിൽ നല്ല സിനിമകൾ ഉണ്ടാകണം. പ്രേക്ഷകർ പോയി സിനിമ കാണണം. അവരെ തിയേറ്ററുകളിലേക്ക് കൊണ്ടുവരിക എന്നതാണ് ഏറ്റവും വലിയ വെല്ലുവിളി.'

'വലിയ സിനിമകൾ കൊണ്ട് മാത്രം കാര്യമില്ല. അതിനനുസരിച്ചുള്ള പ്രമേയങ്ങളും വേണം. സിനിമയ്ക്ക് അതിൻ്റേതായ ഒരു ഭാഷയുണ്ട്. അത് നന്നായി കൈകാര്യം ചെയ്യുമ്പോഴാണ് ഒരു നല്ല സിനിമ ഉണ്ടാകുന്നത്,' മോഹൻലാൽ കൂട്ടിച്ചേർത്തു.
 

മമ്മൂട്ടി-മോഹൻലാൽ കോംബോയിൽ ഇറങ്ങിയ നിങ്ങളുടെ ഇഷ്ട സിനിമ ഏതാണ്? കമൻ്റ് ചെയ്യുക.

Article Summary: Mohanlal talks about Mammootty's health and their new film.

#Mohanlal #Mammootty #Patriot #MalayalamCinema #News #Friendship