ഭാമനാവത്ത് 

(KVARTHA) മലയാള സിനിമയുടെ ഹാസ്യ സാമ്രാജ്യത്തിലെ അധിപൻ, തഗ് ഡയലോഗുകളുടെ സുൽത്താൻ - മാമുക്കോയ നമ്മെ വിട്ടുപിരിഞ്ഞിട്ട് ഇന്ന് (ഏപ്രിൽ 26) രണ്ട് വർഷം തികയുന്നു. ഹാസ്യ നടനായും സ്വഭാവ നടനായും മലയാളികളുടെ വെള്ളിത്തിരയിൽ നിറഞ്ഞുനിന്ന ആ അതുല്യ പ്രതിഭയുടെ ഓർമ്മകൾക്ക് മരണമില്ല.

സിനിമയിലും ജീവിതത്തിലും ഒരുപോലെ ലാളിത്യം കാത്തുസൂക്ഷിച്ച, സ്നേഹത്തിന്റെ ഭാഷ മാത്രം സംസാരിച്ച തനി കോഴിക്കോട്ടുകാരനായിരുന്നു മാമുക്കോയ. നാടകത്തിലൂടെ സിനിമയിലെത്തിയ അദ്ദേഹം, ആരെയും അനുകരിക്കാതെ തന്റേതായ ഒരു അഭിനയ ശൈലിയിലൂടെ മലയാളി പ്രേക്ഷകരുടെ ഹൃദയത്തിൽ ഇടം നേടി. കോഴിക്കോട്ടെ സാംസ്കാരിക വേദികളിലെ നിറസാന്നിധ്യമായിരുന്നു അദ്ദേഹം എപ്പോഴും.

പലർക്കും അറിയാത്ത ഒരു മുഖം കൂടി മാമുക്കോയയ്ക്കുണ്ടായിരുന്നു - സമകാലിക സംഭവങ്ങളെ സൂക്ഷ്മമായി വിലയിരുത്തുന്ന, വ്യക്തമായ നിലപാടുകളുള്ള ഒരു സാമൂഹ്യ നിരീക്ഷകന്റേത്. മതപരവും രാഷ്ട്രീയപരവുമായ കാര്യങ്ങളിൽ തനിക്കുള്ള അഭിപ്രായങ്ങളും വിയോജിപ്പുകളും തുറന്നുപറയാൻ അദ്ദേഹം ഒരിക്കലും മടികാണിച്ചില്ല.

1946 ജൂലൈ അഞ്ചിന് കോഴിക്കോട്ടാണ് മാമുക്കോയ ജനിച്ചത്. സ്കൂൾ പഠനകാലം മുതൽ നാടകത്തിൽ സജീവമായിരുന്ന അദ്ദേഹം, പിന്നീട് പകൽസമയങ്ങളിൽ കൂപ്പിലെ തടി അളവുകാരനായും രാത്രി നാടകവേദികളിലും നിറഞ്ഞു.

അന്യരുടെ ഭൂമി, സുറുമയിട്ട കണ്ണുകൾ എന്നീ ആദ്യ ചിത്രങ്ങൾ വേണ്ടത്ര ശ്രദ്ധിക്കപ്പെട്ടില്ലെങ്കിലും, സിബി മലയിലിന്റെ ദേശീയോദ്ഗ്രഥനത്തിനുള്ള പുരസ്കാരം നേടിയ 'ദൂരെ ദൂരെ ഒരു കൂടുകൂട്ടാം' എന്ന ചിത്രത്തിലെ അറബി മുൻഷിയുടെ വേഷം അദ്ദേഹത്തിന്റെ കരിയറിലെ വഴിത്തിരിവായി. 

ഈ സിനിമയ്ക്ക് ശേഷം നാടകാഭിനയത്തിനും കൂപ്പിലെ ജോലിക്കും പോകാൻ സമയം കിട്ടിയിട്ടില്ലെന്ന് മാമുക്കോയ തമാശയായി ഓർക്കാറുണ്ടായിരുന്നു. പിന്നീട് ഗാന്ധിനഗർ സെക്കൻഡ് സ്ട്രീറ്റ്, സന്മനസ്സുള്ളവർക്ക് സമാധാനം, മഴവിൽക്കാവടി, വരവേൽപ്പ്, നാടോടിക്കാറ്റ് തുടങ്ങി 450 ലേറെ ചിത്രങ്ങളിൽ അദ്ദേഹം തൻ്റെ തനതായ ശൈലി പതിപ്പിച്ചു.

'കൺകെട്ട്' എന്ന സിനിമയിലെ കീലേരി അച്ചു, 'നാടോടിക്കാറ്റി'ലെ ഗഫൂർക്കാ, 'സന്ദേശ'ത്തിലെ മണ്ഡലം പ്രസിഡണ്ട് കെ.ജി. പൊതുവാൾ, 'ഹിസ് ഹൈനസ് അബ്ദുള്ള'യിലെ ജമാൽ തുടങ്ങി മലയാളി പ്രേക്ഷകരുടെ മനസ്സിൽ ഒരിക്കലും മായാത്ത നിരവധി കഥാപാത്രങ്ങളെ മാമുക്കോയ സമ്മാനിച്ചു. 

സീരിയസ് വേഷങ്ങളും തന്മയത്വത്തോടെ അവതരിപ്പിച്ച അദ്ദേഹത്തിന് 'പെരുമഴക്കാല'ത്തിലെ അഭിനയത്തിന് സംസ്ഥാന അവാർഡ് കമ്മിറ്റിയുടെ പ്രത്യേക പുരസ്കാരവും ലഭിച്ചു.

കോഴിക്കോട്ടുകാരുടെ ജീവിതത്തിന്റെ അവിഭാജ്യ ഘടകമായ സാംസ്കാരിക കൂട്ടായ്മകളിലെ സ്ഥിരം സാന്നിധ്യമായിരുന്നു മാമുക്കോയ. അതോടൊപ്പം ഫുട്ബോളിനെയും അദ്ദേഹം ഏറെ സ്നേഹിച്ചു. തികച്ചും അപ്രതീക്ഷിതമായി, മലപ്പുറത്ത് ഒരു സെവൻസ് ഫുട്ബോൾ ടൂർണമെന്റ് ഉദ്ഘാടനത്തിനിടെ ഹൃദയാഘാതം സംഭവിച്ചതിനെ തുടർന്ന് 76-ാം വയസ്സിൽ ആ അതുല്യ കലാകാരൻ ഈ ലോകത്തോട് വിടപറഞ്ഞു. 

കണ്ണൂർ ജില്ലയിലെ പയ്യന്നൂരിൽ നടക്കുന്ന തുരിയം സംഗീതോത്സവത്തിലും അദ്ദേഹം സ്ഥിരം സാന്നിധ്യമായിരുന്നു. മനുഷ്യസ്നേഹിയായ മാമുക്കോയയുടെ ഓർമ്മകൾക്ക് മരണമില്ല.

മാമുക്കോയയുടെ ഇഷ്ട കഥാപാത്രം ഏതാണെന്ന് കമൻ്റ് ബോക്സിൽ പങ്കുവെക്കൂ!

Summary: Today marks the second death anniversary of Mamukkoya, a legendary figure in Malayalam cinema known for his comedy and character roles. A true Kozhikodian who maintained simplicity in both his on-screen and off-screen life, his role as Arabi Munshi in 'Doore Doore Oru Kood കൂട്ടാം' was a turning point. He acted in over 450 films, leaving behind memorable characters like Gafoorka and Keeleri Achu.

#Mamukkoya, #MalayalamCinema, #DeathAnniversary, #Kozhikode, #ArabiMunshi, #Gafoorka