തൃശൂർ: (KVARTHA) വൈലോപ്പിള്ളി ശ്രീധരമേനോന്റെ 'കൃഷ്ണാഷ്ടമി' എന്ന കവിതയെ ആസ്പദമാക്കി ഒരുക്കിയ 'കൃഷ്ണാഷ്ടമി ദി ബുക്ക് ഓഫ് ഡ്രൈ ലീവ്‌സ്' എന്ന സിനിമയുടെ ഓഡിയോ റിലീസ് സെപ്റ്റംബർ 21 ഞായറാഴ്ച നടക്കും. തൃശൂർ റീജിയണൽ തിയറ്ററിൽ വൈകിട്ട് 4.30നാണ് ചടങ്ങ്. അമ്പലക്കര ഗ്ലോബൽ ഫിലിംസിൻ്റെ ബാനറിൽ അനിൽ അമ്പലക്കര നിർമ്മിച്ച് ഡോ. അഭിലാഷ് ബാബു സംവിധാനം ചെയ്യുന്ന ചിത്രമാണിത്.

വൈലോപ്പിള്ളിയുടെ 'കടല്‍കാക്കകള്‍' എന്ന സമാഹാരത്തില്‍ 1958ൽ പുറത്തിറങ്ങിയ കവിതയാണ് 'കൃഷ്ണാഷ്ടമി'. ദുരധികാരപ്രയോഗത്തിന് ഇരയാകുന്ന കുറച്ച് മനുഷ്യരുടെ ജയിലിലെ ജീവിതമാണ് കവിത പറയുന്നത്. ഈ വിഷയത്തെ പുതിയ കാലത്തിനനുസരിച്ച് മാറ്റങ്ങളും കൂട്ടിച്ചേർക്കലുകളും വരുത്തി ദൃശ്യഭാഷ നല്‍കിയിരിക്കുകയാണ് 'കൃഷ്ണാഷ്ടമി' എന്ന ചിത്രത്തിൽ. സംവിധായകൻ ജിയോ ബേബിയാണ് സിനിമയിൽ മുഖ്യ വേഷത്തിലെത്തുന്നത്.

സംഗീതം ഔസേപ്പച്ചൻ

ചിത്രത്തിലെ ഏഴ് ഗാനങ്ങൾക്ക് സംഗീതം നൽകിയിരിക്കുന്നത് പ്രശസ്ത സംഗീത സംവിധായകനായ ഔസേപ്പച്ചനാണ്. വൈലോപ്പിള്ളിയുടെ വരികൾക്ക് പുറമെ സംവിധായകൻ അഭിലാഷ് ബാബുവിന്റെ വരികളും സിനിമയിലുണ്ട്. ഔസേപ്പച്ചൻ, പി.എസ്. വിദ്യാധരൻ, ജയരാജ് വാര്യർ, ഇന്ദുലേഖ വാര്യർ, സ്വർണ്ണ, അമൽ ആൻ്റണി, ചാർളി ബഹ്‌റിൻ എന്നിവരാണ് ഗായകർ. ചിത്രത്തിൻ്റെ ഓഡിയോ വിതരണക്കാർ സൈന മ്യൂസിക് (Zaina Music) ആണ്.

അണിയറപ്രവർത്തകർ

ചിത്രം ഉടൻ പ്രേക്ഷകരിലേക്ക് എത്തിച്ചേരും. എക്‌സിക്യൂട്ടീവ് പ്രൊഡ്യൂസർ കാർത്തിക് ജോഗേഷ്, ഛായാഗ്രഹണം ജിതിൻ മാത്യു, എഡിറ്റർ അനു ജോർജ്, സൗണ്ട് രബീഷ്, പ്രൊഡക്ഷൻ ഡിസൈനർ ദിലീപ് ദാസ്, പ്രൊഡക്ഷൻ കൺട്രോളർ ജയേഷ് എൽ ആർ, പ്രോജക്ട് ഡിസൈനർ ഷാജി എ ജോൺ, അസോസിയേറ്റ് ഡയറക്ടർ അഭിജിത് ചിത്രകുമാർ, മേക്കപ്പ് ബിനു സത്യൻ, കോസ്റ്റ്യൂംസ് അനന്തപത്മനാഭൻ എന്നിവരാണ് മറ്റ് അണിയറ പ്രവർത്തകർ.
 

വൈലോപ്പിള്ളിയുടെ 'കൃഷ്ണാഷ്ടമി' കവിത സിനിമയാകുമ്പോൾ നിങ്ങളുടെ പ്രതീക്ഷകൾ എന്തൊക്കെയാണ്? കമന്റ് ചെയ്യുക.

Article Summary: Geo Baby stars in 'Krishnaashtami,' audio release on Sept 21.

#Krishnaashtami #GeoBaby #Ouseppachan #MalayalamMovie #AudioRelease #Vyloppilli