മലയാള സിനിമയിലെ ആദ്യ ആക്ഷൻ ഹീറോ: ജയൻ ഓർമ്മകളിൽ നിറയുമ്പോൾ

ഭാമനാവത്ത് 

കണ്ണൂർ: (KVARTHA) ബ്ലാക്ക് ആൻഡ് വൈറ്റിൽ നിന്നും ഈസ്റ്റ്മാൻ കളറിലേക്ക് മലയാള സിനിമ പിച്ചവെക്കുന്ന കാലത്തായിരുന്നു ജയൻ എന്ന നടന്റെയും വളർച്ച. കാഴ്ചക്കാരിൽ ആവേശവും പരിഭ്രാന്തിയും വൈരാഗ്യവും വളർത്താൻ മസിൽക്കരുത്തും പൗരുഷവും സമ്മേളിച്ച ജയൻ എന്ന നടന് കഴിഞ്ഞു. നടൻ എന്ന നിലയിൽ താരപദവിയിലേക്ക് ജയന്റെ വളർച്ച ഒരു വലിയ ആരാധകവൃന്ദത്തെ സൃഷ്ടിച്ചുകൊണ്ടാണ് മുന്നേറിയത്.

മലയാള സിനിമയിലെ ആദ്യ ആക്ഷൻ ഹീറോയായി ജയൻ വാഴ്ത്തപ്പെട്ടു. ആകസ്മികമായി ഒരു ഹെലികോപ്റ്റർ അപകടത്തിലൂടെ ജയൻ വിടവാങ്ങിയിട്ട് ഇന്ന് (നവംബർ 16) 45 വർഷം തികയുമ്പോൾ, എൺപതുകളിൽ യൗവനക്കാരായ മലയാളികളുടെ സിരകളിൽ അണയാത്ത ആവേശമായി ജയൻ ഇന്നും നിലനിൽക്കുകയാണ്.

ഡയലോഗിലും രൂപത്തിലും വേഷത്തിലും ആക്ഷനിലും വേറിട്ടുനിന്ന താരം നാല് പതിറ്റാണ്ടുകൾക്കു ശേഷവും മലയാളിയുടെ മങ്ങാത്ത ഓർമയാണ്. നെഞ്ചുവിരിച്ചുള്ള നടത്തം, ബെൽബോട്ടം പാന്റ്‌സ്, സൺഗ്ലാസ്, മാസ് ഡയലോഗുകൾ, വേറിട്ട അംഗചലനങ്ങൾ ഇവയെല്ലാം പറഞ്ഞാൽ തന്നെ മലയാളികളുടെ മനസ്സിൽ തെളിയുന്നത് ജയന്റെ ചിത്രമായിരിക്കും. മലയാള സിനിമയിൽ ഒരു പുതുയുഗപ്പിറവിയായിരുന്നു സാഹസികതയുടെയും ആക്ഷന്റെയും പര്യായമായി മാറിയ ജയൻ.

കൊല്ലത്തെ തേവള്ളിയിൽ മാധവൻ പിള്ളയുടേയും ഭാരതിയമ്മയുടേയും മകനായി ജനിച്ച കൃഷ്ണൻ നായരാണ് പിൽക്കാലത്ത് ജയൻ എന്ന പേരിൽ സിനിമയിലെത്തിയത്. പതിനഞ്ച് വർഷത്തോളം നാവികസേനയിൽ ജോലിചെയ്ത ശേഷമായിരുന്നു സിനിമയിലേക്കുള്ള ജയന്റെ വരവ്.

1974-ൽ 'ശാപമോക്ഷം' എന്ന ചിത്രത്തിലൂടെയാണ് ജയന്റെ സിനിമയിലെ അരങ്ങേറ്റം. തുടർന്ന് വില്ലൻ വേഷങ്ങളിലേക്കും ഉപനായക വേഷങ്ങളിലേക്കും പിന്നീട് നായക വേഷങ്ങളിലേക്കും വളർന്നു. 'ശരപഞ്ജരം', 'അങ്ങാടി', 'കരിമ്പന', 'മൂർഖൻ', 'മാമാങ്കം', 'ചാകര', 'ഇടിമുഴക്കം' തുടങ്ങിയ ചിത്രങ്ങളിലെ വേഷങ്ങൾ ഏറെ ശ്രദ്ധിക്കപ്പെട്ടു. സംഘട്ടന രംഗങ്ങളിൽ ഡ്യൂപ്പുകളെ ഉപയോഗിക്കാതെയായിരുന്നു ജയന്റെ പ്രകടനം.

സാഹസികതയോടുള്ള അതിരുകടന്ന പ്രണയമാണ് ജയന്റെ ജീവിതത്തിന് തിരശ്ശീല വീഴ്ത്തിയത്. 1980 നവംബർ 16-ന് 'കോളിളക്കം' എന്ന സിനിമയുടെ ചിത്രീകരണത്തിനിടെ ഹെലികോപ്റ്റർ അപകടത്തിൽപ്പെട്ട് നാൽപ്പത്തിയൊന്നാം വയസ്സിലാണ് ജയന്റെ മരണം സംഭവിച്ചത്. 

എട്ടുവർഷങ്ങൾ മാത്രം നീണ്ട കരിയറിൽ നൂറ്റിയമ്പതിലേറെ ചിത്രങ്ങളിൽ ജയൻ വേഷമിട്ടു. വിടവാങ്ങി 45 വർഷം പിന്നിടുമ്പോഴും സാഹസികതയുടെ പ്രതീകമായി ജയൻ ഇന്നും ജനഹൃദയങ്ങളിൽ ജീവിക്കുകയാണ്.

മലയാള സിനിമയിലെ നിത്യവസന്തമായ ജയനെക്കുറിച്ചുള്ള ഓർമ്മകൾ പങ്കുവെക്കൂ. ഈ വാർത്ത ഷെയർ ചെയ്യുക.

Article Summary: Today marks the 45th death anniversary of Jayan, Malayalam cinema's first action hero, who died in a helicopter crash in 1980.

#Jayan #Jayan45thAnniversary #MalayalamCinema #ActionHero #Kolilakkam #Kerala