തിയേറ്ററുകളിൽ നിന്ന് സിനിമകൾ ചോരുന്നു; എമ്പുരാൻ കേസ് പുതിയ വഴിത്തിരിവിൽ

വളപട്ടണം: (KVARTHA) പൃഥ്വിരാജ് സുകുമാരൻ സംവിധാനം ചെയ്ത മോഹൻലാൽ ചിത്രം 'എമ്പുരാന്റെ' വ്യാജപതിപ്പ് പ്രചരിപ്പിച്ചതിന് പിന്നിൽ വൻ റാക്കറ്റാണെന്ന് വളപട്ടണം പോലീസ് നടത്തിയ അന്വേഷണത്തിൽ വ്യക്തമായി. കഴിഞ്ഞ മാർച്ച് 27-നാണ് ചിത്രം തിയേറ്ററുകളിൽ റിലീസ് ചെയ്തത്. 

റിലീസിനൊപ്പം തന്നെ സിനിമയുടെ വ്യാജപതിപ്പും ചോർന്നിരുന്നു. തുടർന്ന്, നിർമ്മാതാക്കൾ പോലീസിൽ പരാതി നൽകുകയായിരുന്നു. വളപട്ടണം പോലീസിന്റെ അന്വേഷണത്തിലാണ് വ്യാജപതിപ്പ് പ്രചരിപ്പിച്ചതിന് പിന്നിൽ വലിയ സംഘമെന്ന് കണ്ടെത്തിയത്.

വളപട്ടണം പോലീസ് സ്റ്റേഷൻ പരിധിയിലെ പാപ്പിനിശ്ശേരിയിലുള്ള തംബുരു കമ്മ്യൂണിക്കേഷൻസ് എന്ന സ്ഥാപനത്തിൽ നിന്നാണ് സിനിമയുടെ വ്യാജപതിപ്പ് പിടിച്ചെടുത്തത്. സംഭവത്തിൽ 'എമ്പുരാനിലെ' നായകനായ മോഹൻലാലിന്റെയും സംവിധായകൻ പൃഥ്വിരാജിന്റെയും നിർമ്മാതാവ് ആന്റണി പെരുമ്പാവൂരിന്റെയും മൊഴി പോലീസ് രേഖപ്പെടുത്തിയിരുന്നു. 

തിയേറ്ററുകളിൽ നിന്ന് തന്നെയാണ് സിനിമ ചോർന്നതെന്നാണ് അന്വേഷണസംഘത്തിന്റെ പ്രാഥമിക നിഗമനം. 'എമ്പുരാൻ' കൂടാതെ, ഈ അടുത്ത കാലത്തിറങ്ങിയ പല മലയാള സിനിമകളുടെയും വ്യാജപതിപ്പുകൾ തിയേറ്ററിൽ റിലീസ് ചെയ്ത് മണിക്കൂറുകൾക്കുള്ളിൽ സമൂഹമാധ്യമങ്ങളിൽ ചോർന്നിരുന്നു.

മാർച്ച് 27-ന് തിയേറ്ററിലെത്തിയ ചിത്രം ഏറെ വിവാദങ്ങളിൽപ്പെടുകയും തുടർന്ന് റീ-സെൻസറിംഗിന് വിധേയമാവുകയും ചെയ്തിരുന്നു. ആശിർവാദ് സിനിമാസ്, ലൈക്ക പ്രൊഡക്ഷൻസ്, ശ്രീ ഗോകുലം മൂവീസ് എന്നിവയുടെ ബാനറിൽ ആന്റണി പെരുമ്പാവൂർ, സുഭാസ്‌കരൻ, ഗോകുലം ഗോപാലൻ എന്നിവർ ചേർന്നാണ് 'എമ്പുരാൻ' നിർമ്മിച്ചത്. 

വെറും 15 രൂപയ്ക്കാണ് തംബുരു കമ്മ്യൂണിക്കേഷൻസിൽ നിന്ന് പെൻഡ്രൈവിൽ വ്യാജപതിപ്പ് കോപ്പി ചെയ്ത് നൽകിയിരുന്നത്. ഈ കേസിൽ ജീവനക്കാരിയായ സ്ത്രീ ഉൾപ്പെടെ രണ്ടുപേർ അറസ്റ്റിലായിട്ടുണ്ട്. 

പുതിയ മലയാള ചിത്രങ്ങൾ ചോർത്തുന്നതിന് പിന്നിൽ മലയാളികൾ ഉൾപ്പെടെയുള്ളവരുടെ റാക്കറ്റാണെന്നാണ് പോലീസ് പറയുന്നത്. തിയേറ്ററിൽ നിന്ന് മൊബൈൽ ക്യാമറ ഉപയോഗിച്ച് ചിത്രീകരിച്ചാണ് സിനിമയുടെ മുഴുവൻ ഭാഗങ്ങളും ആവശ്യക്കാർക്ക് കോപ്പി ചെയ്തു നൽകുന്നത്. എന്നാൽ, ഏത് തിയേറ്ററിൽ നിന്നാണ് ചിത്രം പകർത്തിയതെന്ന് പോലീസിന് ഇതുവരെ വ്യക്തമായിട്ടില്ല.

എമ്പുരാൻ വ്യാജപ്പതിപ്പ് കേസിനെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Embraan piracy case uncovers large racket behind theater leaks.

#Embraan #Piracy #Mollywood #KeralaPolice #FilmIndustry #TheaterLeaks