മുംബൈ: (KVARTHA) പ്രമുഖ ബ്രിട്ടീഷ് ബാൻഡ് കോൾഡ് പ്ലേ ഇന്ത്യയിൽ നടത്തുന്ന സംഗീത പരിപാടിക്കായി കാത്തിരിക്കുകയാണ് ലക്ഷങ്ങൾ. എന്നാൽ, ടിക്കറ്റ് ബുക്ക് ചെയ്യാൻ കഴിയാതെ വന്നതോടെ പലരും  നിരാശയിലാണ്. 2025 ജനുവരിയിൽ മുംബൈ ഡി വൈ പാട്ടീൽ സ്റ്റേഡിയത്തിൽ നടക്കാനിരിക്കുന്ന കോൾഡ്‌പ്ലെയുടെ പരിപാടിക്കായി ലഭ്യമായ 150,000 ടിക്കറ്റുകളിലൊന്ന് നേടാൻ കഴിഞ്ഞ ഞായറാഴ്ച 13 ദശലക്ഷത്തിലധികം ആളുകളാണ് ബുക്ക് മൈ ഷോ വെബ്സൈറ്റിൽ ഒരേസമയം എത്തിച്ചേർന്നത്.

ഒരു മണിക്കൂറിനുള്ളിൽ ടിക്കറ്റുകൾ വിറ്റുപോയി. ഈ സംഭവം സോഷ്യൽ മീഡിയയിൽ അടക്കം വലിയ ചർച്ചയായി. നീണ്ട ക്യൂ, സൈറ്റ് ക്രാഷ്, ടിക്കറ്റിന്റെ വില വർധന എന്നിവയെക്കുറിച്ച് ആളുകൾ പരാതിപ്പെട്ടു. ചിലർ, ഔദ്യോഗിക സൈറ്റ് ടിക്കറ്റ് പുറത്തിറക്കുന്നതിന് മുമ്പ് മറ്റ് ചില സൈറ്റുകളിൽ ടിക്കറ്റ് വിൽപ്പന നടന്നുവെന്നും ആരോപിച്ചു. 

ഇതിനിടയിൽ ടിക്കറ്റ് റീസെയിൽ ബ്രാൻഡായ വയാഗോഗോ എന്ന കമ്പനി പരിപാടിയുടെ ടിക്കറ്റുകൾ വളരെ ഉയർന്ന വിലയ്ക്ക് വീണ്ടും വിൽക്കുകയാണ്. 12,500 രൂപയ്ക്കുള്ള ഒരു കോൾഡ്‌പ്ലേ കൺസേർട്ട് ടിക്കറ്റ് ഇവർ 336,000 രൂപയ്ക്കാണ് വിറ്റത്. കൂടാതെ, തുടക്കത്തിൽ 6,450 രൂപ വിലയുള്ള ചില ടിക്കറ്റുകൾ 50,000 രൂപയ്ക്ക്  വരെ വീണ്ടും വിൽക്കുന്നു. 

അതേസമയം, കോൾഡ്‌പ്ലേയുടെ ഇന്ത്യയിലെ ഷോകളുടെ ടിക്കറ്റുകൾ വിയാഗോ, ഗിഗ്‌സ്‌ബെർഗ് തുടങ്ങിയ ഏതെങ്കിലും ടിക്കറ്റ് വിൽപ്പന വെബ്‌സൈറ്റുകളിലോ മറ്റേതെങ്കിലും മൂന്നാം കക്ഷി വ്യക്തികളിലൂടെയോ വിൽക്കുന്നില്ലെന്ന് ബുക്ക് മൈ ഷോ വ്യക്തമാക്കി. ഇക്കാര്യത്തിൽ തങ്ങൾ പോലീസ് അധികാരികൾക്ക് പരാതി നൽകിയിട്ടുണ്ടെന്നും ബുക്ക് മൈ ഷോ ഇൻസ്റ്റാഗ്രാം പോസ്റ്റിൽ പറഞ്ഞു.

പഞ്ചാബി സൂപ്പർസ്റ്റാർ ദിൽജിത് ദോസഞ്ച് ഒക്ടോബർ 26 മുതൽ ഡിസംബർ 29 വരെ ഇന്ത്യയിലെ വിവിധ നഗരങ്ങളിൽ സംഗീത പ്രകടനംപരിപാടികൾ നടത്തുന്നുണ്ട്. ഡൽഹി, ബെംഗളൂരു, മുംബൈ തുടങ്ങിയ നഗരങ്ങളിൽ അദ്ദേഹത്തെ നേരിട്ട് കാണാനുള്ള അവസരമാണിത്. ഈ പരിപാടിയുടെ ടിക്കറ്റുകളും ഇപ്പോൾ ലഭ്യമല്ലാത്ത അവസ്ഥയിലാണ്. 

സൊമാറ്റോയുടെ ടിക്കറ്റ് ബുക്കിംഗ് പ്ലാറ്റ്‌ഫോമായ സൊമാറ്റോ ലൈവ്, ഗായകൻ ദിൽജിത് ദോസാഞ്ചിന്റെ സംഗീത പരിപാടിയുടെ ടിക്കറ്റുകൾ വിൽപന നടത്തിയിരുന്നു. എന്നാൽ, മറ്റൊരു ടിക്കറ്റ് ബുക്കിംഗ് കമ്പനിയായ വയാഗോഗോയും ഇതിന്റെ ടിക്കറ്റുകൾ വിൽക്കാൻ തുടങ്ങിയപ്പോൾ പ്രശ്‌നമുണ്ടായി. ഇതേത്തുടർന്ന്, സൊമാറ്റോ ലൈവ് വയാഗോഗോയ്ക്ക് വകീൽ നോട്ടീസ് അയച്ചതായി റിപ്പോർട്ടുകൾ പറയുന്നു. ദിൽജിത് ദോസാഞ്ചിന്റെ പരിപാടിയുടെ ടിക്കറ്റുകൾ വിൽക്കാനുള്ള അവകാശം തങ്ങൾക്കു മാത്രമേ ഉള്ളൂ എന്നും വയാഗോഗോ ഇത് ലംഘിച്ചു എന്നുമാണ് സൊമാറ്റോ ലൈവ് ആരോപിക്കുന്നത്.

സൊമാറ്റോ ലൈവ് തങ്ങളുടെ ടിക്കറ്റുകൾ മറ്റുള്ളവർ അനധികൃതമായി വിൽക്കുന്നത് തടയാൻ ശ്രമിക്കുകയാണ്. ഇതിനായി അവർ പല സെക്കൻഡറി ടിക്കറ്റ് വിൽപ്പന വെബ്സൈറ്റുകളിൽ ഇത്തരം വിൽപ്പന നടത്തുന്നവർക്കെതിരെ സൈബർ സെല്ലിൽ പരാതികൾ നൽകിയിട്ടുണ്ടെന്നും വിവരമുണ്ട്.
 

#Coldplay #MumbaiConcert #TicketSales #LiveMusic #DiljitDosanjh #FanDisappointment