കലാഭവന്‍ മണിക്കെതിരെ കേസ്

തൃശൂര്‍: വനപാലകരുടെ മര്‍ദിച്ചുവെന്ന പരാതിയില്‍ സിനിമാ താരം കലാഭവന്‍ മണിക്കെതിരെ പോലീസ് കേസെടുത്തു. വനംവകുപ്പിലെ ഡപ്യൂട്ടി റേഞ്ച് ഓഫിസര്‍ യു.ജി രമേശന്‍, ഫോറസ്റ്റര്‍ രവീന്ദ്രന്‍ എന്നിവരെ രാത്രികാല വാഹന പരിശോധന നടത്തുന്നതിനിടെ കലാഭവന്‍ മണി മര്‍ദിച്ചതായി ആതിരപ്പള്ളി പോലീസില്‍ പരാതി നല്‍കിയിരുന്നു. ഇതിന്റെ അടിസ്ഥാനത്തില്‍ ജാമ്യമില്ലാ വകുപ്പുകള്‍ ചുമത്തിയാണ് മണിക്കെതിരെ
കേസെടുത്തത്. ചൊവ്വാഴ്ച പത്തരയോടെ അതിരപ്പിള്ളിക്കു സമീപമായിരുന്നു സംഭവം.

മര്‍ദനമേറ്റ രണ്ട് ഉദ്യോഗസ്ഥരും ചാലക്കുടി താലൂക്ക് ആശുപത്രിയില്‍ ചികിത്സയിലാണ്. രാത്രിയില്‍ പെട്രോളിംങ് നടത്തുകയായിരുന്ന വനപാലകര്‍ അതുവഴി വന്ന കലാഭവന്‍ മണിയും സുഹൃത്തുക്കളും സഞ്ചരിച്ച വാഹനവും പരിശോധനയ്ക്ക് വിധേയമാക്കുന്നതിനിടെ വാഹനം മുന്നോട്ട് ഓടിച്ചുപോവുകയായിരുന്നു. തുടര്‍ന്ന് 20 മിനിറ്റിനു ശേഷം അമിതവേഗത്തില്‍ മണിയുടെ കാര്‍ തിരിച്ചെത്തി. ഇതിനുശേഷം മണിയും സുഹൃത്തും ചേര്‍ന്നു മര്‍ദിക്കുകയുമായിരുന്നുവെന്നാണ് പരാതിയില്‍ പറയുന്നത്.

അതിനിടെ കലാഭവന്‍ മണിയും സുഹൃത്തും ചാലക്കുടി ആശുപത്രിയില്‍ ചികിത്സതേടി. വനപാലകര്‍ അകാരണമായി മര്‍ദിക്കാന്‍ ശ്രമിച്ചുവെന്ന് ഇരുവരും പറഞ്ഞു. ഇതോടൊപ്പം സുഹൃത്തിന്റെ ഭാര്യ വനംവകുപ്പ് ഉദ്യോഗസ്ഥര്‍ക്കെതിരെ പാരാതി നല്‍കിയിട്ടുണ്ട്. ഈ പരാതിയില്‍ വനംവകുപ്പ് ഉദ്യോഗസ്ഥര്‍ക്കെതിരെയും പൊലീസ് കേസെടുത്തു.