ചെന്നൈ: (KVARTHA) ശാരീരിക അസ്വസ്ഥതകളെ തുടർന്ന് ചെന്നൈയിലെ ആശുപത്രിയിൽ പ്രവേശിപ്പിച്ച സംഗീത സംവിധായകൻ എ ആർ റഹ്‌മാൻ ആശുപത്രി വിട്ടു. ലണ്ടനിൽ നിന്ന് മടങ്ങിയെത്തിയ റഹ്‌മാന് നിർജലീകരണം അനുഭവപ്പെട്ടതിനെ തുടർന്നാണ് ആശുപത്രിയിൽ പ്രവേശിപ്പിച്ചത്. കഴുത്തിൽ അസ്വസ്ഥത അനുഭവപ്പെട്ടതായും അദ്ദേഹത്തിന്റെ ടീമിലെ ഒരംഗം പറഞ്ഞു. റഹ്‌മാന്റെ ആരോഗ്യനില തൃപ്തികരമാണെന്ന് ആശുപത്രി വൃത്തങ്ങൾ അറിയിച്ചു.

അതേസമയം, എ.ആർ. റഹ്‌മാന്റെ മുൻ ഭാര്യയെന്ന് പരാമർശിക്കരുതെന്ന അഭ്യർഥനയുമായി സൈറ ബാനു രംഗത്തെത്തി. തങ്ങൾ വിവാഹമോചിതരായിട്ടില്ലെന്നും വേർപിരിയുക മാത്രമാണ് ചെയ്തതെന്നും സൈറ ബാനു പുറത്തിറക്കിയ പ്രസ്താവനയിൽ വ്യക്തമാക്കി. ആരോഗ്യപ്രശ്‌നങ്ങളെത്തുടർന്ന് എ.ആർ. റഹ്‌മാനെ ആശുപത്രിയിൽ പ്രവേശിപ്പിച്ചതിന് പിന്നാലെയാണ് സൈറ ബാനു പുതിയ പ്രസ്‌താവന പുറത്തിറക്കിയത്.
തന്റെ ആരോഗ്യപ്രശ്‌നങ്ങളാണ് എ.ആർ. റഹ്‌മാനുമായുള്ള ബന്ധം പിരിയാൻ കാരണമെന്നാണ് സൈറ ബാനു പറഞ്ഞത്. 

ആശുപത്രിയിൽ കഴിയുന്ന എ.ആർ. റഹ്‌മാൻ എത്രയുംപെട്ടെന്ന് സുഖം പ്രാപിക്കട്ടെയെന്നും അവർ ആശംസിച്ചു. അടുത്തിടെ സൈറ ബാനുവും ആരോഗ്യപ്രശ്‌നങ്ങളെത്തുടർന്ന് ചികിത്സയിലായിരുന്നു. സൈറ ബാനുവിനെ അടിയന്തര ശസ്ത്രക്രിയയ്ക്കും വിധേയയാക്കിയിരുന്നു. ഈ ഘട്ടത്തിൽ പിന്തുണ നൽകിയ എ.ആർ. റഹ്‌മാന് സൈറ ബാനു പിന്നീട് നന്ദി അറിയിക്കുകയുംചെയ്തിരുന്നു. രണ്ടു തവണ ഓസ്‌കാർ, ഗ്രാമി പുരസ്‌കാരങ്ങൾ നേടിയ സംഗീത സംവിധായകനാണ് എ.ആർ. റഹ്‌മാൻ. റോജ, ദിൽ സേ, എന്തിരൻ, സ്ലംഡോഗ് മില്യണയർ തുടങ്ങിയ ചിത്രങ്ങളിലൂടെ അദ്ദേഹം പ്രശസ്തനാണ്.

ഈ വാർത്ത എല്ലാവരുമായി പങ്കുവെക്കൂ. അഭിപ്രായങ്ങൾ രേഖപ്പെടുത്തുമല്ലോ.

A.R. Rahman was discharged from the hospital after being admitted for dehydration. Saira Banu requested not to be referred to as his ex-wife, stating they are separated, not divorced. She also wished for his speedy recovery.

#ARRahman, #SairaBanu, #HospitalDischarge, #CelebrityNews, #Chennai, #MusicComposer