ചെന്നൈ: (KVARTHA) നടനും ടിവികെ നേതാവുമായ വിജയ്‌യുടെ വീട്ടിൽ വൻ സുരക്ഷാ വീഴ്ച. വീടിൻ്റെ ടെറസിൽ രണ്ട് ദിവസത്തോളം ഒളിച്ചിരുന്ന യുവാവ്, വ്യായാമം ചെയ്യാനെത്തിയ നടനെ കെട്ടിപ്പിടിച്ചു. വിജയ്‌യുടെ നീലാങ്കരയിലെ വീട്ടിലാണ് സംഭവം.

വീടിന്റെ പിന്‍ഭാഗത്തെ മതിൽ ചാടിയാണ് മാനസികാസ്വാസ്ഥ്യത്തിന് ചികിത്സയിലുള്ള അരുൺ (24) എന്ന യുവാവ് അകത്ത് കടന്നത്. ഭക്ഷണം പോലും കഴിക്കാതെയാണ് ഇയാൾ രണ്ട് ദിവസമായി ടെറസിൽ കഴിഞ്ഞത്. വൈ കാറ്റഗറി (Y-Category) സുരക്ഷയും നിരീക്ഷണ ക്യാമറകളും ഉള്ള വീട്ടിൽ യുവാവ് നുഴഞ്ഞുകയറിയത് സുരക്ഷാ ജീവനക്കാരെ ഞെട്ടിച്ചു.

ആരാധകനെ പോലീസിന് കൈമാറി

വ്യായാമം ചെയ്യാനായി ടെറസിലെത്തിയ നടൻ വിജയ്‌യെ അരുൺ കെട്ടിപ്പിടിക്കുകയായിരുന്നു. ആരാധകനാണെന്ന് മനസ്സിലാക്കിയ വിജയ് അനുനയിപ്പിച്ച് താഴെയെത്തിച്ച് പോലീസിന് കൈമാറി. മാനസികാസ്വാസ്ഥ്യത്തിന് ചികിത്സയിലായിരുന്ന അരുൺ എന്ന യുവാവിനെ പിന്നീട് പോലീസ് കസ്റ്റഡിയിലെടുത്തു. സംഭവത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്.

രാഷ്ട്രീയ പര്യടനം ശനിയാഴ്ച ആരംഭിക്കും

സംഭവത്തിന് പിന്നാലെ വിജയ്‌യുടെ രാഷ്ട്രീയ പര്യടനം ശനിയാഴ്ച ആരംഭിക്കും. നാഗപട്ടണം, തിരുവാരൂർ ജില്ലകളിലാണ് ശനിയാഴ്ച പര്യടനം നടക്കുന്നത്. രാവിലെ 11ന് നാഗപട്ടണം പുത്തൂർ അണ്ണാ സ്റ്റാച്യു ജംക്ഷൻ്റെ സമീപത്തും വൈകിട്ട് മൂന്നിന് തിരുവാരൂർ നഗരസഭാ ഓഫീസിന് സമീപം സൗത്ത് സ്ട്രീറ്റിലും പരിപാടി നടക്കും. തിരുച്ചിറപ്പള്ളിയിൽ നടന്ന സംഭവങ്ങളുടെ പശ്ചാത്തലത്തിൽ പോലീസ് കർശന നിർദേശങ്ങൾ നൽകിയിട്ടുണ്ട്. 35 മിനിറ്റ് മാത്രമാണ് പരിപാടി നടത്താൻ അനുവാദം. പൊതുമുതൽ നശിപ്പിച്ചാൽ കേസെടുത്ത് നഷ്ടപരിഹാരം ഈടാക്കുമെന്നും പോലീസ് അറിയിച്ചിട്ടുണ്ട്. അതേസമയം, പാർട്ടി പ്രവർത്തകർക്കുള്ള 12 നിർദേശങ്ങൾ ടിവികെയും പുറത്തിറക്കിയിട്ടുണ്ട്.
 

നടൻ വിജയ്യുടെ വീട്ടിൽ സംഭവിച്ച സുരക്ഷാ വീഴ്ചയെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക.

Article Summary: Actor Vijay's house suffers security breach by a fan.

#Vijay #ThalapathyVijay #TVK #Chennai #SecurityBreach #FanMoment