മലപ്പുറം: (KVARTHA) സ്കൂളുകളിൽ സൂംബ ഡാൻസ് പരിശീലിപ്പിക്കുന്നതിനെതിരെ സമസ്ത കേരള സുന്നി യുവജന സംഘം (എസ്.വൈ.എസ്) രംഗത്ത്. സൂംബ ഡാൻസ് ധാർമിക മൂല്യങ്ങൾക്ക് ക്ഷതമേൽപ്പിക്കുമെന്നാണ് എസ്.വൈ.എസ് നേതാവ് അബ്ദുസമദ് പൂക്കോട്ടൂർ അഭിപ്രായപ്പെട്ടത്. രക്ഷിതാക്കൾ ഈ വിഷയത്തിൽ ഉണർന്ന് ചിന്തിക്കണമെന്നും അദ്ദേഹം ആവശ്യപ്പെട്ടു.

വിവിധ നൃത്ത രൂപങ്ങളുടെയും ഫിറ്റ്‌നസ് വ്യായാമങ്ങളുടെയും സമന്വയമാണ് സൂംബ ഡാൻസ്. സംഗീതത്തിന്റെ അകമ്പടിയോടെയുള്ള ഈ വർക്കൗട്ട്, സാധാരണ വ്യായാമങ്ങളിൽ നിന്ന് വ്യത്യസ്തമായി മടുപ്പില്ലാതെയും ആസ്വാദ്യകരമായും ചെയ്യാം എന്ന പ്രത്യേകതയുണ്ട്. സാധാരണയായി ഗ്രൂപ്പുകളായിട്ടാണ് സൂംബ നൃത്തം ചെയ്യുന്നത്.

സംസ്ഥാനത്ത് ലഹരി വിരുദ്ധ പ്രവർത്തനങ്ങൾ ശക്തമാക്കുന്നതിന്റെ ഭാഗമായി മുഖ്യമന്ത്രി വിളിച്ചുചേർത്ത ഉന്നതതല യോഗത്തിലാണ് സ്കൂൾ കുട്ടികളെ സൂംബ ഡാൻസ് പരിശീലിപ്പിക്കാനും ഇതിനുള്ള സൗകര്യങ്ങൾ സ്കൂളുകളിൽ ഒരുക്കാനും നിർദേശം നൽകിയത്. കുട്ടികളിലെ മാനസിക സമ്മർദം കുറയ്ക്കുക എന്ന ലക്ഷ്യത്തോടെയാണ് വിദ്യാഭ്യാസ വകുപ്പ് സൂംബ പദ്ധതിക്ക് തുടക്കമിട്ടത്. കുട്ടികളുടെ കായികവും മാനസികവുമായ ഉല്ലാസത്തിന് സൂംബ സഹായകമാകുമെന്നും, ഇത് കുട്ടികൾക്ക് സ്കൂളിൽ നിന്ന് ഉന്മേഷത്തോടെ മടങ്ങാൻ സഹായിക്കുമെന്നും അതുവഴി ലഹരി സംഘങ്ങൾ അവരെ സ്വാധീനിക്കുന്നത് തടയാമെന്നും മുഖ്യമന്ത്രി പിണറായി വിജയൻ മുൻപ് പറഞ്ഞിരുന്നു. കഴിഞ്ഞ മാസം സംസ്ഥാനത്ത് മെഗാ സൂംബ പരിപാടിയും സംഘടിപ്പിച്ചിരുന്നു.

പുതിയ അധ്യയന വർഷം മുതൽ സ്കൂളുകളിൽ ഈ പദ്ധതി നടപ്പാക്കുന്നതിനാവശ്യമായ മൊഡ്യൂൾ തയ്യാറാക്കാൻ വിദ്യാഭ്യാസ മന്ത്രി എസ്.സി.ഇ.ആർ.ടിക്ക് നിർദേശം നൽകിയിരുന്നു. ഇതിന്റെ അടിസ്ഥാനത്തിലാണ് സൂംബ ഡാൻസ് പാഠ്യപദ്ധതിയിൽ ഉൾപ്പെടുത്തിയത്. സ്കൂളുകളിൽ കുട്ടികളെ സൂംബ ഡാൻസ് പഠിപ്പിക്കുന്നതിനായി അധ്യാപകർക്ക് പ്രത്യേക പരിശീലനവും നൽകി. പല സ്കൂളുകളിലും പി.ടി.എയുടെ സഹകരണത്തോടെ സൂംബ പരിശീലനം ഇതിനോടകം ആരംഭിച്ചിട്ടുണ്ട്.

ഈ വിഷയത്തിൽ നിങ്ങളുടെ അഭിപ്രായമെന്ത്? നിലപാട് കമന്റ് ചെയ്യൂ. കൂടുതൽ ആളുകളിലേക്ക് എത്താൻ വാർത്ത ഷെയർ ചെയ്യൂ.

Article Summary: Samastha Youth Wing opposes Zumba dance in Kerala schools due to moral concerns.

#KeralaNews #ZumbaControversy #Samastha #SchoolEducation #MoralValues #KeralaPolitics