ന്യൂഡല്‍ഹി: (KVARTHA) ഉന്നത വിദ്യാഭ്യാസ രംഗത്തെ നേതൃസ്ഥാനങ്ങളിലേക്കുള്ള നിയമന പ്രക്രിയയില്‍ വലിയ മാറ്റങ്ങള്‍ വരുത്തി യൂണിവേഴ്‌സിറ്റി ഗ്രാന്റ്‌സ് കമ്മീഷന്‍ (യുജിസി) പുതിയ നിയമങ്ങള്‍ പുറത്തിറക്കി. ഇത് സംസ്ഥാനങ്ങളിലെ ഗവര്‍ണര്‍മാര്‍ക്ക് വൈസ് ചാന്‍സലര്‍മാരെ നിയമിക്കുന്നതില്‍ കൂടുതല്‍ അധികാരം നല്‍കുകയും വ്യവസായ വിദഗ്ധര്‍ക്കും പൊതുമേഖലാ പ്രമുഖര്‍ക്കും ഈ സ്ഥാനത്തേക്ക് അപേക്ഷിക്കാനുള്ള അവസരം തുറന്നുകൊടുക്കുകയും ചെയ്യുന്നു. അക്കാദമിക് രംഗത്തുള്ളവരെ മാത്രം തിരഞ്ഞെടുക്കുന്ന രീതിയില്‍ നിന്നുള്ള ഒരു മാറ്റമാണിത്.

പുതിയ കരട് നിയമങ്ങള്‍ അംഗീകരിക്കുകയാണെങ്കില്‍, ചാന്‍സലര്‍ക്ക് വൈസ് ചാന്‍സലര്‍ തിരഞ്ഞെടുപ്പില്‍ കൂടുതല്‍ നിയന്ത്രണം ലഭിക്കും. തമിഴ്നാട്, പശ്ചിമ ബംഗാള്‍, കേരളം തുടങ്ങിയ പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങളില്‍ ഇത് വലിയ പ്രത്യാഘാതങ്ങള്‍ സൃഷ്ടിക്കാന്‍ സാധ്യതയുണ്ട്. ഈ സംസ്ഥാനങ്ങളില്‍ സര്‍ക്കാരും ഗവര്‍ണറും (സംസ്ഥാന സര്‍വകലാശാലകളുടെ ചാന്‍സലര്‍) ഉന്നത അക്കാദമിക് നിയമന പ്രക്രിയയെച്ചൊല്ലി തര്‍ക്കത്തിലാണ്. 

പുതിയ കരട് നിയമങ്ങള്‍, കരാര്‍ അടിസ്ഥാനത്തിലുള്ള അധ്യാപക നിയമനങ്ങളുടെ പരിധി എടുത്തു കളഞ്ഞു. 2018-ലെ നിയമങ്ങള്‍ ഒരു സ്ഥാപനത്തിലെ മൊത്തം ഫാക്കല്‍റ്റി സ്ഥാനങ്ങളുടെ 10 ശതമാനമായി ഇത്തരം നിയമനങ്ങള്‍ പരിമിതപ്പെടുത്തിയിരുന്നു. വൈസ് ചാന്‍സലര്‍ നിയമനത്തിനുള്ള സേര്‍ച്ച് കമ്മിറ്റി അധ്യക്ഷനെയും ഇനി ഗവര്‍ണര്‍ക്ക് നിര്‍ദേശിക്കാം. വൈസ് ചാന്‍സലര്‍ സ്ഥാനത്തേക്ക് അഞ്ച് പേരുകള്‍ സെര്‍ച്ച് കമ്മിറ്റിക്ക് ചാന്‍സലറുടെ പരിഗണനയ്ക്ക് വിടാം. ഈ പേരുകളില്‍ ഒരാളെ ചാന്‍സലര്‍ക്ക് വിസിയായി നിയമിക്കാം. 

പുതിയ ചട്ടങ്ങള്‍ പ്രകാരം സംസ്ഥാനങ്ങളിലെ ഗവര്‍ണര്‍മാര്‍ക്ക്, സംസ്ഥാന സര്‍വകലാശാലകളുടെ ചാന്‍സലര്‍ എന്ന നിലയില്‍, തിരഞ്ഞെടുപ്പ് പ്രക്രിയയില്‍ കൂടുതല്‍ നിയന്ത്രണവും വിസി നിയമനത്തില്‍ അന്തിമ തീരുമാനമെടുക്കാനുള്ള അധികാരവും ഉണ്ട്. നിയമങ്ങള്‍ നടപ്പാക്കാത്ത പക്ഷം സ്ഥാപനത്തെ യുജിസി പദ്ധതികളില്‍ പങ്കെടുക്കുന്നതില്‍ നിന്നും ഡിഗ്രി പ്രോഗ്രാമുകള്‍ നടത്തുന്നതില്‍ നിന്നും വിലക്കിയേക്കാമെന്നും കരട് മാര്‍ഗനിര്‍ദേശങ്ങളില്‍ മുന്നറിയിപ്പ് നല്‍കുന്നു.

സര്‍വകലാശാല വൈസ് ചാന്‍സലര്‍മാര്‍ പ്രൊഫസര്‍മാര്‍ ആകണമെന്നില്ല. വ്യവസായം, പൊതുനയം, പൊതുഭരണം, പൊതുമേഖലാ സ്ഥാപനങ്ങള്‍ എന്നിവിടങ്ങളില്‍ ഉയര്‍ന്ന തലങ്ങളില്‍ പ്രവര്‍ത്തിക്കുന്ന വ്യക്തികള്‍ക്കും ഈ സ്ഥാനത്തേക്ക് അപേക്ഷിക്കാം.

#UGC #ViceChancellor #highereducation #India #Governor #university #educationpolicy #academicappointment