തിരുവനന്തപുരം: (KVARTHA) സംസ്ഥാനത്തെ സർക്കാർ, എയ്ഡഡ്, അംഗീകൃത അൺഎയ്ഡഡ് ഹൈസ്‌കൂളുകളിൽ വെള്ളിയാഴ്ച ഒഴികെയുള്ള പ്രവൃത്തിദിനങ്ങളിൽ അര മണിക്കൂർ അധിക പഠനസമയം അനുവദിച്ച് പൊതുവിദ്യാഭ്യാസ ഡയറക്ടർ ഉത്തരവിറക്കി. 8, 9, 10 ക്ലാസുകൾക്ക് 220 പ്രവൃത്തി ദിനങ്ങളിൽ 1000 ബോധനമണിക്കൂറുകൾ ഉറപ്പാക്കുന്നതിനായി, രാവിലെയും വൈകിട്ടുമായി 15 മിനിറ്റ് വീതമാണ് സമയം കൂട്ടിയിരിക്കുന്നത്. ഇതോടെ പുതിയ പ്രവൃത്തി സമയം രാവിലെ 9.45 മുതൽ വൈകിട്ട് 4.15 വരെയായി.

പുതിയ സമയക്രമം ഉൾക്കൊള്ളിച്ച് തയ്യാറാക്കിയ ടൈംടേബിൾ ഉടൻതന്നെ പ്രാബല്യത്തിൽ വരുമെന്ന് ഉത്തരവിൽ വ്യക്തമാക്കുന്നു. രാവിലെ 9.45-നാണ് ക്ലാസുകൾ ആരംഭിക്കുന്നത്. ആദ്യത്തെ രണ്ട് പീരിയഡുകൾക്ക് 45 മിനിറ്റ് വീതവും, തുടർന്ന് 10 മിനിറ്റ് ഇടവേളയും ഉണ്ടാകും. പിന്നീട് 40 മിനിറ്റുള്ള രണ്ട് പീരിയഡുകൾക്ക് ശേഷം ഉച്ചഭക്ഷണത്തിനായി 60 മിനിറ്റ് ഇടവേള അനുവദിച്ചിട്ടുണ്ട്. ഉച്ചയ്ക്ക് 1.45-ന് ആരംഭിച്ച് 40 മിനിറ്റുള്ള രണ്ട് പീരിയഡുകൾക്ക് ശേഷം 5 മിനിറ്റ് ഇടവേളയും, തുടർന്ന് 35, 30 മിനിറ്റുള്ള രണ്ട് പീരിയഡുകളോടെ 4.15-ന് ക്ലാസുകൾ അവസാനിക്കുന്ന ക്രമീകരണമാണ് പുതിയ ടൈംടേബിളിൽ ഉള്ളത്.

കൂടുതൽ പഠനസമയം ഉറപ്പാക്കുന്നതിന്റെ ഭാഗമായി 5 മുതൽ 7 വരെ ക്ലാസുകൾക്ക് (യുപി വിഭാഗം) തുടർച്ചയായി ആറ് പ്രവൃത്തിദിനങ്ങൾ വരാത്ത രീതിയിൽ രണ്ട് ശനിയാഴ്ചകളും, 8 മുതൽ 10 വരെ ക്ലാസുകൾക്ക് തുടർച്ചയായി ആറ് പ്രവൃത്തിദിനം വരാത്ത രീതിയിൽ ആറ് ശനിയാഴ്ചകളും പ്രവൃത്തിദിനമാക്കിയിട്ടുണ്ട്. 2025-26 അധ്യയനവർഷം ഒന്ന് മുതൽ നാല് വരെയുള്ള ക്ലാസുകൾക്ക് അധിക പ്രവൃത്തിദിനങ്ങൾ ഇല്ല. 5-7 ക്ലാസുകൾക്ക് 2025 ജൂലൈ 26, ഒക്ടോബർ 25 എന്നീ ശനിയാഴ്ചകളിലാണ് ക്ലാസുകളുണ്ടാവുക. 8-10 ക്ലാസുകൾക്ക് 2025 ജൂലൈ 26, ഓഗസ്റ്റ് 16, ഒക്ടോബർ 4, ഒക്ടോബർ 25, 2026 ജനുവരി 3, ജനുവരി 31 എന്നീ ശനിയാഴ്ചകളാണ് പ്രവൃത്തിദിനങ്ങൾ. ഹൈസ്‌കൂളുകളിൽ 1200 മണിക്കൂർ പഠന സമയം നിർദ്ദേശിക്കുന്ന സാഹചര്യത്തിലാണ് 7 അധിക പ്രവൃത്തി ദിവസങ്ങൾക്കൊപ്പം ദിവസവും അര മണിക്കൂർ അധികമായി കൂട്ടിച്ചേർക്കുന്നത്.

കേരളത്തിലെ ഹൈസ്‌കൂളുകളിൽ പഠനസമയം കൂട്ടിയതിനെക്കുറിച്ചുള്ള നിങ്ങളുടെ അഭിപ്രായം താഴെ കമന്റ് ചെയ്യൂ. വാർത്ത സുഹൃത്തുക്കളുമായി പങ്കുവെക്കുക.

Article Summary: Kerala high schools increase daily working hours by 30 minutes and add Saturday classes.

#KeralaEducation #SchoolHours #NewTimetable #PublicEducation #HighSchoolNews #KeralaSchools