കണ്ണൂർ: (KVARTHA) കാലാവസ്ഥാ വ്യതിയാനം തീരദേശ മേഖലയിൽ സൃഷ്ടിക്കുന്ന മാറ്റങ്ങൾ പഠിക്കുന്നതിനും മൈക്രോ പ്ലാസ്റ്റിക് (Micro Plastic-അതിസൂക്ഷ്മ പ്ലാസ്റ്റിക് കണികകൾ) സാന്നിദ്ധ്യം പരിശോധിക്കുന്നതിനും കണ്ണൂർ സർവകലാശാലയും ജില്ലാ പഞ്ചായത്തും തമ്മിൽ ധാരണാപത്രത്തിൽ ഒപ്പിട്ടു. 'തീരദേശ പഠനവും മൈക്രോ പ്ലാസ്റ്റിക് സാന്നിദ്ധ്യ പരിശോധനയും' എന്ന പ്രൊജക്ടുമായി ബന്ധപ്പെട്ടാണ് ഈ സുപ്രധാന ധാരണ. സർവകലാശാലയ്ക്ക് വേണ്ടി രജിസ്ട്രാർ പ്രൊഫ. ജോബി കെ ജോസും ജില്ലാ പഞ്ചായത്തിന് വേണ്ടി സെക്രട്ടറി ടൈനി സൂസൺ ജോണുമാണ് ധാരണാ പത്രത്തിൽ ഒപ്പിട്ടത്.

ജില്ലാ പഞ്ചായത്തിന്റെ ദുരന്ത നിവാരണ - കാലാവസ്ഥാ വ്യതിയാനം സംബന്ധിച്ച വർക്കിംഗ് ഗ്രൂപ്പാണ് ഈ പദ്ധതി വിഭാവനം ചെയ്തത്. പദ്ധതിയുടെ ഭാഗമായി ജില്ലയിലെ തീരദേശ പഞ്ചായത്തുകളെയും അവയുടെ കടലോരത്തെയും പ്രത്യേകമായി നിരീക്ഷണ വിധേയമാക്കും. അതോടൊപ്പം തീരദേശത്തെ ജലസ്രോതസ്സുകളിൽ അടിഞ്ഞുകൂടുന്ന മൈക്രോ പ്ലാസ്റ്റിക് മാലിന്യങ്ങളും പഠന വിധേയമാക്കും.

ജനകീയ പങ്കാളിത്തത്തോടെ പഠനം

വിവര സാങ്കേതിക വിദ്യ, റിമോട്ട് സെൻസിങ് (Remote Sensing) അതായത് വിദൂര സംവേദനം, ജിഐഎസ് (GIS-Geographic Information System) അഥവാ ഭൂമിശാസ്ത്രപരമായ വിവര സംവിധാനം എന്നിവയുടെ സഹായത്തോടെയാണ് പഠനം നടപ്പാക്കുക. കൂടാതെ, തീരദേശ തദ്ദേശ സ്വയംഭരണ സ്ഥാപനങ്ങൾ, കുടുംബശ്രീ, വായനശാലകൾ ഉൾപ്പടെയുള്ള സംവിധാനങ്ങൾ വഴിയുള്ള ജനകീയ പഠനമാതൃകയിലാണ് ഈ പ്രൊജക്ട് പൂർത്തിയാക്കുക. ഈ പദ്ധതിക്കായി ജില്ലാ പഞ്ചായത്ത് 6.5 ലക്ഷം രൂപ വകയിരുത്തും.

ജില്ലാ പഞ്ചായത്ത് പ്രസിഡന്റ് അഡ്വ. കെ കെ രത്നകുമാരിയും സർവകലാശാല വൈസ് ചാൻസലർ പ്രൊഫ. കെ കെ സാജുവും ഈ പദ്ധതിയുടെ പ്രാധാന്യം വിശദീകരിച്ചു. ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ് കുര്യൻ, ആസൂത്രണ സമിതി ഉപാധ്യക്ഷൻ ടി ഗംഗാധരൻ, സ്ഥിരം സമിതി അധ്യക്ഷ യു പി ശോഭ, അംഗങ്ങളായ സി.പി ഷിജു, എം രാഘവൻ, പഞ്ചായത്ത് ഫിനാൻസ് ഓഫീസർ കെ വി മുകന്ദൻ, പഞ്ചായത്ത് സീനിയർ സൂപ്രണ്ട് പി.കെ പ്രേമൻ, ജൂനിയർ സൂപ്രണ്ട് ചിത്രൻ, പ്രൊഫ. എ അശോകൻ, ഐക്യു എസി ഡയറക്ടർ പ്രൊഫ. അനൂപ് കേശവൻ, സർവകലാശാല വകുപ്പ് മേധാവികൾ, പദ്ധതി പ്രിൻസിപ്പൽ ഇൻവസ്റ്റിഗേറ്റർ ഡോ. ടി കെ പ്രസാദ് എന്നിവരും ചടങ്ങിൽ പങ്കെടുത്തു.
 

തീരദേശത്തെ മൈക്രോ പ്ലാസ്റ്റിക് സാന്നിദ്ധ്യം പരിശോധിക്കുന്ന ഈ പദ്ധതിയുടെ പ്രാധാന്യം എത്ര വലുതാണ്? നിങ്ങളുടെ അഭിപ്രായം കമൻ്റ് ചെയ്യുക.

Article Summary: Kannur University and District Panchayat signed an MoU to study coastal changes and microplastic presence due to climate change, allocating ₹6.5 lakh for the project.

#KannurUniversity #DistrictPanchayat #Microplastic #CoastalStudy #ClimateChange #KeralaDevelopment