എറണാകുളം: (KVARTHA) 105-ാം വയസ്സിൽ ഡിജിറ്റൽ സാക്ഷരത നേടിയ പെരുമ്പാവൂർ, അശമന്നൂർ സ്വദേശിയായ എം.എ. അബ്ദുല്ല മൗലവി ബാഖവി യഥാർത്ഥ കേരള സ്റ്റോറിയുടെ നായകനാണെന്ന് തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് പറഞ്ഞു. അദ്ദേഹത്തിന്റെ വീട്ടിൽ നേരിട്ടെത്തി സന്ദർശിച്ച ശേഷം സംസാരിക്കുകയായിരുന്നു മന്ത്രി. സമ്പൂർണ്ണ ഡിജിറ്റൽ സാക്ഷരത കൈവരിക്കുന്ന രാജ്യത്തെ ആദ്യ സംസ്ഥാനമായി കേരളം മാറുമ്പോൾ, ഈ മാറ്റത്തിൻ്റെ ചരിത്രപരമായ നായകനാണ് അബ്ദുല്ല മൗലവിയെന്ന് മന്ത്രി വിശേഷിപ്പിച്ചു.

105-ാം വയസ്സിൽ ഡിജിറ്റൽ സാക്ഷരത നേടിയ അദ്ദേഹത്തിൻ്റെ നിശ്ചയദാർഢ്യത്തെയും ഇച്ഛാശക്തിയെയും മന്ത്രി അഭിനന്ദിച്ചു. പ്രായം ഒന്നിനും ഒരു തടസ്സമല്ലെന്ന് അദ്ദേഹം തെളിയിച്ചെന്നും മന്ത്രി പറഞ്ഞു. ഇത്രയും പ്രായമുള്ള ഒരാളെ കണ്ടെത്തി ഡിജിറ്റൽ സാക്ഷരതയിൽ എത്തിക്കാൻ കഴിഞ്ഞ കേരളത്തിൻ്റെ കഴിവും തദ്ദേശ സ്വയംഭരണ വകുപ്പിൻ്റെ പ്രവർത്തനവും പ്രശംസനീയമാണെന്നും മന്ത്രി പറഞ്ഞു.

കേന്ദ്ര മാനദണ്ഡമനുസരിച്ച് 65 വയസ്സുവരെയുള്ളവരെ ഡിജിറ്റൽ സാക്ഷരരാക്കിയാൽ മതി. എന്നാൽ, 105 വയസ്സുള്ള അബ്ദുല്ല മൗലവിയെയും അശമന്നൂർ ഗ്രാമപഞ്ചായത്ത് ഉപേക്ഷിച്ചില്ല. അദ്ദേഹവും ഉത്സാഹത്തോടെ പങ്കാളിയായി. ഇതാണ് യഥാർത്ഥ കേരള മാതൃകയെന്ന് മന്ത്രി ചൂണ്ടിക്കാട്ടി. അശമന്നൂർ ഗ്രാമപഞ്ചായത്ത് പ്രസിഡന്റ് ഷിജി ഷാജി, മുൻ ഗ്രാമപഞ്ചായത്ത് പ്രസിഡന്റ് വി.പി. ശശീന്ദ്രൻ ഉൾപ്പെടെയുള്ള ജനപ്രതിനിധികളും ഉദ്യോഗസ്ഥരും മന്ത്രിക്കൊപ്പമുണ്ടായിരുന്നു.

105-ാം വയസ്സിൽ ഡിജിറ്റൽ ആയ അബ്ദുല്ലയ്ക്ക് മന്ത്രി സ്മാർട്ട്‌ഫോൺ സമ്മാനിച്ചു

അബ്ദുല്ല മൗലവിയെ സന്ദർശിക്കാൻ എത്തിയ മന്ത്രി എം.ബി. രാജേഷ് അദ്ദേഹത്തിന് പുതിയ സ്മാർട്ട്‌ഫോൺ സമ്മാനമായി നൽകി. ഈ കാര്യം അറിഞ്ഞപ്പോൾ നേരിട്ട് വന്ന് അഭിനന്ദിക്കണമെന്ന് തോന്നിയതുകൊണ്ടാണ് താൻ വന്നതെന്ന് മന്ത്രി പറഞ്ഞു. ഈ പ്രായത്തിൽ ഈ അറിവ് നേടിയ വേറെ അധികം പേർ കാണില്ലെന്നും ഇപ്പോൾ കേരളത്തിൽ എല്ലാവർക്കും അബ്ദുല്ല മൗലവിയെ അറിയാമെന്നും മന്ത്രി കൂട്ടിച്ചേർത്തു.

ഫോണിൽ എന്തൊക്കെ ചെയ്യാൻ പഠിച്ചു എന്നും പഠനം എളുപ്പമായിരുന്നോ എന്നും മന്ത്രി തിരക്കി. എല്ലാം എളുപ്പമായിരുന്നെന്ന് അബ്ദുല്ല മൗലവി മറുപടി നൽകി. തുടർന്ന് യൂട്യൂബ് ഉൾപ്പെടെ ഉപയോഗിക്കുന്നത് മന്ത്രിയെ അദ്ദേഹം കാണിച്ചുകൊടുത്തു. വിദേശത്തുള്ള കൊച്ചുമകനെ വീഡിയോ കോളും വിളിച്ചു. പുതിയ ഫോണിൽ മന്ത്രിയെ വിളിക്കാമെന്ന് അബ്ദുല്ല മൗലവി സന്തോഷത്തോടെ പറഞ്ഞു.
 

അബ്ദുല്ല മൗലവിയുടെ ഈ നേട്ടത്തെക്കുറിച്ച് നിങ്ങളുടെ അഭിപ്രായം എന്താണ്? കമന്റ് ചെയ്യുക.

Article Summary: Kerala Minister M.B. Rajesh meets 105-year-old digital literacy learner Abdullla Maulavi.

#KeralaStory #DigitalLiteracy #MBRajesh #Inspirational #Kerala #Perumbavoor