കാലാവസ്ഥാ നിക്ഷേപം: ഇന്ത്യയിൽ 50 ലക്ഷം പുതിയ തൊഴിലവസരങ്ങൾ; സമ്പദ്‌വ്യവസ്ഥയ്ക്ക് പുത്തൻ ഉണർവ്

ന്യൂഡൽഹി: (KVARTHA) കാലാവസ്ഥാ പ്രവർത്തന മേഖലയിലെ നിക്ഷേപങ്ങൾ ഇന്ത്യയിൽ വൻ തൊഴിൽ സാധ്യതകൾ തുറക്കുമെന്ന് പുതിയ റിപ്പോർട്ട്. 2030 ആകുമ്പോഴേക്കും രാജ്യത്ത് 50 ലക്ഷത്തിലധികം പുതിയ തൊഴിലവസരങ്ങൾ സൃഷ്ടിക്കാൻ ഈ നിക്ഷേപങ്ങൾക്ക് സാധിക്കും. കാലാവസ്ഥാ സൗഹൃദപരമായ ഈ നിക്ഷേപങ്ങളുടെ ആകെ തുക ഏകദേശം 1.5 ട്രില്യൺ ഡോളറാണ് (ഏകദേശം 124 ലക്ഷം കോടി രൂപ).

ഈ നിക്ഷേപം രാജ്യത്തിന്റെ വാർഷിക സാമ്പത്തിക ഉൽപ്പാദനം (Annual Economic Output) 3.5 മുതൽ 4 ട്രില്യൺ ഡോളർ വരെ (ഏകദേശം 288 മുതൽ 330 ലക്ഷം കോടി രൂപ വരെ) വർദ്ധിപ്പിക്കാനും സാധ്യതയുണ്ടെന്ന് റിപ്പോർട്ട് ചൂണ്ടിക്കാട്ടുന്നു. ഡെലോയിറ്റ് ഇന്ത്യയും റെയിൻമാറ്റർ ഫൗണ്ടേഷനും ചേർന്ന് പുറത്തിറക്കിയ 'ദി സ്റ്റേറ്റ് ഓഫ് ക്ലൈമറ്റ് റെസ്പോൺസ് ഇൻ ഇന്ത്യ' എന്ന സംയുക്ത റിപ്പോർട്ടിലാണ് ഈ വിവരങ്ങളുള്ളത്.

തൊഴിൽ മേഖലകൾ പലവിധം

നിർമ്മാണ സാമഗ്രികളുടെ സംഭരണം (ഫീഡ്‌സ്റ്റോക്ക് അഗ്രഗേഷൻ), നിർമ്മാണം, പ്രവർത്തനങ്ങൾ, പരിപാലനം, പരിസ്ഥിതി സൗഹൃദ വസ്തുക്കളുടെ നിർമ്മാണം, ചരക്കുഗതാഗതം, സംഭരണം‌ ഉൾപ്പെടെ ഒന്നിലധികം മേഖലകളിലായാണ് ഈ തൊഴിലവസരങ്ങൾ സൃഷ്ടിക്കപ്പെടുക. ഇത് രാജ്യത്തിന്റെ സാമ്പത്തിക വളർച്ചയ്ക്ക് വലിയ ഉണർവ് നൽകുമെന്നാണ് പ്രതീക്ഷ.

കാലാവസ്ഥാ മാറ്റങ്ങൾ ആശങ്കയായി

അതേസമയം, കാലാവസ്ഥാ മാറ്റങ്ങൾ ഇന്ത്യയുടെ പ്രകൃതി വ്യവസ്ഥകളെ ഇതിനോടകം തന്നെ കാര്യമായി ബാധിച്ചു കഴിഞ്ഞു. മഴയിലെ വ്യതിയാനങ്ങൾ, വർധിച്ചുവരുന്ന താപനില, ജൈവവൈവിധ്യ നഷ്ടം എന്നിവ ഇതിന് ഉദാഹരണമാണ്. ഇത്, കാലാവസ്ഥാ മാറ്റങ്ങൾക്കനുസരിച്ച് പൊരുത്തപ്പെട്ടു ജീവിക്കാൻ വേണ്ടിവരുന്ന ചെലവ് വർദ്ധിക്കാൻ കാരണമാകുമെന്നും പഠനം മുന്നറിയിപ്പ് നൽകുന്നു. മാത്രമല്ല നിലവിലെ ഒറ്റപ്പെട്ട ശ്രമങ്ങളിൽ നിന്ന് മാറി, നയരൂപകർത്താക്കൾ, കോർപ്പറേറ്റുകൾ, പൗര സമൂഹം എന്നിവ ഉൾപ്പെടുന്ന ഏകോപിതവും വ്യവസ്ഥാധിഷ്ഠിതവുമായ പ്രവർത്തനത്തിലേക്ക് മാറണമെന്ന് പഠനം ആവശ്യപ്പെടുന്നു.

കൂടാതെ ചിതറിയ സംരംഭങ്ങളിൽ നിന്ന് മാറി, നമ്മൾ എങ്ങനെ നിർമ്മിക്കുന്നു, നിക്ഷേപിക്കുന്നു, നവീകരിക്കുന്നു എന്നിവയെ പുനർനിർമ്മിക്കുന്ന ഒരു പോതുദൗത്യമായി മാറേണ്ടത് അത്യാവശ്യമാണെന്ന്' ഡെലോയിറ്റ് ഇന്ത്യയിലെ പങ്കാളിയായ അശ്വിൻ ജേക്കബ് അഭിപ്രായപ്പെട്ടു. മാത്രമല്ല ഇതിന്, മൂലധനത്തിലെ അപകടസാധ്യത കുറയ്ക്കുന്നതിന് നയപരമായ പിന്തുണയും, അറിവോടെയുള്ള തീരുമാനമെടുക്കലിന് മികച്ച കാലാവസ്ഥാ വിവരങ്ങളും ആവശ്യമാണെന്നും അദ്ദേഹം കൂട്ടിച്ചേർത്തു. സുസ്ഥിരമായ തൊഴിലവസരങ്ങൾ സൃഷ്ടിക്കുന്നതിന് സർക്കാരും ബിസിനസ്സുകളും സമൂഹങ്ങളും തമ്മിലുള്ള സഖ്യങ്ങൾ അനിവാര്യമാണെന്ന് ഡെലോയിറ്റ് ഇന്ത്യയിലെ മറ്റൊരു പങ്കാളിയായ പ്രശാന്ത് നുതുല ഊന്നിപ്പറഞ്ഞു.

സർവേ ഫലങ്ങൾ

റിപ്പോർട്ടിൽ ഉൾപ്പെടുത്തിയിട്ടുള്ള 2025 സിറ്റിസൺ ക്ലൈമറ്റ് സർവേയിൽ പറയുന്ന പ്രകാരം, ഇതിൽ പങ്കെടുത്ത 1,700-ൽ അധികം വീടുകളിൽ, 86 ശതമാനം പേരും കാലാവസ്ഥാ വ്യതിയാനം തങ്ങളുടെ ദൈനംദിന ജീവിതത്തെ ബാധിക്കുന്നുണ്ടെന്ന് വിശ്വസിക്കുന്നു. മൂന്നിലൊന്ന് പേർ ആരോഗ്യത്തിനും ഉപജീവനമാർഗ്ഗത്തിനും കാര്യമായ ബുദ്ധിമുട്ടുകൾ റിപ്പോർട്ട് ചെയ്തു.

മാലിന്യം വേർതിരിക്കൽ, വൈദ്യുതിയുടെയും ജലത്തിന്റെയും ഉപയോഗം കുറയ്ക്കൽ, ഒറ്റത്തവണ ഉപയോഗിക്കാവുന്ന പ്ലാസ്റ്റിക്കുകൾ കുറയ്ക്കൽ തുടങ്ങിയ വ്യക്തിഗത പ്രവർത്തനങ്ങൾ വർദ്ധിക്കുന്നുണ്ടെങ്കിലും, ഏകോപനത്തിന്റെ കുറവ് ഇതിന്റെ വലിയ സ്വാധീനം തടയുന്നു. വ്യക്തിപരമായ സ്വാധീനത്തെക്കുറിച്ചുള്ള സംശയങ്ങൾ, പ്രോത്സാഹനങ്ങളുടെ അഭാവം, കുറഞ്ഞ അവബോധം എന്നിവ കാരണം ഏകദേശം 22 ശതമാനം പേർ നിഷ്‌ക്രിയരായി തുടരുകയാണെന്നും സർവേയിൽ പറയുന്നു.

50-ൽ അധികം ഇന്ത്യൻ കമ്പനികൾ പങ്കെടുത്ത കോർപ്പറേറ്റ് ക്ലൈമറ്റ് സന്നദ്ധതാ സർവേ 2025ലും സമാനമായ ഫലങ്ങളാണുള്ളത്. 47 ശതമാനം പേർ ജീവനക്കാരുടെ പാരിസ്ഥിതിക വ്യതിയാനങ്ങളുമായി ബന്ധപ്പെട്ട ആരോഗ്യപ്രശ്‌നങ്ങൾ റിപ്പോർട്ട് ചെയ്തു. നിയന്ത്രണ മാറ്റങ്ങളും ഉപഭോഗ രീതികളും തങ്ങളുടെ പ്രവർത്തനങ്ങളെ ബാധിക്കുന്നുണ്ടെന്ന് 44 ശതമാനം പേർ പറഞ്ഞു. പല കമ്പനികളും കാലാവസ്ഥാ അപകടസാധ്യതയും പൊരുത്തപ്പെടുത്തൽ തന്ത്രങ്ങളും വികസിപ്പിക്കുന്നുണ്ടെങ്കിലും, കോർപ്പറേറ്റ് പ്രവർത്തനങ്ങൾ ഇപ്പോഴും ഒറ്റപ്പെട്ട നിലയിൽ തുടരുകയാണെന്ന് പഠനം വ്യക്തമാക്കുന്നു.

പ്രധാന ശുപാർശകൾ

സുസ്ഥിരമായ തൊഴിലവസരങ്ങൾ സൃഷ്ടിക്കുന്നതിന് സർക്കാരും ബിസിനസ്സുകളും സമൂഹങ്ങളും തമ്മിലുള്ള സഖ്യങ്ങൾ അനിവാര്യമാണെന്ന് ഡെലോയിറ്റ് ഇന്ത്യയിലെ പങ്കാളിയായ പ്രശാന്ത് നുതുല ഊന്നിപ്പറഞ്ഞു.

നയത്തിലും കമ്പനികളുടെ നടത്തിപ്പ് രീതിയിലും കാലാവസ്ഥാ മുൻഗണനകളെ സംയോജിപ്പിക്കുക, മെച്ചപ്പെട്ട ഡാറ്റാ സംവിധാനങ്ങൾ, ദേശീയ, സംസ്ഥാന, പ്രാദേശിക തലങ്ങളിലുടനീളം ഏകീകൃത ഭരണം എന്നിവ റിപ്പോർട്ട് ആവശ്യപ്പെടുന്നു. നവീകരണം ത്വരിതപ്പെടുത്തുന്നതിന് ഊർജ്ജം, കൃഷി, മാലിന്യ സംസ്കരണം തുടങ്ങിയ പ്രധാന മേഖലകളെ ബന്ധിപ്പിക്കുന്ന പരസ്പരം പ്രവർത്തിപ്പിക്കാൻ കഴിയുന്ന ഡിജിറ്റൽ ഇൻഫ്രാസ്ട്രക്ചർ അത്യാവശ്യമാണെന്നും റിപ്പോർട്ട് എടുത്തു കാണിക്കുന്നു.

സങ്കീർണ്ണതയെ ഉൾക്കൊള്ളുന്നതിലൂടെയും വേർതിരിവുകൾ മറികടക്കുന്നതിലൂടെയും, ബിസിനസ്സുകൾക്കും സർക്കാരുകൾക്കും പ്രതിരോധശേഷിക്കും നവീകരണത്തിനുമുള്ള പുതിയ അവസരങ്ങൾ തുറക്കാൻ കഴിയുമെന്ന് റെയിൻമാറ്റർ ഫൗണ്ടേഷൻ സിഇഒ സമീർ ഷിസോഡിയ പറഞ്ഞു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കുന്നതോടൊപ്പം കൂടുതൽ വാർത്തകൾക്കായി ഞങ്ങളുടെ വാട്സാപ്പ് ചാനൽ പിന്തുടരുക.

Article Summary: India's climate investments could create 5 million jobs and boost economy by $4 trillion by 2030.

Hashtags: #ClimateInvestment #IndiaJobs #EconomicGrowth #DeloitteReport #Sustainability #ClimateAction