ബിരിയാണിക്ക് പൊള്ളുന്ന വില; കയമ അരി വില 230 രൂപയിലേക്ക്, ഹോട്ടലുകൾ പ്രതിസന്ധിയിൽ

കോഴിക്കോട്: (KVARTHA) ബിരിയാണിയുണ്ടാക്കാൻ ഉപയോഗിക്കുന്ന പ്രധാന ചേരുവയായ കയമ അരിയുടെ വില കുതിച്ചുയരുന്നത് സാധാരണക്കാരെയും ഹോട്ടൽ വ്യവസായികളെയും ഒരുപോലെ ആശങ്കയിലാക്കുന്നു. കഴിഞ്ഞ മൂന്ന് മാസത്തിനിടെ ഇരട്ടിയിലധികം വിലവർധനവാണ് ഈ സുഗന്ധമുള്ള അരിക്ക് ഉണ്ടായിരിക്കുന്നത്.

നേരത്തെ കിലോക്ക് 110-115 രൂപയുണ്ടായിരുന്ന കയമ അരിയുടെ വില ഇപ്പോൾ 230 രൂപ വരെ എത്തി. പ്രമുഖ ബ്രാൻഡുകളായ ഡിഗോൺ, വില്ലേജ് എന്നിവയുടെ വില 110 രൂപയിൽ നിന്ന് 215 രൂപയായും, ട്രിപ്പിൾ മാൻ ബ്രാൻഡിന്റെ വില 110 രൂപയിൽ നിന്ന് 225 രൂപയായും, കെ.ടി.എസ്. ബ്രാൻഡിന്റെ വില 110 രൂപയിൽ നിന്ന് 220 രൂപയായും വർധിച്ചു. ഈ അപ്രതീക്ഷിത വിലവർധനവ് കാരണം വ്യാപാരം ഗണ്യമായി കുറഞ്ഞെന്ന് വ്യാപാരികൾ പറയുന്നു.

കേരളത്തിലേക്ക് പ്രധാനമായും കയമ അരി എത്തുന്നത് പശ്ചിമ ബംഗാളിൽ നിന്നാണ്. കാലാവസ്ഥാ വ്യതിയാനം കാരണം കൃഷി കുറഞ്ഞതാണ് വില വർധനവിന് ഒരു പ്രധാന കാരണം.

മികച്ച ഗുണമേന്മ ലഭിക്കാൻ വിളവെടുത്ത അരി കുറഞ്ഞത് രണ്ട് വർഷമെങ്കിലും സൂക്ഷിക്കണം. എന്നാൽ, ഇത്തരത്തിൽ സംഭരിച്ചുവെച്ച അരി വൻതോതിൽ വിദേശത്തേക്ക് കയറ്റുമതി ചെയ്തതും വിലക്കയറ്റത്തിന് കാരണമായതായി വ്യാപാരികൾ ചൂണ്ടിക്കാട്ടുന്നു.

അരി വില വർധിച്ചതോടെ ഹോട്ടലുകളിലും ബിരിയാണിയുടെ വില കൂടിയിട്ടുണ്ട്. ചിക്കൻ, ബീഫ് ബിരിയാണികൾക്ക് 20 രൂപ വരെയാണ് വർധനവ് വരുത്തിയിരിക്കുന്നത്. വെളിച്ചെണ്ണക്ക് പിന്നാലെ ബിരിയാണി അരിയുടെയും വില കുതിച്ചുയർന്നത് ഹോട്ടൽ, കേറ്ററിങ് വ്യവസായ മേഖലയെ സാരമായി ബാധിച്ചിരിക്കുകയാണ്.

ഈ പ്രതിസന്ധി ഉടൻ അവസാനിച്ചില്ലെങ്കിൽ ബിരിയാണിക്ക് ഇനിയും വില കൂടുമെന്നാണ് സൂചന.

ഇനി ബിരിയാണിക്ക് വില കൂടുമോ? നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Kayama rice prices rise, affecting biryani costs in Kerala.

#Biryani, #PriceHike, #Kerala, #KayamaRice, #FoodPrices, #Inflation