കൊച്ചി: (KVARTHA) കഴിഞ്ഞ വർഷം ഇന്ത്യൻ തീരങ്ങളിൽ നിന്ന് പിടിച്ചത് 35.7 ലക്ഷം ടൺ സമുദ്ര മത്സ്യമാണെന്ന് പുതിയ പഠന റിപ്പോർട്ട്. മുൻ വർഷത്തെക്കാൾ ഇന്ത്യയിലാകെ സമുദ്ര മത്സ്യലഭ്യതയിൽ മൂന്ന് ശതമാനത്തിന്റെ വർധനവുണ്ടായതായി കേന്ദ്ര സമുദ്ര മത്സ്യ ഗവേഷണ സ്ഥാപനത്തിന്റെ (സിഎംഎഫ്ആർഐ) റിപ്പോർട്ടിൽ വ്യക്തമാക്കുന്നു. രാജ്യത്ത് ഏറ്റവുമധികം മത്സ്യം പിടിച്ചത് തമിഴ്നാടാണ്, 6.85 ലക്ഷം ടൺ. പ്രതികൂല കാലാവസ്ഥയും മത്സ്യബന്ധന നിരോധന കാലയളവ് നീട്ടിയതിനാലും ഗുജറാത്ത് സംസ്ഥാനം രണ്ടാം സ്ഥാനത്തേക്ക് പിന്തള്ളപ്പെട്ടു. സമുദ്രമത്സ്യ ലഭ്യതയിൽ രണ്ട് ശതമാനം വർധനവോടെ കേരളം പട്ടികയിൽ മൂന്നാം സ്ഥാനം നിലനിർത്തിയിട്ടുണ്ട്.

കേരളത്തിൽ റെക്കോർഡ് വർധനവുമായി മത്തി

കേരളത്തിൽ മത്തിയുടെ ലഭ്യത 13 ശതമാനം വർധിച്ച് കഴിഞ്ഞ പതിറ്റാണ്ടിനിടയിലെ ഏറ്റവും ഉയർന്ന ലഭ്യതയിലെത്തി. 1.68 ലക്ഷം ടണ്ണുമായി സംസ്ഥാനത്ത് ഏറ്റവുമധികം പിടിച്ച മത്സ്യവും മത്തി തന്നെയാണ്. 2013-ന് ശേഷമുള്ള ഏറ്റവും വലിയ ലഭ്യതയാണിത്. മുൻ വർഷം ഇത് 1.49 ലക്ഷം ടണ്ണായിരുന്നു. കേരളത്തിലെ ആകെ സമുദ്രമത്സ്യ ലഭ്യത 6.24 ലക്ഷം ടണ്ണാണ്. മത്തിക്ക് പുറമെ സംസ്ഥാനത്ത് കിളിമീൻ, കണവ, കൂന്തൽ, നീരാളി തുടങ്ങിയ ഇനങ്ങളുടെ ലഭ്യതയിലും വർധനവുണ്ടായിട്ടുണ്ട്. എന്നാൽ തിരിയാൻ, ചെമ്മീൻ, പാമ്പാട എന്നിവയുടെ ലഭ്യത കഴിഞ്ഞ വർഷം കുറഞ്ഞു.

മത്തി കഴിഞ്ഞാൽ കേരളത്തിൽ കഴിഞ്ഞ വർഷം ഏറ്റവും കൂടുതൽ ലഭിച്ച മത്സ്യയിനങ്ങൾ യഥാക്രമം അയല (62,269 ടൺ), കൊഴുവ (43,917 ടൺ), കിളിമീൻ (43,184 ടൺ), ചെമ്മീൻ (40,443 ടൺ) എന്നിവയാണ്. രാജ്യത്താകെ കണക്കാക്കുമ്പോൾ അയലയാണ് ഏറ്റവും കൂടുതൽ ലഭിച്ച മത്സ്യം (2.70 ലക്ഷം ടൺ). സമുദ്ര മത്സ്യോൽപാദനത്തിൽ കർണാടകയിൽ 44 ശതമാനവും മഹാരാഷ്ട്രയിൽ 18 ശതമാനവും മികച്ച വർധനവ് രേഖപ്പെടുത്തി.

മുന്നിൽ എറണാകുളം ജില്ല

കഴിഞ്ഞ മെയ്, ജൂൺ മാസങ്ങളിൽ ശക്തമായ മഴയും ചരക്കു കപ്പൽ അപകടവും കാരണം സംസ്ഥാനത്തെ തെക്കൻ ജില്ലകളിൽ മത്സ്യബന്ധന ദിവസങ്ങളിൽ കുറവുണ്ടായി. എങ്കിലും സംസ്ഥാനത്ത് എറണാകുളം ജില്ലയിലാണ് ഏറ്റവും കൂടുതൽ മീൻ ലഭിച്ചത്. കൊല്ലം, കോഴിക്കോട് ജില്ലകളാണ് യഥാക്രമം രണ്ടും മൂന്നും സ്ഥാനങ്ങളിലുള്ളത്. ഹാർബറുകളുടെ കണക്കെടുത്താൽ കൊല്ലം ജില്ലയിലെ നീണ്ടകരയാണ് മുന്നിലുള്ളത്. എറണാകുളം ജില്ലയിലെ മുനമ്പം ഇതിൽ രണ്ടാമതാണ്.

അനുകൂലമായ പാരിസ്ഥിതിക ഘടകങ്ങളാണ് മത്തി പോലുള്ള ചെറിയ മീനുകൾക്ക് ഗുണകരമായതെന്ന് സിഎംഎഫ്ആർഐ ഡയറക്ടർ ഡോ ഗ്രിൻസൺ ജോർജ് അറിയിച്ചു. നിയന്ത്രിത രീതിയിലുള്ള മത്സ്യബന്ധനവും ഇതിന് ഏറെ സഹായകരമായെന്നും അദ്ദേഹം വ്യക്തമാക്കി.

വരുമാനത്തിലും വലിയ കുതിപ്പ്

സമുദ്രമത്സ്യ മേഖലയിൽ നിന്നുള്ള വരുമാനത്തിലും ഇത്തവണ വലിയ വർധനയുണ്ടായി. ഇന്ത്യയിലാകെ ലാൻഡിംഗ് സെന്ററുകളിൽ 69,254 കോടി രൂപയും (10.45 ശതമാനം വർധനവ്), ചില്ലറ വിപണിയിൽ 97,702 കോടി രൂപയും (8.43 ശതമാനം വർധനവ്) വിറ്റുവരവുണ്ടായി. കേരളത്തിൽ ലാൻഡിംഗ് സെന്ററുകളിലെ മൂല്യം 12,665 കോടി രൂപയും (17.8 ശതമാനം വർധനവ്), ചില്ലറ വിപണിയിലേത് 16,681 കോടി രൂപയുമാണ് (11.1 ശതമാനം വർധനവ്). വിപണന കാര്യക്ഷമതയിൽ കേരളമാണ് രാജ്യത്ത് ഒന്നാമത് നിൽക്കുന്നത് (72.83 ശതമാനം).

സിഎംഎഫ്ആർഐയിലെ ഫിഷറി റിസോഴ്സസ് അസസ്മെന്റ്, ഇക്കണോമിക്സ് ആൻഡ് എക്സ്റ്റൻഷൻ വിഭാഗമാണ് വാർഷിക സമുദ്രമത്സ്യ ലഭ്യത കൃത്യമായി കണക്കാക്കി ഈ റിപ്പോർട്ട് തയ്യാറാക്കിയത്. പുതിയ റിപ്പോർട്ട് പ്രകാശനം ചെയ്ത വാർത്താ സമ്മേളനത്തിൽ ഡയറക്ടർ ഡോ ഗ്രിൻസൺ ജോർജ്, വിവിധ ഗവേഷണ വിഭാഗം മേധാവികളായ ഡോ ജെ ജയശങ്കർ, ഡോ യു ഗംഗ, ഡോ ശോഭ ജോ കിഴക്കൂടൻ, ഡോ കെ എസ് ശോഭന, ഡോ ജോസ്ലീൻ ജോസ്, ഡോ വി വി ആർ സുരേഷ്, ഡോ കൃപേഷ് ശർമ തുടങ്ങിയവർ സംബന്ധിച്ചു.

ഈ റിപ്പോർട്ടിന്റെ വിവരങ്ങൾ നിങ്ങളുടെ സുഹൃത്തുക്കൾക്കും കുടുംബാംഗങ്ങൾക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. പ്രാദേശിക വാർത്തകളും മറ്റ് വിവരങ്ങളും  അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. 

Article Summary: According to the CMFRI report, India's total marine fish production rose by 3% to 35.7 lakh tonnes, with Tamil Nadu leading the chart, while Kerala retained the third position with a 2% increase, notably recording its highest sardine catch (1.68 lakh tonnes) in a decade due to favorable environmental factors, alongside making Kerala the most efficient state in fish marketing.

#CMFRI #KeralaFisheries #MarineFishCatch #Sardines #Ernakulam #BusinessNewsMalayalam