തൊഴിലുറപ്പ് ജോലിക്കിടെ ഭക്ഷണം കഴിക്കാന്‍ വീട്ടിലെത്തിയ യുവതി വെട്ടേറ്റു മരിച്ചനിലയില്‍; അയല്‍വാസിയും ബന്ധുവുമായ മധ്യവയസ്‌ക്കന്‍ അറസ്റ്റില്‍; കൊലയ്ക്ക് കാരണം അതിര്‍ത്തി തര്‍ക്കം

മാനന്തവാടി: (www.kvartha.com 18.06.2019) തൊഴിലുറപ്പ് ജോലിക്കിടെ ഭക്ഷണം കഴിക്കാന്‍ വീട്ടിലെത്തിയ യുവതി വീടിനകത്തു വെട്ടേറ്റു മരിച്ചനിലയില്‍. വാളാട് പ്രശാന്തിഗിരി മടത്താശ്ശേരി ബൈജുവിന്റെ ഭാര്യ സിനി (35) ആണു മരിച്ചത്. തിങ്കളാഴ്ച രാവിലെ 10മണി കഴിഞ്ഞാണു സംഭവം.

പ്രഭാത ഭക്ഷണം കഴിക്കാന്‍ തൊഴിലുറപ്പ് ജോലിസ്ഥലത്തുനിന്നു വീട്ടിലേക്കു പോയ സിനിയെ നേരം വൈകിയിട്ടും കാണാത്തതിനെ തുടര്‍ന്ന് കൂടെയുള്ളവര്‍ അന്വേഷിച്ചെത്തിയപ്പോഴാണു കഴുത്തില്‍ വെട്ടേറ്റ നിലയില്‍ അനക്കമറ്റ് കിടക്കുന്നത് കണ്ടത്.


ഉടന്‍ തന്നെ ജില്ലാ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. സംഭവത്തില്‍ പ്രതിയെന്നു സംശയിക്കുന്ന അയല്‍വാസിയും ബന്ധുവുമായ നെടുമല ദേവസ്യ(50)യെ തലപ്പുഴ പോലീസ് കസ്റ്റഡിയിലെടുത്തു. അതിര്‍ത്തി തര്‍ക്കമാണു കൊലയ്ക്കു കാരണമെന്നു പറയുന്നു.

സിഐ പി.കെ.മണി, തലപ്പുഴ എസ്‌ഐ ജിമ്മി, തൊണ്ടര്‍നാട് എസ്‌ഐ മഹേഷ് എന്നിവര്‍ സ്ഥലത്തെത്തി. മക്കള്‍: അലന്‍, അലോണ.