ലഫ്. ഗവര്‍ണര്‍ കോണ്‍ഗ്രസ് ഏജന്റെന്ന് കെജരിവാള്‍

ന്യൂഡല്‍ഹി: ഡല്‍ഹി ലഫ്റ്റനന്റ് ഗവര്‍ണര്‍ക്കെതിരെ ശക്തമായ ആരോപണങ്ങളുമായി ഡല്‍ഹി മുഖ്യമന്ത്രി അരവിന്ദ് കെജ്‌രിവാള്‍ രംഗത്തെത്തി. കോണ്‍ഗ്രസിന്റെ ഏജന്റായി പ്രവര്‍ത്തിക്കുകായാണ് ലഫ്. ഗവര്‍ണര്‍ നജീബ് ജംഗ്.

ഒരു പാര്‍ട്ടിയുടെയും തണലില്ലാതെ നെഞ്ചുവിരിച്ച് ഭരണഘടനയെ ബഹുമാനിക്കുകയാണ് താങ്കള്‍ ചെയ്യേണ്ടത്. പക്ഷേ എ.എ.പി സര്‍ക്കാര്‍ കൊണ്ടുവന്ന ജന്‍ലോക്പാല്‍ ബില്‍ സംബന്ധിച്ച് സോളിസിറ്റര്‍ ജനറല്‍ നല്‍കിയ നിയമോപദേശം മാധ്യമങ്ങള്‍ക്ക് ചോര്‍ത്തിക്കൊടുത്ത് ഇരിക്കുന്ന പദവിയുടെ വില കളയുകയാണ് ജംഗ് ചെയ്തത്.

ഇതിനുമുമ്പും ലഫ്.ഗവര്‍ണറുടെ ഓഫീസില്‍നിന്ന് ഇത്തരം രേഖകള്‍ ചോര്‍ന്നിട്ടുണ്ടെന്നും കെജരിവാള്‍ ആരോപിച്ചു. എ.എ.പി കൊണ്ടുവന്ന ബില്‍ നിയമവിരുദ്ധമാണെന്നായിരുന്നു സോളിസിറ്റര്‍ ജനറല്‍ മോഹന്‍ പരാശരന്‍ നല്‍കിയ നിയമോപദേശം. അതേസമയം ബില്ലുമായി മുന്നോട്ടുപോകാമെന്നാണ് തങ്ങള്‍ക്ക് ലഭിച്ചിരിക്കുന്ന നിയമോപദേശമെന്ന് കെജ്‌രിവാള്‍ മാധ്യമങ്ങളോട് പറഞ്ഞു.