പോലീസുകാരന്റെ കണ്ണില്‍ ബ്ലീച്ചിംഗ് പൗഡര്‍ വിതറി ബലാത്സംഗ വീരന്‍ രക്ഷപ്പെട്ടു

കല്‍പ്പറ്റ: കോടതിയില്‍ ഹാജരാക്കാന്‍ കൊണ്ടുവന്ന ബലാത്സംഗക്കേസിലെ പ്രതി  കോടതി പരിസരത്തുവെച്ച് പോലീസുകാരന്റെ കണ്ണില്‍ ബ്ലീച്ചിംഗ് പൗഡര്‍ വിതറി  ഓടിരക്ഷപെട്ടു. ഒടുവില്‍ പോലീസുകാരന്‍ തന്നെ പ്രതിയെ പിന്തുടര്‍ന്ന് പിടികൂടി കോടതിയില്‍ ഹാജരാക്കി.

 ബ്ലീച്ചിംഗ് പൗഡര്‍ വീണ് പോലീസുകാരന്റെ കണ്ണിന് ഗുരുതരമായി പരുക്കേറ്റു. ഇയാളെ ആശുപത്രിയില്‍ പ്രവേശിപ്പിച്ചിരിക്കയാണ്. കല്‍പ്പറ്റ പുത്തര്‍വയല്‍ എ. ആര്‍ ക്യാമ്പിലെ കോണ്‍സ്റ്റബിള്‍ വടകര സ്വദേശി രാജേഷി (28)ന്റെ കണ്ണിനാണ്  പരിക്കേറ്റത്.

ചൊവ്വാഴ്ച രാവിലെ 11.30 ഓടെ കല്‍പ്പറ്റ സിവില്‍ സ്‌റ്റേഷനു സമീപമുള്ള കോടതി വളപ്പിലാണ് സംഭവം. മകളെ ബലാത്സംഗം ചെയ്തു ഗര്‍ഭിണിയാക്കിയ കേസില്‍ റിമാന്റില്‍ കഴിയുന്ന പടിഞ്ഞാറെത്തറ വെളുക്കന്റെ മകന്‍ ഉണ്ണികൃഷ്ണനാണ് പോലീസുകാരനായ രാജേഷിനെ ആക്രമിച്ചത്. കല്‍പ്പറ്റ സെഷന്‍സ് കോടതിയില്‍ ഹാജരാക്കാന്‍ കൊണ്ടുവന്ന ഉണ്ണികൃഷ്ണന്‍ കേസ് വിളിക്കുന്നതിനിടെ മൂത്രമൊഴിക്കണമെന്ന് ആവശ്യപ്പെടുകയായിരുന്നു.

കോടതിയുടെ തൊട്ടടുത്തുള്ള മുത്രപ്പുരയില്‍ കയറിയ ഉണ്ണികൃഷ്ണന്‍ മൂത്രപ്പുരയിലുണ്ടായിരുന്ന ബ്ലീച്ചിംഗ് പൗഡറെടുത്ത് കാവല്‍ നിന്നിരുന്ന രാജേഷിന്റെ കണ്ണില്‍ എറിഞ്ഞ് കാപ്പിത്തോട്ടത്തിലൂടെ രക്ഷപ്പെടുകയായിരുന്നു. എന്നാല്‍ കണ്ണിലെ നീറ്റല്‍ അവഗണിച്ച് രാജേഷ് ഉണ്ണികൃഷ്ണനെ പിന്തുടര്‍ന്നു. കാപ്പിത്തോട്ടത്തില്‍ വെച്ച്  പിടികൂടിയപ്പോള്‍ ഉണ്ണികൃഷ്ണന്‍ രാജേഷിനെ കടിച്ചു പരുക്കേല്‍പ്പിക്കുകയും  കല്ലുകൊണ്ട് ഇടിക്കുകയും ചെയ്തു.

പോലീസുകാരനും പ്രതിയും തമ്മിലുള്ള മല്‍പിടുത്തത്തിനിടെ നാട്ടുകാര്‍ ഓടിയെത്തി  ഉണ്ണികൃഷ്ണനെ പിടിച്ചു കെട്ടി പോലീസിനെ വിവരമറിയിക്കുകയും പ്രതിയെ മജിസ്‌ട്രേറ്റിനു മുന്നില്‍ ഹാജരാക്കുകയും ചെയ്തു.

 മജിസ്‌ട്രേറ്റ് ഉണ്ണികൃഷ്ണനെ മാനന്തവാടി സബ് ജയിലിലേക്ക് അയച്ചു. കണ്ണിനു ഗുരുതരമായി പരിക്കേറ്റ രാജേഷിനെ കല്‍പ്പറ്റയിലെ സ്വകാര്യ കണ്ണാശുപത്രിയിലാണ്  പ്രവേശിപ്പിച്ചിരിക്കുന്നത്. രാജേഷിന്റെ  കണ്ണിലെ വെളുത്ത പാട നഷ്ടപ്പെട്ടതായാണ് ഡോക്ടര്‍മാര്‍ നല്‍കുന്ന വിവരം. കൃഷ്ണമണിക്കു ചുറ്റും നീല നിറം വ്യാപിച്ചിട്ടുണ്ട്.

അടിയന്തിരമായി വിദഗ്ധ ചികിത്സ ലഭ്യമാക്കണമെന്ന ഡോക്ടര്‍മാരുടെ അഭിപ്രായത്തെ തുടര്‍ന്ന്  രാജേഷിനെ കോഴിക്കോട്ടെ കണ്ണാശുപത്രിയിലേക്ക്  മാറ്റി.

ഡോക്ടര്‍മാരുടെ അഭിപ്രായത്തിനുശേഷം ആവശ്യമെങ്കില്‍ മധുരയിലുള്ള അരവിന്ദ് കണ്ണാശുപത്രിയിലേക്ക് രാജേഷിനെ കൊണ്ടു പോകുമെന്ന് പോലീസ് അറിയിച്ചു. ഉണ്ണികൃഷ്ണനെതിരെ വധശ്രമത്തിനു കേസെടുത്തതായി കല്‍പ്പറ്റ പോലീസ് കൂട്ടിച്ചേര്‍ത്തു.
ബുള്ളറ്റിടിച്ച് വഴിയാത്രക്കാരന്‍ മരിച്ചു