ആത്മഹത്യാശ്രമം നടത്തിയത് താനല്ലെന്നും സഹനടി സിന്ധുവെന്നും സിന്ധുമേനോന്‍

ചെന്നൈ: ആത്മഹത്യയ്ക്ക് ശ്രമിച്ചതായുള്ള വാര്‍ത്തകള്‍ ശരിയല്ലെന്ന് വെളിപ്പെടുത്തിക്കൊണ്ട് നടി സിന്ധു മേനോന്‍ രംഗത്തെത്തി. താന്‍ ഇപ്പോള്‍ ലണ്ടനിലാണെന്നും ഉറക്കഗുളിക കഴിച്ച് ആശുപത്രിയിലാണെന്ന വാര്‍ത്ത തെറ്റാണെന്നും സിന്ധു മേനോന്‍ അറിയിച്ചു. സിന്ധു എന്ന പേരുള്ള മറ്റൊരു സഹനടിയാണ് ആത്മഹത്യാശ്രമത്തെ തുടര്‍ന്ന് അത്യാഹിത വിഭാഗത്തില്‍ കഴിയുന്നതെന്നാണ് പുതിയ റിപോര്‍ട്ട്.

സിനിമയില്‍ സജീവമായിരുന്ന സിന്ധുമേനോന്‍ 2010ല്‍ യു.കെയിലെ ഐ.ടി. മേഖലയില്‍ ജോലിചെയ്യുന്ന ഡൊമിനിക് പ്രഭുവിനെ വിവാഹം കഴിച്ചതില്‍പിന്നെ അഭിനയരംഗത്ത് സജീവമായിരുന്നില്ല. സിന്ധുവിന്റെ അമ്മയുടെ അടുത്ത ബന്ധുവാണ് ഡൊമിനിക് പ്രഭു. സിനിമയില്‍ സജീവമായിരുന്ന സിന്ധു അടുത്ത ബന്ധുക്കളെ മാത്രം പങ്കെടുപ്പിച്ചുകൊണ്ടാണ് വിവാഹിതയായത്. വിവാഹം പെട്ടെന്ന് തീരുമാനിച്ചതുകൊണ്ടാണ് സിനിമാ മേഖലയിലെ പലരേയും ക്ഷണിക്കാതിരുന്നതെന്നാണ് ഇതേകുറിച്ച് സിന്ധു അറിയിച്ചത്. വിവാഹശേഷം സിന്ധു ഭര്‍ത്താവിനൊപ്പം യു.കെ.യിലേക്ക് പോവുകയായിരുന്നു. പിന്നീട് ചുരുക്കം ചില സിനിമകളില്‍ മാത്രമാണ് അഭിനയിച്ചത്.

വിവാഹബന്ധത്തിലുള്ള പ്രശ്‌നങ്ങളെ തുടര്‍ന്ന് സിന്ധു മേനോന്‍ ആത്മഹത്യയ്ക്ക് ശ്രമിച്ചുവെന്നാണ് വാര്‍ത്തകളുണ്ടായിരുന്നത്. ഉറക്ക ഗുളികകള്‍ കഴിച്ച് അബോധാവസ്ഥയിലായ സിന്ധു തമിഴ്‌നാട്ടിലെ സൂര്യ ആശുപത്രിയിലെ അത്യാഹിത വിഭാഗത്തില്‍ കഴിയുകയാണെന്നുള്ള വാര്‍ത്തകളാണ് പ്രചരിച്ചത്. എന്നാല്‍ ആത്മഹത്യാ വാര്‍ത്ത ശുദ്ധകളവാണെന്നറിയിച്ച് സിന്ധു മേനോന്‍ തന്നെയാണ് ഇപ്പോള്‍ ലണ്ടനില്‍ നിന്നും രംഗത്തുവന്നത്.

കഴിഞ്ഞ ദിവസം നടി കനകയുടെ മരണ വാര്‍ത്ത മാധ്യമങ്ങള്‍ തെറ്റായി നല്‍കിയതിന് പിന്നാലെയാണ് സിന്ധു മേനോന്റെ വാര്‍ത്തയും തെറ്റായി പ്രചരിച്ചത്.