മുണ്ടക്കയത്ത് പി.സി ജോര്‍ജിനു നേരെ യൂത്ത് കോണ്‍ഗ്രസ് പ്രവര്‍ത്തകരുടെ കരിങ്കൊടി പ്രയോഗം

കോട്ടയം: കോട്ടയം മുണ്ടക്കയത്ത് സര്‍ക്കാര്‍ ചീഫ് വിപ്പ് പി.സി ജോര്‍ജിനു നേരെ യൂത്ത് കോണ്‍ഗ്രസ് പ്രവര്‍ത്തകരുടെ  കരിങ്കൊടി പ്രയോഗം. മുണ്ടക്കയത്ത് യൂത്ത് കോണ്‍ഗ്രസ് - യൂത്ത് ഫ്രണ്ട് പ്രവര്‍ത്തകര്‍ തമ്മില്‍ രൂക്ഷമായ സംഘര്‍ഷം ഉണ്ടായി. സംഘര്‍ഷത്തില്‍ യൂത്ത് കോണ്‍ഗ്രസിന്റെ മൂന്ന്  വനിതാ പ്രവര്‍ത്തകര്‍ക്ക് പരിക്കേറ്റു.

സംഘര്‍ഷത്തിനിടെ അവിടെയെത്തിയ സി.പി.എം പ്രവര്‍ത്തകര്‍ ജോര്‍ജിന് അനുകൂലമായി മുദ്രാവാക്യം വിളിക്കുകയുണ്ടായി. അതേസമയം പി.സി ജോര്‍ജിനെതിരായ പ്രതിഷേധം തുടരുമെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കൂര്യാക്കോസ് പറഞ്ഞു. എല്‍.ഡി.എഫിനൊപ്പം ചേര്‍ന്ന് യു.ഡി.എഫിനെ തകര്‍ക്കാനാണ് ജോര്‍ജിന്റെ ശ്രമമെന്നും അദ്ദേഹം ആരോപിച്ചു. കഴിഞ്ഞ ദിവസം ഈരാറ്റുപേട്ടയില്‍ വെച്ചും പി.സി ജോര്‍ജിനെ യൂത്ത് കോണ്‍ഗ്രസ് പ്രവര്‍ത്തകര്‍ വഴിയില്‍ തടഞ്ഞിരുന്നു.

ഇതേതുടര്‍ന്ന് പി.സി ജോര്‍ജും യൂത്ത് കോണ്‍ഗ്രസ് പ്രവര്‍ത്തകരും തമ്മില്‍
ചെറിയരീതിയില്‍ വാക്കേറ്റമുണ്ടാകുകയും ചെയ്തു. മുഖ്യമന്ത്രി ഉമ്മന്‍ ചാണ്ടി തീക്കൊള്ളികൊണ്ട് തല ചൊറിയുകയാണെന്നായിരുന്നു യൂത്ത് കോണ്‍ഗ്രസ് പ്രവര്‍ത്തകര്‍ വഴിയില്‍ തടഞ്ഞ നടപടിയിലുള്ള  പി.സി ജോര്‍ജിന്റെ പ്രതികരണം. ഉമ്മന്‍ ചാണ്ടിയുടേയും ആന്റോ ആന്റണിയുടേയും ആളുകളാണ് തനിക്കെതിരെ തിരിഞ്ഞിരിക്കുന്നതെന്നും അദ്ദേഹം ആരോപിച്ചു.

Also Read: 
പീഡനത്തിനിരയായ ദളിത് യുവതി പ്രസവിച്ച കുഞ്ഞ് മരിച്ചു