കാട്ടാനകളെ പിന്തുടര്‍ന്ന് വടികൊണ്ട് അടിച്ചും, കല്ലെറിഞ്ഞും യുവാക്കളുടെ ക്രൂരത; വിഡിയോ പുറത്തുവിട്ടതോടെ 3പേര്‍ അറസ്റ്റില്‍

തിരുമൂര്‍ത്തി ഡാമിനു സമീപമാണ് സംഭവം നടന്നത്. ഇവിടുത്തെ ഗോത്രവര്‍ഗത്തില്‍ പെട്ട യുവാക്കളാണ് കാട്ടാനകളെ പിന്തുടര്‍ന്ന് ഉപദ്രവിച്ചത്. പതിവായി വനമേഖലയില്‍ കാലികളെ മേയിക്കാനെത്തുന്നവരാണ് യുവാക്കള്‍. ബുധനാഴ്ച രാവിലെ പതിവുപോലെ കാലികളുമായി എത്തിയപ്പോള്‍ രണ്ടാനകളും കുട്ടിയും ഇവിടേക്കെത്തുകയായിരുന്നു.

ആനകളെ കണ്ട യുവാക്കള്‍ ഉടന്‍തന്നെ വടിയും കല്ലുമുപയോഗിച്ച് അവയെ ആക്രമിക്കുകയായിരുന്നു. സഹികെട്ട ആന തിരിച്ച് ആക്രമിക്കാനെത്തുന്നതും യുവാക്കള്‍ ഓടുന്നതും ആന തിരികെ മടങ്ങുന്നതും വിഡിയോയില്‍ കാണാം. എന്നാല്‍ പിന്നീടും യുവാക്കള്‍ സംഘം ചേര്‍ന്ന് ആനകളെ ആക്രമിക്കുകയായിരുന്നു.

ആനകളെ ഉപ്രദ്രവിച്ച യുവാക്കള്‍ തന്നെയാണ് ദൃശ്യങ്ങള്‍ മൊബൈല്‍ ഫോണില്‍ പകര്‍ത്തിയത്. ഇവര്‍ ആനകളെ പിന്തുടര്‍ന്ന് കല്ലെറിയുന്നത് വിഡിയോയില്‍ വ്യക്തമാണ്. കാളിമുത്തു, സെല്‍വന്‍, അരുണ്‍ കുമാര്‍ എന്നിവരാണ് വൈല്‍ഡ് ലൈഫ് പ്രൊട്ടക്ഷന്‍ ആക്ട് പ്രകാരം അറസ്റ്റിലായത്. മൂന്ന് പേരെയും ഉടന്‍ റിമാന്‍ഡ് ചെയ്യുമെന്ന് പൊലീസ് ഉദ്യോഗസ്ഥര്‍ അറിയിച്ചു.