ചരിത്രമുറങ്ങുന്ന തലശ്ശേരിക്ക് പുതിയ വെളിച്ചം: ആത്മീയ ടൂറിസം പദ്ധതിക്ക് തുടക്കമാകുന്നു!

കണ്ണൂർ: (KVARTHA) തലശ്ശേരിയെ പൈതൃക തീർത്ഥാടന ടൂറിസം കേന്ദ്രമാക്കി മാറ്റുന്നതിനുള്ള സ്പിരിച്വൽ ടൂറിസം പദ്ധതിയുടെ നിർമ്മാണ പ്രവർത്തനങ്ങൾ ജൂൺ 30-നകം ആരംഭിക്കും. കേന്ദ്ര സർക്കാരിന്റെ സ്വദേശ് ദർശൻ 2.0 പദ്ധതിയിൽ ഉൾപ്പെടുത്തി 25 കോടി രൂപ അനുവദിച്ച ഈ പദ്ധതി 2026 മാർച്ച് 31-നകം പൂർത്തിയാക്കാനാണ് ലക്ഷ്യമിടുന്നത്.
 

നിയമസഭാ സ്പീക്കർ എ.എൻ. ഷംസീറിന്റെ അധ്യക്ഷതയിൽ നിയമസഭാ സമുച്ചയത്തിൽ ചേർന്ന യോഗത്തിലാണ് ഇത് സംബന്ധിച്ച നിർണായക തീരുമാനം കൈക്കൊണ്ടത്. പൊന്ന്യം കളരി അക്കാദമി, താഴെ അങ്ങാടി പൈതൃക പ്രദേശത്തിന്റെ പുനരുജ്ജീവനം, ചിറക്കകാവ് ഭഗവതി ക്ഷേത്രം, ജഗന്നാഥ ക്ഷേത്രം എന്നിവിടങ്ങളിലെ ടൂറിസ്റ്റ് അമിനിറ്റി സെന്ററുകൾ, ചൊക്ലി തെയ്യം സാംസ്കാരിക കേന്ദ്രം എന്നിവയാണ് ഈ പദ്ധതിയുടെ ഭാഗമായി വികസിപ്പിക്കുന്നത്.

എല്ലാ സ്ഥലങ്ങളിലും ഒരേ സമയം നിർമ്മാണം ആരംഭിക്കണമെന്നും, നിർമ്മാണ പ്രവർത്തനങ്ങളുടെ ഏകോപനം കേരള ടൂറിസം ഇൻഫ്രാസ്ട്രക്ച്ചർ ലിമിറ്റഡ് (KTIL) നിർവഹിക്കണമെന്നും സ്പീക്കർ നിർദ്ദേശിച്ചു.

ജൂൺ 20-നകം സാങ്കേതികാനുമതി ലഭ്യമാക്കി, പൊതുമരാമത്ത്, ടൂറിസം വകുപ്പ് മന്ത്രി പി.എ. മുഹമ്മദ് റിയാസിന്റെ സൗകര്യപ്രദമായ ദിവസം ജൂൺ അവസാന വാരം പൊന്ന്യം, ജഗന്നാഥ ക്ഷേത്രം, ചൊക്ലി എന്നീ മൂന്ന് കേന്ദ്രങ്ങളിൽ വെച്ച് പദ്ധതിയുടെ ഉദ്ഘാടനം നടത്താനും യോഗത്തിൽ തീരുമാനമായി.

പദ്ധതി സമയബന്ധിതമായി പൂർത്തിയാക്കാൻ ആവശ്യമായ എല്ലാ സഹായങ്ങളും മന്ത്രി വാഗ്ദാനം ചെയ്തിട്ടുണ്ടെന്നും, ഈ സ്പിരിച്വൽ ടൂറിസം പദ്ധതി തലശ്ശേരിയുടെ പൈതൃക ടൂറിസത്തിന് വലിയ മുതൽക്കൂട്ടാകുമെന്നും സ്പീക്കർ അഭിപ്രായപ്പെട്ടു.

യോഗത്തിൽ കേരള ടൂറിസം ഇൻഫ്രാസ്ട്രക്ച്ചർ ലിമിറ്റഡ് മാനേജിംഗ് ഡയറക്ടർ ഡോ. മനോജ് കുമാർ കെ., ജനറൽ മാനേജർ വിനോദ് കുമാർ, സ്പീക്കറുടെ പ്രൈവറ്റ് സെക്രട്ടറി ടി. മനോഹരൻ നായർ, അഡീഷണൽ പ്രൈവറ്റ് സെക്രട്ടറിമാരായ എസ്. ബിജു, അർജുൻ എസ്.കെ. തുടങ്ങിയവർ പങ്കെടുത്തു.

ഈ വാർത്തയെ കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Thalassery spiritual tourism project to commence by June 30.

#ThalasseryTourism, #SpiritualTourism, #SwadeshDarshan, #KeralaTourism, #KannurNews, #HeritageTourism