സ്ത്രീകൾക്ക് സുരക്ഷിതമായ രാത്രികാല യാത്ര ഉറപ്പാക്കാൻ തിരുവനന്തപുരത്ത് കെഎസ്ആർടിസിയുടെ പിങ്ക് ബസ് സർവീസിന് തുടക്കമായി, ഗതാഗത മന്ത്രി സി പി ജോൺ പദ്ധതി ഉദ്ഘാടനം ചെയ്തു

തിരുവനന്തപുരം: (KVARTHA) സ്ത്രീകൾക്ക് സൗജന്യ യാത്ര അനുവദിച്ചുള്ള പ്രിയദർശിനി പദ്ധതിക്ക് പിന്നാലെ സ്ത്രീകൾക്ക് മാത്രമായി പിങ്ക് ബസ് സർവീസ് ആരംഭിച്ച് കെഎസ്ആർടിസി. സംസ്ഥാന സർക്കാരിന്റെ നൂറ് ദിന കർമപരിപാടികളുടെ ഭാഗമായി കെഎസ്ആർടിസി ആരംഭിച്ച 'പിങ്ക് ബസ്- ലേഡീസ് ഒൺലി സർവീസിന്റെ' സംസ്ഥാനതല ഉദ്ഘാടനം ഗതാഗത വകുപ്പ് മന്ത്രി സി പി ജോൺ നിർവഹിച്ചു. 

ജൂലൈ 23 വ്യാഴാഴ്ച ഉച്ചയ്ക്ക് ഒന്നിന് തിരുവനന്തപുരം സെൻട്രൽ ഡിപ്പോയിലായിരുന്നു ഉദ്ഘാടനം. ഈ പദ്ധതിയിലൂടെ സ്ത്രീകൾക്ക് സുരക്ഷിതവും സ്വതന്ത്രവുമായ രാത്രി യാത്രയ്ക്ക് സാഹചര്യമൊരുക്കുകയാണ് സർക്കാരിന്റെ ലക്ഷ്യം.

ലക്ഷ്യം സുരക്ഷിതമായ രാത്രിയാത്ര

പ്രാരംഭ ഘട്ടമായി തിരുവനന്തപുരം നഗരത്തിൽ ടെക്നോപാർക്ക് റൂട്ടിലാണ് സർവീസ് നടത്തുന്നത്. കിഴക്കേക്കോട്ട, തമ്പാനൂർ, പട്ടം, മെഡിക്കൽ കോളജ് (ആർസിസി), ഉള്ളൂർ, കഴക്കൂട്ടം, ടെക്നോപാർക്ക്, ഇൻഫോസിസ്, ലുലു മാൾ, കിംസ് ആശുപത്രി എന്നിവിടങ്ങളിലൂടെയാണ് സർവീസ് ക്രമീകരിച്ചിട്ടുള്ളത്. വൈകുന്നേര സമയങ്ങളിലായിരിക്കും പ്രധാനമായും ബസ് സർവീസ് നടത്തുക. 

രാത്രി ഒമ്പത് മണിക്ക് ശേഷമുള്ള സ്ത്രീ യാത്രക്കാർ, ആശുപത്രി ജീവനക്കാർ, ട്രെയിൻ മാർഗം തമ്പാനൂരിലെത്തുന്ന രോഗികളും കൂട്ടിരിപ്പുകാരും, രാത്രി പത്തിനും രാവിലെ അഞ്ചിനുമിടയിലുള്ള ഷിഫ്റ്റുകളിൽ ജോലി കഴിഞ്ഞ് മടങ്ങുന്ന ഐടി ജീവനക്കാർക്കും സർവീസ് വലിയ ആശ്വാസമാകും.

ഓൺലൈൻ റിസർവേഷൻ വരും

സർവീസുകളുടെ കൃത്യത ഉറപ്പാക്കുന്നതിനും വരുമാനം വർധിപ്പിക്കുന്നതിനും ഓൺലൈൻ റിസർവേഷൻ സൗകര്യം ഒരുക്കാനും ഭാവിയിൽ ഇലക്ട്രിക് ബസുകൾ പിങ്ക് ബസായി ഓടിക്കാനുമാണ് കെഎസ്ആർടിസിയുടെ പദ്ധതി. കെഎസ്ആർടിസിയിൽ അടുത്തിടെ എത്തിയ ലിങ്ക് ബസുകളിൽ ഒന്നാണ് നിലവിൽ പിങ്ക് ബസായി ഓടിക്കുന്നത്. 

സ്ത്രീകൾക്ക് മാത്രമായുള്ള ഈ ബസിൽ യാത്രക്കാരെ കൂടാതെ ഡ്രൈവറും കണ്ടക്‌ടറുമെല്ലാം സ്ത്രീകളായിരിക്കുമെന്നതാണ് മറ്റൊരു പ്രത്യേകത. മാതൃഭൂമി സാഹിത്യോത്സവമായ 'ക'യുടെ വേദിയിൽ വെച്ച് മുൻ ഗതാഗത വകുപ്പ് മന്ത്രി കെ ബി ഗണേഷ് കുമാർ മുമ്പ് ഈ പദ്ധതി പ്രഖ്യാപിച്ചിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വിശേഷങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: The Kerala State Road Transport Corporation (KSRTC) has launched a 'Pink Bus' service exclusively for women to ensure safe night travel in Thiruvananthapuram. 

#KSRTCPinkBus #KeralaTransport #WomenSafety #TrivandrumNews #Technopark #KeralaNews #CPJohn #LadiesOnlyBus #AmmuNews