കെഎസ്ആർടിസി ബഡ്ജറ്റ് ടൂറിസത്തിന് റെക്കോർഡ് നേട്ടം; വരുമാനം 43 കോടി കടന്നു; ഗുരുവായൂർ പാക്കേജും ഉടൻ

തിരുവനന്തപുരം: (KVARTHA) നൂതന ആശയങ്ങളും ആകർഷകമായ പാക്കേജുകളുമായി കെഎസ്ആർടിസി ബഡ്ജറ്റ് ടൂറിസം സെൽ (BTC) കുതിക്കുന്നു. 2023-24 സാമ്പത്തിക വർഷത്തിൽ 23 കോടി രൂപയായിരുന്ന വാർഷിക വരുമാനം 2024-25 കാലയളവിൽ 43 കോടി രൂപയായി ഉയർത്തി കെഎസ്ആർടിസി വൻ നേട്ടം കൈവരിച്ചു. വൈവിധ്യമാർന്ന വിനോദസഞ്ചാര പദ്ധതികൾ ആവിഷ്‌കരിച്ച് നടപ്പിലാക്കിയതാണ് വരുമാനം ഇരട്ടിയാക്കാൻ സഹായിച്ചത്.

നഗരക്കാഴ്ചകളും ഗ്ലാസ് ടോപ്പ് യാത്രയും ഹിറ്റ്

തലസ്ഥാന നഗരിയുടെ സൗന്ദര്യം ആസ്വദിക്കാൻ 2024 മാർച്ചിൽ ആരംഭിച്ച 'തിരുവനന്തപുരം നഗരക്കാഴ്ചകൾ' എന്ന ഇലക്ട്രിക് ഡബിൾ ഡക്കർ ബസ് സർവീസ് വൻ വിജയമാണ്. 1,191 സർവീസുകളിലായി 2.77 കോടി രൂപയാണ് ഇതിലൂടെ വരുമാനം നേടിയത്. ഇതിൽ 2.08 കോടി രൂപയും പ്രവർത്തന ലാഭമാണ് എന്നത് പദ്ധതിയുടെ വിജയം തെളിയിക്കുന്നു.

മൂന്നാറിലെ വിനോദസഞ്ചാരത്തിന് പുത്തൻ ഉണർവ് നൽകിയ 'റോയൽ വ്യൂ' ഗ്ലാസ് ടോപ്പ് ഡബിൾ ഡെക്കർ സർവീസ് 2025 ഫെബ്രുവരിയിലാണ് ആരംഭിച്ചത്. 1.18 കോടി രൂപയുടെ കളക്ഷനാണ് ഈ സർവീസ് നേടിയത്.

 സഞ്ചാരികളുടെ തിരക്ക് വർധിച്ചതോടെ 2026 ജനുവരി 2 മുതൽ രണ്ടാമതൊരു ബസ് കൂടി 'റോയൽ വ്യൂ 2' എന്ന പേരിൽ സർവീസ് ആരംഭിച്ചിട്ടുണ്ട്. 2025 ജൂലൈയിൽ കൊച്ചിയിൽ ആരംഭിച്ച ഡബിൾ ഡെക്കർ സിറ്റി ടൂർ പദ്ധതിയിലൂടെ 3,712 യാത്രക്കാർ നഗരക്കാഴ്ചകൾ ആസ്വദിച്ചു.

വിദ്യാർത്ഥികൾക്കും തീർത്ഥാടകർക്കും അവസരം

വിദ്യാർത്ഥികൾക്കായി വിനോദവും വിജ്ഞാനവും കോർത്തിണക്കി നടപ്പിലാക്കിയ 'ട്രാവൽ ടു ടെക്നോളജി' പാക്കേജുകളും വിജയകരമായി മുന്നേറുന്നു. സ്‌കൂളുകളെയും കോളേജുകളെയും കേന്ദ്രീകരിച്ച് നടത്തിയ 310 ട്രിപ്പുകളിലൂടെ 27 ലക്ഷം രൂപയാണ് കെഎസ്ആർടിസിക്ക് ലഭിച്ചത്.

ദശാവതാര ക്ഷേത്രദർശനം, നാലമ്പല ദർശനം, പഞ്ചപാണ്ഡവ ക്ഷേത്രദർശനം, കൃപാസനം പാക്കേജ് തുടങ്ങിയവയ്ക്ക് പുറമെ രാമേശ്വരം, മധുര തുടങ്ങിയ അന്തർസംസ്ഥാന തീർത്ഥാടന പാക്കേജുകളും കെഎസ്ആർടിസിക്ക് അധിക വരുമാനം ഉറപ്പാക്കുന്നുണ്ട്. ബഡ്ജറ്റ് ടൂറിസത്തിനായി പ്രത്യേക തീമിൽ ബ്രാൻഡഡ് ബസുകൾ അവതരിപ്പിച്ചത് യാത്രക്കാരെ കൂടുതലായി ആകർഷിക്കാൻ സഹായിച്ചു.

ഗുരുവായൂർ പാക്കേജ് വരുന്നു

തീർത്ഥാടന ടൂറിസം പാക്കേജുകളിൽ ഏറ്റവും പുതിയതായി ഗുരുവായൂർ ദേവസ്വം ബോർഡുമായി കൈകോർക്കാനൊരുങ്ങുകയാണ് കെഎസ്ആർടിസി. ഈ പാക്കേജ് പ്രകാരം ഗുരുവായൂർ ക്ഷേത്രത്തിൽ പോകുന്നവർക്ക് ഡോർമെട്രി സൗകര്യവും പ്രത്യേക ക്യൂവിലൂടെ ദർശന സൗകര്യവും ഒരുക്കും. ഇത്തരത്തിൽ സാധാരണക്കാർക്ക് താങ്ങാവുന്ന നിരക്കിൽ മികച്ച യാത്രാ അനുഭവങ്ങൾ സമ്മാനിക്കുകയാണ് കെഎസ്ആർടിസി.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: KSRTC Budget Tourism Cell achieved a record revenue of ₹43 Crores in 2024-25. Success is driven by Trivandrum electric double-decker, Munnar glass-top buses, and pilgrim packages. A new Guruvayur package with special darshan is launching soon.

#KSRTC #BudgetTourism #KeralaTourism #Munnar #Trivandrum #Guruvayur #TravelKerala #DoubleDecker