കേരളത്തിന്‌ വീണ്ടും ആഗോള അംഗീകാരം; 2026-ലെ മികച്ച ട്രെൻഡിംഗ് യാത്രാ കേന്ദ്രങ്ങളുടെ പട്ടികയിൽ കൊച്ചി

തിരുവനന്തപുരം: (KVARTHA) കേരളത്തിൻ്റെ വിനോദസഞ്ചാര മേഖലയ്ക്ക് ആഗോള തലത്തിൽ വീണ്ടും തിളക്കമാർന്ന അംഗീകാരം. അന്താരാഷ്ട്ര തലത്തിലുള്ള പ്രമുഖ ഓൺലൈൻ യാത്രാ ബുക്കിങ് പ്ലാറ്റ്‌ഫോമായ ബുക്കിങ് ഡോട് കോം പുറത്തിറക്കിയ 2026-ൽ നിർബന്ധമായും കണ്ടിരിക്കേണ്ട വിനോദസഞ്ചാര കേന്ദ്രങ്ങളുടെ പട്ടികയിൽ കൊച്ചി ഇടം നേടി.

വിയറ്റ്നാം, സ്പെയിൻ, കൊളംബിയ, ചൈന, ബ്രസീൽ, ഓസ്ട്രേലിയ, ജർമ്മനി, യുഎസ്എ തുടങ്ങിയ രാജ്യങ്ങളിലെ ലോകോത്തര ഡെസ്റ്റിനേഷനുകൾ ഉൾപ്പെട്ട ഈ പട്ടികയിൽ ഇന്ത്യയിൽ നിന്ന് തിരഞ്ഞെടുക്കപ്പെട്ട ഏക നഗരമാണ് കൊച്ചി. 'ട്രെൻഡിംഗ് ഡെസ്റ്റിനേഷനുകൾ' എന്ന തലക്കെട്ടോടെ ബുക്കിങ്(dot)കോം തയ്യാറാക്കിയ പത്തു കേന്ദ്രങ്ങളുടെ പട്ടികയിലാണ് കൊച്ചിയുടെ ഈ അഭിമാനകരമായ നേട്ടം.

കൊച്ചിക്ക് ലഭിച്ച ഈ ആഗോള അംഗീകാരം കേരള ടൂറിസത്തെ സംബന്ധിച്ചിടത്തോളം വലിയൊരു നേട്ടമാണെന്ന് സംസ്ഥാന ടൂറിസം വകുപ്പ് മന്ത്രി പി. എ. മുഹമ്മദ് റിയാസ് അഭിപ്രായപ്പെട്ടു. ലോക ടൂറിസം ഭൂപടത്തിൽ കേരള ടൂറിസത്തെ കൂടുതൽ ശക്തമായി അടയാളപ്പെടുത്തുന്ന നേട്ടമാണിത്. 

വിവിധ രാജ്യങ്ങളിൽ നിന്നുള്ള സഞ്ചാരികളെ കേരളത്തിലേക്ക് ആകർഷിക്കാൻ ഈ അംഗീകാരം ഏറെ ഗുണകരമാകുമെന്നും, സംസ്ഥാനത്തെ ടൂറിസം വളർച്ചയ്ക്ക് ഇത് കൂടുതൽ ഉത്തേജനം നൽകും.

നൂറ്റാണ്ടുകളുടെ ചരിത്രവും സംസ്കാരവും സമന്വയിക്കുന്ന കൊച്ചിയുടെ തനിമയാണ് ഈ അംഗീകാരത്തിന് പ്രധാന കാരണം. മനോഹരമായ തീരദേശ കാഴ്ചകളും, ലോകോത്തര ആർട്ട് ഗ്യാലറികളും, സാംസ്കാരിക പൈതൃകം വിളിച്ചോതുന്ന ചരിത്ര സ്മാരകങ്ങളും, വിദേശരാജ്യങ്ങളുമായുള്ള വാണിജ്യ ബന്ധങ്ങളുടെ ചരിത്ര ശേഷിപ്പുകളും കൊച്ചിയുടെ പ്രത്യേകതകളാണ്. ഈ ഘടകങ്ങളെല്ലാം നഗരത്തെ ഒരു ആഗോള ടൂറിസം കേന്ദ്രമായി ഉയർത്തിക്കൊണ്ടുവരാൻ സഹായിച്ചു.

കൊച്ചി, ഫോർട്ട് കൊച്ചി പ്രദേശങ്ങൾ കേന്ദ്രീകരിച്ചുള്ള ആർട്ട് ബിനാലെ, വാട്ടർഫ്രണ്ട് കാഴ്ചകൾ, വിവിധ രാജ്യങ്ങളിലെ രുചികൾ സമന്വയിക്കുന്ന പാചക രീതികൾ, പുരാതനമായ കെട്ടിടങ്ങൾ തുടങ്ങിയവയെല്ലാം ലോക സഞ്ചാരികളെ കൊച്ചിയിലേക്ക് ആകർഷിക്കുന്ന പ്രധാന ഘടകങ്ങളാണ്. 2026-ൽ ലോകമെമ്പാടുമുള്ള സഞ്ചാരികൾ തങ്ങളുടെ യാത്രാ പദ്ധതികളിൽ കൊച്ചിയെ ഉൾപ്പെടുത്താൻ സാധ്യതയുണ്ടെന്നതിൻ്റെ സൂചനയാണ് ബുക്കിങ്(dot)കോമിൻ്റെ ഈ പട്ടിക.

കേരളത്തിൻ്റെ ടൂറിസം ഉൽപ്പന്നങ്ങൾക്ക് ലഭിക്കുന്ന ഇത്തരത്തിലുള്ള അന്താരാഷ്ട്ര അംഗീകാരങ്ങൾ സംസ്ഥാനത്തിൻ്റെ സമ്പദ്‌വ്യവസ്ഥയ്ക്കും ടൂറിസം മേഖലയുമായി ബന്ധപ്പെട്ട് പ്രവർത്തിക്കുന്ന എല്ലാ വിഭാഗം ജനങ്ങൾക്കും വലിയ പ്രതീക്ഷ നൽകുന്ന ഒന്നാണ്. കൊച്ചിയുടെ ഈ നേട്ടം വരും വർഷങ്ങളിൽ കേരള ടൂറിസത്തിന് വൻ കുതിച്ചുചാട്ടത്തിന് വഴിയൊരുക്കുമെന്നാണ് വിലയിരുത്തൽ.

കേരളത്തിൻ്റെ അഭിമാനമായ കൊച്ചിക്ക് ലഭിച്ച ആഗോള അംഗീകാരം പങ്കുവെക്കൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Article Summary: Kochi is listed among Booking(dot)com's top trending travel destinations for 2026, the only Indian city on the list.

#Kochi #KeralaTourism #GlobalRecognition #Bookingcom #TrendingDestination #TravelNews