ഇനി പഞ്ചനക്ഷത്ര കള്ള് ഷാപ്പുകളും, ടോഡി ബോർഡ് താൽപര്യപത്രം ക്ഷണിച്ച് നടപടികൾ ആരംഭിച്ചു

തിരുവനന്തപുരം: (KVARTHA) കേരളത്തിന്റെ ടൂറിസം മേഖലയ്ക്ക് പുതിയ ഉണർവ് നൽകിക്കൊണ്ട് പഞ്ചനക്ഷത്ര കള്ള് ഷാപ്പുകൾ ആരംഭിക്കാൻ ടോഡി ബോർഡ് താൽപര്യപത്രം ക്ഷണിച്ചു. സ്വന്തമായി സ്ഥലമുള്ളവർക്കും സ്ഥലം പാട്ടത്തിനെടുത്തവർക്കും പദ്ധതിയിലേക്ക് അപേക്ഷ നൽകാം. വിദേശികൾ ഉൾപ്പെടെയുള്ള വിനോദസഞ്ചാരികളെ ആകർഷിക്കുകയാണ് ലക്ഷ്യം. കള്ള് കുപ്പികളിലാക്കി വിൽക്കുന്നതിനുള്ള നടപടികൾ പുരോഗമിക്കുകയാണെന്ന് ടോഡി ബോർഡ് ചെയർമാൻ യു.പി. ജോസഫ് വ്യക്തമാക്കി.

സർക്കാർ വിനോദസഞ്ചാര മേഖലകളായി പ്രഖ്യാപിച്ച സ്ഥലങ്ങളിലാണ് ഈ പുതിയ ഷാപ്പുകൾക്ക് അനുമതി നൽകുക. ഇവിടെ, കള്ള് ഷാപ്പും അനുബന്ധ റെസ്റ്റോറന്റും രണ്ട് വ്യത്യസ്ത ഭാഗങ്ങളിലായിരിക്കും പ്രവർത്തിക്കുക. രണ്ട് സ്ഥാപനങ്ങളിലേക്കും പോകാൻ പ്രത്യേക വഴികളും ഉണ്ടാകണം. വിനോദസഞ്ചാരികളെ ലക്ഷ്യമിട്ട് ശുചിമുറി, കുട്ടികൾക്കായുള്ള പാർക്ക് തുടങ്ങിയ സൗകര്യങ്ങളും ഇവിടെ നിർബന്ധമാണ്. ബോർഡ് നിശ്ചയിച്ച മാനദണ്ഡങ്ങൾ അനുസരിച്ചുള്ള ഭക്ഷണക്രമമാണ് ഇവിടെ ഒരുക്കേണ്ടത്. അബ്കാരി ചട്ടങ്ങൾ പാലിച്ചുകൊണ്ട് ഷാപ്പ് നടത്താനാവശ്യമായ തെങ്ങുകൾ അപേക്ഷകർക്ക് സ്വന്തമായി ഉണ്ടായിരിക്കണം. തെങ്ങുകൾ ലഭ്യമല്ലെങ്കിൽ ടോഡി ബോർഡ് നേരിട്ട് ഇടപെട്ട് കള്ള് ഷാപ്പുകളിൽ എത്തിക്കാനുള്ള സൗകര്യമൊരുക്കുമെന്നും അധികൃതർ അറിയിച്ചു.

പുതിയ കള്ള് ഷാപ്പുകൾക്ക് ഫോർ സ്റ്റാർ, ഫൈവ് സ്റ്റാർ പദവികളാണ് നൽകുക. അപേക്ഷകരുടെ സൗകര്യങ്ങളും നിലവാരവും ബോർഡ് നേരിട്ട് പരിശോധിച്ച ശേഷം മാത്രമായിരിക്കും ഈ പദവികൾ നൽകുക. ഈ പദവിക്ക് ആറ് വർഷത്തെ കാലാവധിയുണ്ടായിരിക്കും. ഷാപ്പ് നടത്തുന്നവർക്ക് ആവശ്യമായ തൊഴിലാളികളെയും, കള്ള് ചെത്താനറിയാത്തവർക്ക് അതിനുള്ള പരിശീലനവും ബോർഡ് നൽകും. ഈ പദ്ധതിയിലേക്കുള്ള അപേക്ഷകൾ സെപ്റ്റംബർ 30 വരെ നൽകാവുന്നതാണ്.

കള്ള് കേടുകൂടാതെ കുപ്പികളിലാക്കി കടകളിലൂടെ വിൽപ്പന നടത്തുകയാണ് ടോഡി ബോർഡിന്റെ അടുത്ത പ്രധാന ലക്ഷ്യം. ഇത് കള്ളിന്റെ ലഭ്യത കൂട്ടാനും ശുദ്ധമായ കള്ള് ഉപഭോക്താക്കളിലേക്ക് നേരിട്ടെത്തിക്കാനും സഹായിക്കും.
 

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kerala Toddy Board invites applications for four and five-star toddy shops to boost tourism.

#KeralaTourism #ToddyShops #KeralaNews #ToddyBoard #TourismIndia #Kerala