ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽ നിന്നും കോഴിക്കോട്ടേക്ക് കർണാടക ആർടിസിയുടെ ആദ്യ ഫ്ലൈ ബസ് സർവീസ് ജൂലൈ 17 വെള്ളിയാഴ്ച മുതൽ ആരംഭിക്കുന്നു; ടിക്കറ്റ് നിരക്ക് 1,550 രൂപ

കോഴിക്കോട്: (KVARTHA) കർണാടക സ്റ്റേറ്റ് റോഡ് ട്രാൻസ്പോർട്ട് കോർപ്പറേഷൻ്റെ കേരളത്തിലേക്കുള്ള പുതിയ ഫ്ലൈ ബസ് ജൂലൈ 17 വെള്ളിയാഴ്ച മുതൽ സർവീസ് തുടങ്ങും. കേരളത്തിലേക്കുള്ള കർണാടക ആർടിസിയുടെ ആദ്യ ഫ്ലൈ ബസ് സർവീസാണിത്. ബെംഗളൂരു കെംപെഗൗഡ അന്താരാഷ്ട്ര വിമാനത്താവളത്തിൽ നിന്നും കോഴിക്കോട്ടേക്കും തിരിച്ചുമാണ് ഈ പ്രതിദിന സർവീസ് നടത്തുന്നത്. 41 സീറ്റുള്ള സെമി സ്ലീപ്പർ എസി ബസ് ഉപയോഗിച്ചാണ് സർവീസ്. ബെംഗളൂരു വിമാനത്താവളത്തിലെ ഒന്നാം ടെർമിനലിൽ നിന്ന് യാത്ര തുടങ്ങി രണ്ടാം ടെർമിനലിലെ യാത്രക്കാരെയും കയറ്റിയാകും ബസ് കോഴിക്കോട്ടേക്ക് യാത്ര തിരിക്കുക.

സമയക്രമവും നിരക്കും

ബെംഗളൂരിൽ നിന്നും രാത്രി 10:45-ന് പുറപ്പെടുന്ന ബസ് പിറ്റേദിവസം രാവിലെ 7:15-ന് കോഴിക്കോട് എത്തും. മൈസൂരു (2:45), ഹുൻസൂർ (3:30), ഗോണികൊപ്പ (4:15), കുട്ട (4:50), മാനന്തവാടി (5:20), കൽപറ്റ (6:05), താമരശ്ശേരി (6:30) എന്നിങ്ങനെയാണ് മറ്റു സ്റ്റോപ്പുകളിലെ സമയക്രമം. കോഴിക്കോട് നിന്നും രാത്രി 7:30-നാണ് മടക്കയാത്ര. പിറ്റേദിവസം പുലർച്ചെ 5:15-ന് ബെംഗളൂരു വിമാനത്താവളത്തിൽ എത്തും. കൽപറ്റ (8:40), മാനന്തവാടി (9:15), കുട്ട (10:15), ഗോണികൊപ്പ (10:50), ഹുൻസൂർ (11:00), മൈസൂരു (12:30) എന്നിങ്ങനെയാണ് മടക്കയാത്രയിൽ മറ്റു സ്റ്റോപ്പുകളിലെ സമയം. ബെംഗളൂരു സിറ്റിയിലെ നയന്ദഹള്ളി മെട്രോ സ്റ്റേഷനിലും ബസിന് സ്റ്റോപ്പ് ഉണ്ടാകും. ബെംഗളൂരു-കോഴിക്കോട് യാത്രയ്ക്ക് 1,550 രൂപയാണ് ടിക്കറ്റ് നിരക്ക്.

യാത്രക്കാർക്ക് വലിയ ആശ്വാസം

മലബാറിൽ നിന്നുള്ള യാത്രക്കാർക്ക് കർണാടക ആർടിസിയുടെ പുതിയ സർവീസ് ഏറെ പ്രയോജനപ്പെടും. ബെംഗളൂരിൽ വിമാനമിറങ്ങി നാട്ടിലെത്താൻ വലിയ തുക മുടക്കി ടാക്സി വിളിക്കുന്നവർക്ക് ഈ ബസ് സർവീസ് സഹായകമാകുമെന്നാണ് വിലയിരുത്തൽ. ബെംഗളൂരു വിമാനത്താവളത്തിലിറങ്ങി കേരളത്തിലേക്ക് പോകാൻ ട്രെയിൻ കയറാനായി റെയിൽവേ സ്റ്റേഷനിലേക്ക് പോകുന്നതിന് ഗതാഗതക്കുരുക്കിൽപ്പെട്ട് രണ്ട് മണിക്കൂറോളം സമയം നഷ്ടപ്പെടാറുണ്ട്. പുതിയ ഫ്ലൈ ബസ് വരുന്നതോടെ ഈ ബുദ്ധിമുട്ട് ഒഴിവാക്കാം. കർണാടക ആർടിസിയുടെ ഔദ്യോഗിക വെബ്സൈറ്റിലൂടെ ഓൺലൈനായി ടിക്കറ്റുകൾ ബുക്ക് ചെയ്യാമെന്ന് ലൈസൺ ഓഫീസർ ജി പ്രശാന്ത് അറിയിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ അപ്ഡേറ്റുകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Karnataka RTC launches Fly Bus service from Bengaluru to Kozhikode.

#KarnatakaRTC #FlyBus #BengaluruToKozhikode #KeralaNews #KempegowdaAirport #TravelNews