കണ്ണൂർ വിമാനത്താവളത്തിൽ അന്താരാഷ്ട്ര യാത്രക്കാരുടെ എണ്ണം കുറഞ്ഞു; കിയാലിന് തിരിച്ചടി

കണ്ണൂർ: (KVARTHA) യാത്രക്കാരുടെ എണ്ണത്തിൽ കുറവ് നേരിട്ടതോടെ കണ്ണൂർ അന്താരാഷ്ട്ര വിമാനത്താവളത്തിന് വൻ തിരിച്ചടി. ശൈത്യകാല ഷെഡ്യൂളിൽ പല സർവീസുകളും നിർത്തിയതോടെ മട്ടന്നൂർ വിമാനത്താവളത്തിൽ അന്താരാഷ്ട്ര യാത്രക്കാരുടെ എണ്ണം കുറയുകയായിരുന്നു.

എയർപോർട്ട് അതോറിറ്റിയുടെ കണക്ക് പ്രകാരം ഒക്ടോബറിൽ മുൻ മാസത്തേക്കാൾ 7074 അന്താരാഷ്ട്ര യാത്രക്കാരുടെ കുറവാണ് ഉണ്ടായത്. അതേസമയം, ആഭ്യന്തര യാത്രക്കാരുടെ എണ്ണത്തിൽ വർധനയുണ്ടായി. ഒക്ടോബറിൽ 4016 പേരുടെ വർധനയാണ് ആഭ്യന്തര യാത്രക്കാരുടെ കാര്യത്തിൽ രേഖപ്പെടുത്തിയത്.

ഒക്ടോബർ മാസത്തിൽ 82,676 അന്താരാഷ്ട്ര യാത്രക്കാരും 38,893 ആഭ്യന്തര യാത്രക്കാരുമാണ് കണ്ണൂർ വഴി യാത്ര ചെയ്തത്. ജൂലായ്, ഓഗസ്റ്റ് മാസങ്ങളിൽ അന്താരാഷ്ട്ര യാത്രക്കാരുടെ എണ്ണം ഒരു ലക്ഷം കടന്നിരുന്നു. എന്നാൽ, സെപ്റ്റംബറിൽ ഇത് 89,750 ആയി കുറഞ്ഞു.

എയർ ഇന്ത്യ എക്‌സ്‌പ്രസ് സർവീസുകൾ വെട്ടിക്കുറച്ചതോടെ ആഴ്ചയിൽ 42 സർവീസുകളുടെ കുറവാണുണ്ടായത്. കുവൈത്ത്, ദമാം, ബഹ്‌റൈൻ, ജിദ്ദ എന്നിവിടങ്ങളിലേക്കുള്ള സർവീസുകളാണ് നിലവിൽ നിർത്തിയത്. ഇവ ഇനി വേനൽക്കാല ഷെഡ്യൂളിലാണ് പുനരാരംഭിക്കുക.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: International passenger count at Kannur Airport dropped by 7074 in October after Air India Express cut 42 weekly services.

#KannurAirport #KIAL #InternationalTravel #AirIndiaExpress #KeralaNews #GulfTravel