ഗുരുവായൂർ - എറണാകുളം പാസഞ്ചർ ഉൾപ്പെടെയുള്ള ട്രെയിനുകൾ മണിക്കൂറുകൾ വൈകുന്നു; ഇരുട്ടടിപോലെ കോച്ചുകളും കുറച്ചു, വലഞ്ഞ് യാത്രക്കാർ
ADVERTISEMENT
● ഒല്ലൂരിനും പുതുക്കാടിനുമിടയിലെ പാത നവീകരണ ജോലികളാണ് ട്രെയിനുകൾ വൈകാൻ കാരണം
● കോച്ച് കേടായതിനെത്തുടർന്ന് അറ്റകുറ്റപ്പണിക്കായി അയച്ചതാണ് കോച്ചുകൾ കുറയാൻ കാരണം
● രാത്രി വൈകിയെത്തുന്നതിനാൽ ബസുകൾ കിട്ടാതെ ഓട്ടോറിക്ഷകളെ ആശ്രയിക്കേണ്ടി വരുന്നു
● സ്ഥിരം ഒരേ സ്ഥലത്ത് ട്രെയിൻ എൻജിൻ നിർത്താൻ ലോക്കോ പൈലറ്റുമാർക്ക് നിർദേശം നൽകി
തൃശൂർ: (KVARTHA) ഗുരുവായൂർ - എറണാകുളം പാസഞ്ചറിന് പുറമെ, എറണാകുളത്ത് നിന്നുള്ള പാസഞ്ചർ ട്രെയിനുകളും മണിക്കൂറുകൾ വൈകുന്നു. വ്യാഴാഴ്ച (സെപ്റ്റംബർ 10) രാത്രി 7.40-ന് എറണാകുളത്ത് നിന്ന് പുറപ്പെട്ട ഗുരുവായൂർ പാസഞ്ചർ രാത്രി 10.45-നാണ് തൃശൂരിൽ എത്തിയത്.
രാത്രി 9.22-ന് തൃശൂരിൽ എത്തേണ്ട ട്രെയിനാണിത്. മറ്റ് ട്രെയിനുകൾ കടന്നുപോകാനായി ഈ ട്രെയിൻ പിടിച്ചിടുകയായിരുന്നു. രാവിലെ 6.10-ന് എറണാകുളത്ത് നിന്ന് പുറപ്പെട്ട് 8.45-ന് ഗുരുവായൂർ എത്തേണ്ട ട്രെയിൻ കഴിഞ്ഞദിവസം മണിക്കൂറുകളാണ് വൈകിയത്. ഇതിനുമുൻപ് പോകേണ്ട ചെന്നൈ എഗ്മോർ - ഗുരുവായൂർ ട്രെയിൻ വൈകിയതോടെ പാസഞ്ചർ പിടിച്ചിടുകയായിരുന്നു.
ദുരിതത്തിലായി യാത്രക്കാർ
തൃശൂരിൽ നിന്നും എറണാകുളത്തേക്കുള്ള ഗുരുവായൂർ - എറണാകുളം പാസഞ്ചറും ദിവസവും വൈകിയാണ് ഓടുന്നത്. ഇതിന് പുറമെ ട്രെയിനിലെ കോച്ചും വെട്ടിക്കുറച്ചു. തൃശൂരിൽ ഇറങ്ങി വിവിധ സ്ഥലങ്ങളിലേക്ക് സ്വകാര്യ ബസുകൾ മാറിക്കയറുന്ന യാത്രക്കാർക്കാണ് ട്രെയിനുകൾ പിടിച്ചിടുന്നത് ഏറെ ദുരിതമാകുന്നത്. ട്രെയിൻ വൈകിയെത്തുന്നതിനാൽ പലർക്കും നേരിട്ടുള്ള ബസുകൾ കിട്ടാറില്ല. ഇതോടെ വലിയ തുക നൽകി ഓട്ടോറിക്ഷ വിളിച്ചാണ് യാത്രികർ പലരും ലക്ഷ്യസ്ഥാനത്തെത്തുന്നത്.
റെയിൽവേയുടെ വിശദീകരണം
ഒല്ലൂരിനും പുതുക്കാടിനുമിടയിൽ പാത നവീകരിക്കുന്ന ജോലികൾ കാരണമാണ് പാസഞ്ചർ ട്രെയിനുകൾ വൈകുന്നതെന്നാണ് റെയിൽവേ നൽകുന്ന വിശദീകരണം. ഈ പാസഞ്ചറിൻ്റെ ഒരു റേക്ക് കേടായതിനെത്തുടർന്ന് അറ്റകുറ്റപ്പണിക്കായി അയച്ചതിനാലാണ് കോച്ചുകൾ കുറയുന്നതെന്നാണ് റെയിൽവേ ഭാഷ്യം.
ഇതിനിടെ, യാത്രക്കാരുടെ സൗകര്യത്തിനായി സ്ഥിരം ഒരേ സ്ഥലത്ത് ട്രെയിൻ എൻജിൻ നിർത്താൻ ലോക്കോ പൈലറ്റുമാർക്ക് നിർദേശം നൽകിയതായി തൃശൂർ റെയിൽവേ സ്റ്റേഷൻ മാനേജർ ഫിലോപ്പോസ് അറിയിച്ചു.
ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം
Article Summary: Passengers traveling on the Guruvayur-Ernakulam route are facing severe hardships as passenger trains are consistently delayed by hours due to track renovation work between Ollur and Pudukad, and the situation is worsened by a reduction in coaches for maintenance.
#Kvartha #GuruvayurErnakulamPassenger #KeralaRailways #ThrissurRailwayStation #TrainDelay #SouthernRailway #MalayalamNews #KeralaNews #AmmuNews
