തീരദേശ പാത ഇരട്ടിപ്പിക്കൽ: 10 വർഷത്തെ അനിശ്ചിതത്വത്തിന് വിരാമം; കെ സി വേണുഗോപാൽ എംപിയുടെ ഇടപെടൽ ഫലം കണ്ടു, പദ്ധതി മൂന്നായി വിഭജിച്ച് നടപ്പിലാക്കും

ആലപ്പുഴ: (KVARTHA) തീരദേശ റെയിൽപ്പാത ഇരട്ടിപ്പിക്കൽ സംബന്ധിച്ച് കഴിഞ്ഞ പത്തു വർഷമായി തുടരുന്ന അനിശ്ചിതത്വത്തിന് കെ സി വേണുഗോപാൽ എംപിയുടെ ശക്തമായ ഇടപെടലിലൂടെ വിരാമമാകുന്നു. 

ആലപ്പുഴ വഴിയുള്ള പാത ഇരട്ടിപ്പിക്കൽ ഒരൊറ്റ പദ്ധതിയായി നടപ്പിലാക്കുന്നതിലെ കാലതാമസം ഒഴിവാക്കാൻ, ഇതിനെ മൂന്ന് പ്രത്യേക പദ്ധതികളായി വിഭജിച്ച് നിർമ്മാണം വേഗത്തിലാക്കണമെന്ന കെ സി വേണുഗോപാലിന്റെ നിർദ്ദേശം റെയിൽവേ ബോർഡ് അംഗീകരിച്ചു.

ഡി പി ആർ ജനുവരിയോടെ

ഒക്ടോബർ മാസം പത്താം തീയതി ആലപ്പുഴയിൽ നടന്ന അവലോകന യോഗത്തിൽ തിരുവനന്തപുരം ഡിവിഷണൽ റെയിൽവേ മാനേജർ കെ സി വേണുഗോപാലിനെ പദ്ധതിയുടെ പുരോഗതി അറിയിച്ചിരുന്നു. ജനുവരിയോടെ ഇതിന്റെ ഡിറ്റൈൽഡ് പ്രോജക്ട് റിപ്പോർട്ട് (ഡി പി ആർ) പൂർത്തിയാക്കുമെന്നാണ് ഉദ്യോഗസ്ഥർ ഉറപ്പ് നൽകിയിരിക്കുന്നത്.

പദ്ധതി മൂന്ന് ഘട്ടങ്ങളായി; ആദ്യഘട്ടം അമ്പലപ്പുഴ-ആലപ്പുഴ

മൊത്തം പദ്ധതിച്ചെലവ് മൂന്നായി വിഭജിച്ചാണ് നിർമ്മാണം നടത്തുക. ഇതനുസരിച്ച് അമ്പലപ്പുഴ മുതൽ ആലപ്പുഴ വരെയുള്ള 12.12 കിലോമീറ്റർ പാത ഇരട്ടിപ്പിക്കുന്നത് ആദ്യഘട്ടമായി ഏറ്റെടുക്കുന്നതിന് തീരുമാനമായിട്ടുണ്ട്. ഇത് നിർമ്മാണ പ്രവർത്തനങ്ങൾ വേഗത്തിലാക്കാൻ സഹായിക്കും.

പി എ സി യോഗത്തിലെ ഇടപെടൽ

തുടർന്ന് ഡിസംബറിൽ ചെന്നൈയിൽ നടന്ന റെയിൽവേ കാര്യങ്ങൾ ചർച്ച ചെയ്ത പബ്ലിക് അക്കൗണ്ട്സ് കമ്മിറ്റിയുടെ (പി എ സി) യോഗത്തിലും കെ സി വേണുഗോപാൽ വിഷയം ശക്തമായി ഉന്നയിച്ചു. അമ്പലപ്പുഴ – ആലപ്പുഴ പാത ഇരട്ടിപ്പിക്കൽ സംബന്ധിച്ച് പുതുക്കിയ എസ്റ്റിമേറ്റിന് ഉടൻ അംഗീകാരം നൽകണമെന്ന് അദ്ദേഹം ആവശ്യപ്പെട്ടു.

ബാക്കിയുള്ള ഏക മേഖല

കേരളത്തിൽ പാത ഇരട്ടിപ്പിക്കൽ പൂർത്തിയാകാത്ത ഏക മേഖല അമ്പലപ്പുഴ – കുമ്പളം വരെയുള്ള തീരദേശ പാതയാണ്. ഇതിൽ തുറവുർ മുതൽ കുമ്പളം വരെയുള്ള പാത ഇരട്ടിപ്പിക്കലിന് നേരത്തെ അനുമതി ലഭിച്ചിരുന്നു. ഈ ഭാഗത്ത് സ്ഥലം ഏറ്റെടുക്കുന്ന നടപടികൾ പുരോഗമിക്കുകയാണ്. 

എന്നാൽ, ബാക്കിയുള്ള അമ്പലപ്പുഴ – തുറവൂർ പ്രദേശത്തെ അനിശ്ചിതത്വമായിരുന്നു പ്രധാന തടസ്സം. ഇത് പരിഹരിക്കാൻ പദ്ധതി മൂന്നായി വിഭജിച്ച് എസ്റ്റിമേറ്റ് പുതുക്കണമെന്ന നിർദേശം വേണുഗോപാൽ നേരത്തെ തന്നെ കേന്ദ്ര റെയിൽവേ മന്ത്രാലയത്തോടും റെയിൽവേ ബോർഡിനോടും ആവശ്യപ്പെട്ടിരുന്നു.

രണ്ടാം റീച്ചിന് 430 കോടി

രണ്ടാം റീച്ചായി മാരാരിക്കുളം – തുറവൂർ പാത ഇരട്ടിപ്പിക്കൽ പരിഗണിക്കും. ഇതിന്റെ പുതുക്കിയ എസ്റ്റിമേറ്റ് ബോർഡിന്റെ അംഗീകാരത്തിനായി സമർപ്പിക്കും. 430 കോടി രൂപയാണ് ഈ മേഖലയ്ക്കായി പുതുക്കിയ എസ്റ്റിമേറ്റ് തയാറാക്കിയിരിക്കുന്നത്. മൂന്നാം റീച്ചായ മാരാരിക്കുളം – തുറവൂർ (ബാക്കി ഭാഗം) അതിനു ശേഷമാകും പരിഗണിക്കുക.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: K.C. Venugopal MP's intervention leads to splitting the Alappuzha coastal railway doubling project into three phases for faster execution.

#AlappuzhaRailway #KCVenugopal #CoastalRailway #RailwayDoubling #KeralaDevelopment #IndianRailways #KVARTHA