വാഷിംഗ്ടൺ: (KVARTHA) അമേരിക്കയിലെ ആൻഡ്രോയിഡ്, ഐഫോൺ ഉപയോക്താക്കൾക്ക് നിർണായക മുന്നറിയിപ്പുമായി ഫെഡറൽ ബ്യൂറോ ഓഫ് ഇൻവെസ്റ്റിഗേഷൻ (എഫ്ബിഐ). ചൈനീസ് ഹാക്കർമാർ വ്യാജ ടോൾ സന്ദേശങ്ങൾ അയച്ച് തട്ടിപ്പ് നടത്താൻ ശ്രമിക്കുന്നതായാണ് കണ്ടെത്തൽ. ഈ സന്ദേശങ്ങൾ ഉടൻ തന്നെ ഡിലീറ്റ് ചെയ്യണമെന്ന് എഫ്ബിഐ നിർദ്ദേശിച്ചു.

ചൈനീസ് ഫിഷിംഗ് സംഘങ്ങളുടെ പുതിയ തട്ടിപ്പ് രീതി

അമേരിക്കയിലെ ടോൾ റോഡ് ഓപ്പറേറ്റർമാരുടേതെന്ന് തോന്നിക്കുന്ന വ്യാജ സന്ദേശങ്ങളാണ് ചൈനീസ് ഫിഷിംഗ് സംഘങ്ങൾ വ്യാപകമായി അയക്കുന്നത്. ഇ-ഇസഡ്പാസ് പോലുള്ള മൾട്ടി-സ്റ്റേറ്റ് ടോൾ സംവിധാനങ്ങളുടെ പേരിൽ പോലും സന്ദേശങ്ങൾ എത്തുന്നുണ്ട്. അമേരിക്കയിൽ താമസിക്കുന്നവർക്ക്  അവരുടെ ഫോണുകളിലേക്ക് ഇത്തരം സന്ദേശങ്ങൾ ധാരാളമായി ലഭിക്കുന്നുണ്ടെന്നും, ഇത് സൈബർ  ആക്രമണമാണെന്നും വിദഗ്ധർ അഭിപ്രായപ്പെടുന്നു. 2024 ഡിസംബറിൽ ചൈനീസ് ഹാക്കർമാരുടെ ഭീഷണി കാരണം ടെക്സ്റ്റ് സന്ദേശങ്ങൾ അയക്കുന്നത് നിർത്താൻ എഫ്ബിഐ അമേരിക്കക്കാരോട് ആവശ്യപ്പെട്ടിരുന്നു.

എഫ്ബിഐയുടെ മുന്നറിയിപ്പ് സന്ദേശം

ഫോബ്സിന് നൽകിയ പ്രസ്താവനയിൽ എഫ്ബിഐ ഈ തട്ടിപ്പിനെക്കുറിച്ച് വിശദീകരിക്കുന്നു. ലഭിച്ച സന്ദേശങ്ങളിൽ, ഉപയോക്താക്കൾ ടോൾ പിഴയായി പണം നൽകാനുണ്ടെന്നും, സന്ദേശങ്ങളിലെ ഭാഷ അമേരിക്കൻ അധികൃതർ അയക്കുന്നതിന് ഏറെക്കുറെ സമാനമാണെന്നും എഫ്ബിഐ പറയുന്നു. 'ബാക്കിയുള്ള ടോൾ തുക'യിലും സാമ്യമുണ്ട്. എന്നാൽ, സന്ദേശത്തിൽ നൽകിയിട്ടുള്ള ലിങ്ക് ഓരോ സംസ്ഥാനത്തിലെയും ടോൾ സർവീസിന്റെ പേര് പോലെ തോന്നിപ്പിക്കുന്ന രീതിയിലാണ് ഉണ്ടാക്കിയിരിക്കുന്നത്. 

അതുപോലെ ഫോൺ നമ്പറുകളും ഓരോ സംസ്ഥാനത്തിനും അനുസരിച്ച് മാറിക്കൊണ്ടിരിക്കും. ചുരുക്കത്തിൽ, ടോൾ പിഴ അടക്കാനുണ്ട് എന്ന് പറഞ്ഞ് വരുന്ന മെസ്സേജുകളിൽ കാണുന്ന ലിങ്കുകളിൽ ക്ലിക്ക് ചെയ്ത് പണം അടയ്ക്കാതിരിക്കാൻ ശ്രദ്ധിക്കുക. ഇത് ഒരു തട്ടിപ്പാണ് എന്ന് എഫ്ബിഐ മുന്നറിയിപ്പ് നൽകുന്നു.

വ്യാപകമായ ഡൊമെയ്ൻ രജിസ്ട്രേഷനും അത്യാധുനിക ഫിഷിംഗ് കിറ്റും

സംസ്ഥാന, നഗര ടോൾ ഏജൻസികളുടെ പേരുകൾ അനുകരിച്ച് ആയിരക്കണക്കിന് ഡൊമെയ്നുകളാണ് ആക്രമണകാരികൾ രജിസ്റ്റർ ചെയ്യുന്നത്. ചൈനയിൽ നിന്നുള്ള ഒരു അത്യാധുനിക ഫിഷിംഗ് കിറ്റ് ഉപയോഗിച്ചാണ് ഈ സംഘം സമാനമായ തട്ടിപ്പ് സന്ദേശങ്ങൾ അയക്കുന്നത്. ടോൾ ഉപയോഗിക്കാത്തവർക്ക് പോലും ഇത്തരം സന്ദേശങ്ങൾ ലഭിക്കുന്നുണ്ട്. .TOP, .CYOU, .XIN തുടങ്ങിയ ചൈനീസ് ടോപ്പ്-ലെവൽ ഡൊമെയ്നുകളുള്ള ലിങ്കുകളാണ് ഈ സന്ദേശങ്ങളിൽ സാധാരണയായി കാണുന്നത്. 

.TOP ഡൊമെയ്ൻ മുൻപും ദുരുപയോഗം ചെയ്യപ്പെട്ടിട്ടുള്ളതായും, ഇത് നിലവിൽ ഐകാൻ അന്വേഷണത്തിലാണെന്നും റിപ്പോർട്ടുകൾ സൂചിപ്പിക്കുന്നു. ടോൾ ചാർജുകൾ ഔദ്യോഗിക വെബ്സൈറ്റുകൾ വഴി മാത്രം പരിശോധിക്കുക, സംശയാസ്പദമായ ലിങ്കുകളിൽ ക്ലിക്ക് ചെയ്താൽ പാസ്‌വേഡുകൾ മാറ്റുക തുടങ്ങിയ മുൻകരുതലുകൾ എടുക്കണമെന്നും എഫ്ബിഐ ഉപയോക്താക്കൾക്ക് നിർദേശം നൽകുന്നു. ഇന്ത്യയില് സമാന രീതിയിൽ തട്ടിപ്പ് നടത്താമെന്നും സൈബർ വിദഗ്ധർ അഭിപ്രായപ്പെടുന്നു.

The FBI warns Android and iPhone users in the US about Chinese hackers sending fake toll messages to commit fraud, urging immediate deletion of such messages and caution with suspicious links.

 #FBIWarning, #CyberSecurity, #ScamAlert, #PhishingScam, #TollScam, #OnlineSafety