വാഷിംഗ്ടൺ: (KVARTHA) അമേരിക്കയിൽ ഹ്രസ്വ വീഡിയോ ആപ്ലിക്കേഷനായ ടിക്‌ടോക്കിന്റെ ഭാവി അനിശ്ചിതത്വത്തിൽ. ടിക്‌ടോക്കിന്റെ അപ്പീൽ നിരസിച്ചതിനെ തുടർന്ന്, വരും ദിവസങ്ങളിൽ ഈ ആപ്പ് അമേരിക്കയിൽ നിരോധിക്കപ്പെടുമെന്ന് മാധ്യമങ്ങൾ റിപ്പോർട്ട് ചെയ്‌തു.

ദശലക്ഷക്കണക്കിന് അമേരിക്കൻ പൗരന്മാരുടെ അഭിപ്രായ സ്വാതന്ത്ര്യത്തെ ഈ നിരോധനം ലംഘിക്കുമെന്ന വാദവുമായി ടിക്‌ടോക്ക് ഫെഡറൽ കോടതിയെ സമീപിച്ചിരുന്നു. എന്നാൽ, കോടതി ഈ വാദം തള്ളിക്കളഞ്ഞു. ഇതോടെയാണ് നിരോധനത്തിന് വഴിതെളിഞ്ഞത്. 

എന്താണ് പ്രശ്‌നം?

ചൈനീസ് നിര്‍മിത ആപ്ലിക്കേഷനായതിനാല്‍ ആഗോളതലത്തില്‍ ടിക് ടോക്കിന്റെ വിശ്വാസ്യത ചോദ്യം ചെയ്യുകയാണ് ഭരണകൂടങ്ങള്‍. ടിക്‌ടോക്ക് വഴി ചൈനീസ് സർക്കാരിന് അമേരിക്കൻ പൗരന്മാരുടെ ഡാറ്റയിലേക്ക് പ്രവേശനം ലഭിക്കുമെന്നാണ് അമേരിക്കൻ സർക്കാർ ആശങ്കപ്പെടുന്നത്. ഇത് ദേശീയ സുരക്ഷയ്ക്ക് ഭീഷണിയാണെന്നും അവർ വാദിക്കുന്നു. എന്നാൽ ടിക്‌ടോക്കിന്റെ ഉടമയായ ചൈനീസ് കമ്പനി ബൈറ്റ്ഡാൻസ്, അമേരിക്കൻ സർക്കാരിന്റെ ആശങ്കകൾ അടിസ്ഥാനരഹിതമാണെന്നും ഡാറ്റ സുരക്ഷിതമാണെന്നുമാണ് വ്യക്തമാക്കുന്നത്.

ഇന്ത്യയിലെ അനുഭവം

ടിക്‌ടോക്ക് അമേരിക്കയിൽ നിരോധിക്കപ്പെട്ടാൽ ഇന്ത്യയിലെ അനുഭവം ആവർത്തിക്കും. ഇന്ത്യ 2020-ൽ ടിക്‌ടോക്കും മറ്റ് നിരവധി ചൈനീസ് ആപ്പുകളും നിരോധിച്ചിരുന്നു. രാജ്യ സുരക്ഷാ ആശങ്കകളുന്നയിച്ചായിരുന്നു ഇന്ത്യ ഈ തീരുമാനം എടുത്തത്. അതേസമയം അമേരിക്കയിൽ കോടതി വിധിക്കെതിരെ അപ്പീൽ നൽകുമെന്ന് ടിക്‌ടോക്ക് സൂചന നൽകിയിട്ടുണ്ട്. 

ടിക് ടോക്കിന് അമേരിക്കയിൽ 15 കോടി ഉപഭോക്താക്കളുണ്ട്. കൗമാരക്കാര്‍ക്കിടയില്‍ ഏറ്റവും ജനപ്രീതിയിലുള്ള ആപ്പുകളില്‍ ഒന്നാണ് ഇത്. ഉപയോക്താക്കൾക്ക് 15 സെക്കൻഡ് മുതൽ മിനിറ്റുകൾ വരെ നീളുന്ന ചെറിയ വീഡിയോകൾ സൃഷ്ടിക്കാനും പങ്കിടാനും ഇത് അനുവദിക്കുന്നു. ഈ വീഡിയോകൾക്ക് സംഗീതം, എഫക്റ്റുകൾ, ഫിൽട്ടറുകൾ എന്നിവ ചേർക്കാനും സാധിക്കും.

#TikTok, #Ban, #US, #DataPrivacy, #ByteDance, #AppBan