പുതിയ കാലത്ത് കുട്ടികളെ ടെക് ലോകത്തിനൊപ്പം വായനയുടെ വിശാലതയിലേക്ക് നയിക്കേണ്ടത് അത്യാവശ്യം: കതിരൂരിൽ സ്പീക്കർ എ എൻ ഷംസീർ

കണ്ണൂർ: (KVARTHA) കുട്ടികളെ സാങ്കേതികവിദ്യയുടെ ലോകത്ത് വളർത്തുന്നതോടൊപ്പം, വായനയുടെ പ്രാധാന്യം മനസ്സിലാക്കി അവരെ പുസ്തകങ്ങളിലേക്ക് ആകർഷിക്കാൻ രക്ഷിതാക്കൾക്കും അധ്യാപകർക്കും സാധിക്കണമെന്ന് നിയമസഭാ സ്പീക്കർ അഡ്വ. എ.എൻ. ഷംസീർ പറഞ്ഞു. 

വെർച്വൽ ലോകത്തിനപ്പുറം ചുറ്റുപാടുകളെക്കുറിച്ചുള്ള അറിവ് നേടുന്നതിലൂടെ കുട്ടികൾ സമൂഹത്തിന് മാതൃകയാകണമെന്നും അദ്ദേഹം അഭിപ്രായപ്പെട്ടു. കതിരൂർ തരുവണത്തെരു യു.പി. സ്കൂളിൽ നടന്ന വികസന വിജയോത്സവം പരിപാടി, സ്മാർട്ട് ക്ലാസ് റൂം ഉദ്ഘാടനം, ടർഫ് നിർമാണത്തിനുള്ള സ്ഥലം കൈമാറൽ എന്നിവയുടെ ഉദ്ഘാടനം നിർവഹിച്ച് സംസാരിക്കുകയായിരുന്നു സ്പീക്കർ.

കേരള ബിവറേജസ് കോർപ്പറേഷന്റെ പൊതുനന്മ ഫണ്ടിൽനിന്ന് പത്തുലക്ഷം രൂപയും സ്കൂൾ മാനേജ്‌മെന്റിന്റെ സഹകരണത്തോടെ ഇരുപതുലക്ഷം രൂപയും ചേർത്ത് ആകെ മുപ്പതുലക്ഷം രൂപ ചെലവഴിച്ചാണ് സ്മാർട്ട് ക്ലാസ് റൂം തയ്യാറാക്കിയത്.

സ്കൂൾ മാനേജ്‌മെന്റിന്റെ ഉടമസ്ഥതയിലുള്ള സ്ഥലത്ത് എം.എൽ.എ. ഫണ്ട് ഉപയോഗിച്ച് കതിരൂർ ഗ്രാമപഞ്ചായത്ത് നിർമിക്കുന്ന ടർഫിന്റെ രേഖകൾ സ്കൂൾ മാനേജർ പി.കെ. രത്നരാജ് മാസ്റ്ററിൽനിന്ന് അഡ്വ. എ.എൻ. ഷംസീർ ഏറ്റുവാങ്ങി. 

ഇരുപത്തിയഞ്ചുലക്ഷം രൂപയാണ് ടർഫ് നിർമാണത്തിനായി വിനിയോഗിക്കുന്നത്. സ്കൂൾ സമയങ്ങളിൽ വിദ്യാർത്ഥികൾക്ക് ടർഫ് ഉപയോഗിക്കാൻ നൽകണമെന്ന വ്യവസ്ഥയിലാണ് മാനേജ്‌മെന്റ് സ്ഥലം കൈമാറിയത്. എൽ.എസ്.എസ്., യു.എസ്.എസ്. വിജയികളെ ചടങ്ങിൽ അനുമോദിച്ചു.

കതിരൂർ പഞ്ചായത്ത് പ്രസിഡന്റ് പി.പി. സനൽ അധ്യക്ഷനായ ചടങ്ങിൽ ജില്ലാ പഞ്ചായത്തംഗം മുഹമ്മദ് അഫ്‌സൽ, തലശ്ശേരി ബ്ലോക്ക് പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി പ്രസിഡന്റ് രമേശ് കണ്ടോത്ത്, വാർഡ് അംഗങ്ങളായ എൻ. സുധീഷ്, കെ.വി. ശോസ്‌ന, സ്കൂൾ മാനേജർ പി.കെ. രത്‌നരാജ്, തലശ്ശേരി നോർത്ത് എ.ഇ.ഒ. എ. പ്രശാന്ത്, ബി.പി.സി. കെ.കെ. ചന്ദ്രമോഹൻ, പി.ടി.എ. പ്രസിഡന്റ് കെ. ബിജു, മദർ പി.ടി.എ. പ്രസിഡന്റ് മിനി ഷിജിത്ത്, പ്രധാന അധ്യാപിക കെ.പി. റജില, റിട്ട. എച്ച്.എം. കെ.കെ. കുമാരൻ മാസ്റ്റർ, അജിത് കാരായി, സി. സജീവൻ, എൻ. ഹരീന്ദ്രൻ തുടങ്ങിയവർ പങ്കെടുത്തു.

കതിരൂരിലെ ഈ വികസനത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക! 

Article Summary: Speaker A.N. Shamseer emphasized guiding children towards reading alongside technology at Kathirur UP School's Smart Classroom and Turf inauguration.

#KeralaEducation, #ANShamseer, #Kathirur, #SmartClassroom, #ReadingHabit, #ChildDevelopment