Development | കേരളത്തിന്റെ ഭാവി മാറുന്നു: തോറിയം ആണവ നിലയം സ്ഥാപിക്കാൻ കെഎസ്ഇബി ശ്രമം

തിരുവനന്തപുരം: (KVARTHA) കേരളം വൈദ്യുതി വിപണിയിൽ ഒരു മുന്നേറ്റം നടത്താൻ ഒരുങ്ങുകയാണ്. സംസ്ഥാനത്തെ സമ്പന്നമാക്കുന്നതിനായി തോറിയം അടിസ്ഥാനമാക്കിയുള്ള ആണവ വൈദ്യുതി നിലയം സ്ഥാപിക്കാനുള്ള ശ്രമങ്ങൾ കെഎസ്ഇബി ആരംഭിച്ചതായി റിപ്പോർട്ടുകൾ.

തൃശൂർ, കാസർകോട്, കായംകുളം എന്നിവിടങ്ങളിൽ പഠനം

ബംഗളുരുവിലെ നാഷണൽ ഇൻസ്റ്റിറ്റ്യൂട്ട് ഒഫ് അഡ്വാൻസ്ഡ് സ്റ്റഡീസ് ഇതിനായി സാദ്ധ്യതാ പഠനം നടത്തും. തൃശൂരിലെ അതിരപ്പിള്ളിയും കാസർകോട്ടെ ചീമേനിയും ആദ്യം പരിഗണിക്കുന്ന സ്ഥലങ്ങളാണ്. ഈ സ്ഥലങ്ങൾ അനുയോജ്യമാണോ എന്ന് പരിശോധിച്ച ശേഷം മറ്റ് സ്ഥലങ്ങളും പരിഗണിക്കും. ഈ പഠന റിപ്പോർട്ട് അനുകൂലമായാൽ തുടർന്നുള്ള നടപടികളിലേക്ക് കടക്കും.

കായംകുളത്ത് കരിമണൽ ശേഖരമുള്ള 1180 ഏക്കർ സ്ഥലം എൻ.ടി.പി.സി.ക്കുണ്ട്. ഇതിൽ 600 ഏക്കറിൽ തോറിയം നിലയമുണ്ടാക്കാനുള്ള സാധ്യതയും പഠനവിധേയമാണ്. നിലവിൽ വൈദ്യുതി ഉത്പാദനം നടക്കാത്ത കായംകുളം താപവൈദ്യുത നിലയത്തിന്റെ സാധ്യതകളും പരിശോധിക്കും.

എന്താണ് തോറിയം? 

തോറിയം എന്നത് ഒരു പ്രകൃതിദത്ത മൂലകമാണ്. കേരളത്തിലെ കടൽത്തീരത്ത് ധാരാളമായി ലഭിക്കുന്ന കരിമണലിൽ ഇത് അടങ്ങിയിരിക്കുന്നു. തോറിയം ഉപയോഗിച്ച് വൈദ്യുതി ഉത്പാദിപ്പിക്കുന്നത് പരിസ്ഥിതിക്ക് കുറഞ്ഞ ദോഷം ചെയ്യുന്നതും കൂടുതൽ സുരക്ഷിതവുമാണെന്ന് വിദഗ്ധർ പറയുന്നു.

ആണവനിലയത്തിന് തീരദേശത്ത് 625 ഏക്കറും മറ്റിടങ്ങളിൽ 960 ഏക്കറും വേണം. ഇതിനു പുറമേ ക്വാർട്ടേഴ്സിനും ഓഫീസ് സമുച്ചയങ്ങൾക്കും വേറെയും സ്ഥലം ആവശ്യമാണ്. കേന്ദ്ര സർക്കാരിന്റെയും സംസ്ഥാന സർക്കാരിന്റെയും അനുമതി ലഭിച്ച ശേഷമായിരിക്കും ചെലവ് ഉൾപ്പെടെയുള്ള പദ്ധതി റിപ്പോർട്ട് തയ്യാറാക്കുക.

ലോകത്തെ തോറിയം ശേഖരത്തിന്റെ 30 ശതമാനവും കേരള കടൽത്തീരത്താണ്. തോറിയം ഉപയോഗിച്ച് കുറഞ്ഞ ചെലവിൽ വൈദ്യുതി ഉത്പാദിപ്പിക്കാമെന്നാണ് വിദഗ്ധരുടെ അഭിപ്രായം. തമിഴ്‌നാട്ടിലെ കൽപാക്കത്തുള്ള തോറിയം ആണവ നിലയം കേരള സംഘം സന്ദർശിച്ച് പഠനം നടത്തിയിട്ടുണ്ട്. കൽപാക്കം പ്ലാന്റിൽ തോറിയത്തെ യുറേനിയം 233 ഐസോടോപ്പ് ആക്കി അതുപയോഗിച്ച് വൈദ്യുതി ഉത്പാദിപ്പിക്കുന്ന രീതിയാണ് അവലംബിച്ചിരിക്കുന്നത്. ഇത് കേരളത്തിന് അനുയോജ്യമാണെന്ന് വിലയിരുത്തിയിട്ടുണ്ട്.

എന്നാൽ സർക്കാരോ ഇടതുമുന്നണിയോ ഇതുസംബന്ധിച്ച് ഇതുവരെ ഒരു നയപരമായ തീരുമാനം എടുത്തിട്ടില്ല. ഇടതുമുന്നണിയിൽ ഇതുസംബന്ധിച്ച് വിശദമായ ചർച്ചകളും നടന്നിട്ടില്ല.

പരിസ്ഥിതി പ്രശ്നങ്ങളും പരിഗണന

ജലവൈദ്യുതി പദ്ധതികൾക്കാണ് സംസ്ഥാനം പരമ്പരാഗതമായി മുൻഗണന നൽകിയിരുന്നത്. എന്നാൽ പരിസ്ഥിതി പ്രശ്‌നങ്ങൾ ഇതിനുള്ള സാധ്യത കുറച്ചു. ഇതോടെയാണ് മറ്റ് ബദൽ ഊർജ്ജ സ്രോതസ്സുകളായ തോറിയം ആണവോർജ്ജത്തെ പരിഗണിക്കുന്നത്. കേരള തീരത്ത് സുലഭമായ തോറിയം ഉപയോഗിച്ച് 440 മെഗാവാട്ട് ശേഷിയുള്ള ഒരു ആണവ നിലയം സ്ഥാപിക്കാനാണ് പദ്ധതി. ഊർജ്ജ വകുപ്പിന്റെ അഡീഷണൽ ചീഫ് സെക്രട്ടറിയുടെ നേതൃത്വത്തിൽ ഒരു വിദഗ്ദ്ധ സംഘം മുംബൈയിലെ ഭാഭാ ആണവ ഗവേഷണ കേന്ദ്രം (ബാർക്) സന്ദർശിച്ച്‌ ഇതിനെക്കുറിച്ച് വിശദമായി ചർച്ച ചെയ്തിരുന്നു.

#ThoriumNuclearPower #KeralaEnergy #SustainableEnergy #NuclearEnergy #IndiaEnergy #KSEB