ലഹരിയെ വേരോടെ പിഴുതെറിയാൻ പുതിയ നീക്കം; കണ്ണൂർ പോലീസിന് 'സോടാക്സ അനലൈസർ'

കണ്ണൂർ: (KVARTHA) രാജ്യമൊട്ടാകെ വ്യാപിക്കുന്ന നിശ്ശബ്ദ പകർച്ചവ്യാധിയാണ് ലഹരിയെന്നും ഇതിനെ സമൂഹം ഒറ്റക്കെട്ടായി നേരിടണമെന്നും സംസ്ഥാന പോലീസ് മേധാവി റവാഡ ചന്ദ്രശേഖരൻ പറഞ്ഞു. 

റോട്ടറി ക്ലബ്ബും, വൊക്കാറൂ ഫൗണ്ടേഷനും സംയുക്തമായി ലഹരി പരിശോധനാ ഉപകരണം 'സോടാക്സ അനലൈസർ' പോലീസ് സേനയ്ക്ക് കൈമാറുന്ന ചടങ്ങ് ഉദ്ഘാടനം ചെയ്യുകയായിരുന്നു ഡിജിപി.

രാജ്യസുരക്ഷയെ ദോഷകരമായി ബാധിക്കുന്ന ഒന്നാണ് ലഹരി ശൃംഖല. ഇതിന്റെ കണ്ണി മുറിക്കുന്നതിന് പോലീസ് സേനയോടൊപ്പം സമൂഹത്തിന്റെ എല്ലാ തട്ടിലുമുള്ളവർ ഒത്തുചേരണം. ഈ വർഷം ഇതുവരെ 25,000 ലഹരി കേസുകളാണ് സംസ്ഥാനത്ത് പിടികൂടിയത്. 

സിന്തറ്റിക് ലഹരിയുടെ വ്യാപനം യുവതലമുറയെ കാർന്നു തിന്നുകയാണ്. ഇവയുടെ ഉപയോഗം തിരിച്ചറിയുന്നതിന് അത്യാധുനിക സാങ്കേതിക വിദ്യകൾ വേണ്ടിവരും. ആധുനിക ഉപകരണങ്ങൾ നൽകി ലഹരിക്കെതിരായ പോരാട്ടത്തിൽ പോലീസിനൊപ്പം ചേരുന്ന റോട്ടറി ക്ലബ്ബിന്റെയും, വൊക്കാറൂ ഫൗണ്ടേഷന്റെയും പ്രവർത്തനം നല്ല മാതൃകയാണെന്നും ഡിജിപി കൂട്ടിച്ചേർത്തു.

വൊക്കാറൂ ഫൗണ്ടേഷൻ എം.ഡി. വി. നൗഷാദ് സോടാക്സ അനലൈസർ ഡിജിപിക്ക് കൈമാറി. സിന്തറ്റിക് ലഹരി ഉൾപ്പെടെ എല്ലാ ലഹരിവസ്തുക്കളുടെയും ഉപയോഗം ഉമിനീർ പരിശോധനയിലൂടെ തിരിച്ചറിയാൻ കഴിയുന്ന ഉപകരണമാണ് സോടാക്സ അനലൈസർ.

റോട്ടറി ഇന്റർനാഷണൽ ഡിസ്ട്രിക്ട് ഗവർണർ ബിജോഷ് മാനുവൽ അധ്യക്ഷത വഹിച്ചു. വൊക്കാറൂ ഫൗണ്ടേഷൻ ചെയർമാൻ വി. നൗഷാദ് മുഖ്യാതിഥിയായിരുന്നു. നോർത്ത് സോൺ ഐജിപി രാജ്പാൽ മീണ, കണ്ണൂർ റേഞ്ച് ഡിഐജി ജി.എച്ച്. യതീഷ് ചന്ദ്ര, സിറ്റി പോലീസ് കമ്മീഷണർ പി. നിതിൻ രാജ് എന്നിവർ വിശിഷ്ടാതിഥികളായി പങ്കെടുത്തു. 

അഡിഷണൽ സൂപ്രണ്ട് ഓഫ് പോലീസ് സജീഷ് വാഴലപ്പിള്ളി, തലശ്ശേരി എ.എസ്.പി. പി.ബി. കിരൺ, കണ്ണൂർ സിറ്റി എ.സി.പി. പ്രദീപൻ കണ്ണിപൊയിൽ, നാർക്കോട്ടിക് സെൽ എ.സി.പി. പി. രാജേഷ്, റോട്ടറി ഭാരവാഹികളായ സുരേഷ് മാത്യു, ജിഗീഷ് നാരായൺ, ഉപേന്ദ്ര ഷേണായി, സുഹാസ് വേലാണ്ടി, സഞ്ജയ് ആറാട്ടുപൂവാടൻ എന്നിവർ സംസാരിച്ചു.

ലഹരിക്കെതിരായ പോരാട്ടത്തിൽ ഈ പുതിയ ഉപകരണം എത്രത്തോളം ഫലപ്രദമാകുമെന്ന് നിങ്ങൾ കരുതുന്നു? നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Kannur Police receives 'Sotax Analyzer' to detect drug abuse.

#DrugAbuse, #KeralaPolice, #Kannur, #AntiDrugs, #SotaxAnalyzer, #Technology