തിരുവനന്തപുരം: (KVARTHA) ഗതാഗത വകുപ്പ് ഒരുക്കുന്ന പുത്തൻ മൊബൈൽ ആപ്പ് വഴി ഡ്രൈവിംഗ് പഠനം ഇനി കൂടുതൽ എളുപ്പമാകും. ഡ്രൈവിംഗ് പരീക്ഷയ്ക്കുള്ള തയ്യാറെടുപ്പ് സുഗമമാക്കുന്ന പുതിയ മൊബൈൽ ആപ്പ് ഗതാഗത വകുപ്പ് ഉടൻ പുറത്തിറക്കുമെന്ന് മന്ത്രി കെ ബി ഗണേഷ് കുമാർ അറിയിച്ചു.

ഡ്രൈവിംഗ് സംബന്ധിച്ച എല്ലാ നിയമങ്ങളും വിശദമായി പഠിപ്പിക്കുന്ന വീഡിയോകൾ മലയാളം, ഹിന്ദി, ഇംഗ്ലീഷ്, തമിഴ്, കന്നഡ ഭാഷകളിൽ ലഭ്യമാകും. ഇതോടെ മറ്റു സംസ്ഥാനങ്ങളിൽ നിന്നുള്ളവർക്കും ഈ ആപ്പ് ഉപയോഗിക്കാം.

ആപ്പിലെ വിവിധ ലെവലുകൾ പൂർത്തിയാക്കിയ ശേഷം വിജയകരമായി പരീക്ഷ പാസാകുന്നവർക്ക് ട്രാൻസ്‌പോർട്ട് കമ്മീഷണറിൽ നിന്ന് സർട്ടിഫിക്കറ്റ് ലഭിക്കും. ഡ്രൈവിംഗ് പരിശീലനത്തിനൊപ്പം മോക്ക് ടെസ്റ്റുകളും ആപ്പിൽ ഉൾപ്പെടുത്തിയിട്ടുണ്ട്. ഇത് പരീക്ഷയ്ക്കുള്ള തയ്യാറെടുപ്പ് കൂടുതൽ ഫലപ്രദമാക്കും.

ഗതാഗത വകുപ്പിന്റെ എല്ലാ സേവനങ്ങളും ഒരു കുടക്കീഴിൽ ലഭ്യമാക്കുന്ന മറ്റൊരു മൊബൈൽ ആപ്പും ഉടൻ പുറത്തിറക്കാനൊരുങ്ങുകയാണ് സർക്കാർ. റോഡ് സേഫ്റ്റി, കെഎസ്ആർടിസി റിസർവേഷൻ തുടങ്ങിയ സേവനങ്ങൾ ഈ ആപ്പിൽ ലഭ്യമാകും.

ഈ പുതിയ ആപ്പുകൾ വഴി ഗതാഗത വകുപ്പിന്റെ സേവനങ്ങൾ കൂടുതൽ ജനകീയമാക്കുകയും, പൊതുജനങ്ങൾക്ക് സുരക്ഷിതമായ ഡ്രൈവിംഗ് അനുഭവം നൽകുകയുമാണ് സർക്കാരിന്റെ ലക്ഷ്യം.

 #DrivingApp, #SmartLearning, #TransportDepartment, #RoadSafety, #Kerala, #DrivingPreparation