ന്യൂഡൽഹി: (KVARTHA) ദേശീയ സുരക്ഷാ ഏജൻസിയുടെ അന്വേഷണത്തിൽ ചില പഴയ സിം കാർഡുകളിൽ ചൈനീസ് നിർമ്മിത ചിപ്പ്‌സെറ്റുകൾ കണ്ടെത്തിയതിനെ തുടർന്ന്, രാജ്യത്ത് ഉപയോഗിക്കുന്ന പഴയ മൊബൈൽ ഫോൺ സിം കാർഡുകൾ മാറ്റുന്നതിനെക്കുറിച്ച് ഇന്ത്യ ആലോചിക്കുന്നു. ഉപഭോക്താക്കളുടെ വിവരങ്ങൾ സൂക്ഷിക്കുന്ന ഈ കാർഡുകളിൽ ചൈനീസ് ചിപ്പുകൾ കണ്ടെത്തിയത് രാജ്യസുരക്ഷയെക്കുറിച്ച് വലിയ ആശങ്കയാണ് ഉയർത്തുന്നത് എന്ന് ബന്ധപ്പെട്ട ഉദ്യോഗസ്ഥർ അറിയിച്ചു. പേര് വെളിപ്പെടുത്താൻ ആഗ്രഹിക്കാത്ത രണ്ട് ഉദ്യോഗസ്ഥരാണ് ഈ വിവരം പങ്കുവെച്ചത്.

സാങ്കേതികവും നിയമപരവുമായ കടമ്പകൾ

ഈ വിഷയത്തിൽ ദേശീയ സൈബർ സുരക്ഷാ കോർഡിനേറ്ററും (NCSC)  ആഭ്യന്തര മന്ത്രാലയവും സംയുക്തമായാണ് അന്വേഷണം നടത്തുന്നത്. പഴയ സിം കാർഡുകൾ പൂർണ്ണമായി മാറ്റുന്നതിനുള്ള സാധ്യതകളും, അതിനായുള്ള സാങ്കേതികപരമായ വെല്ലുവിളികളും നിയമപരമായ നൂലാമാലകളും അധികൃതർ വിശദമായി വിലയിരുത്തിക്കൊണ്ടിരിക്കുകയാണ്. ഇതിന്റെ ഭാഗമായി വോഡഫോൺ ഐഡിയ, ഭാരതി എയർടെൽ, റിലയൻസ് ജിയോ തുടങ്ങിയ പ്രമുഖ ടെലികോം കമ്പനികളുടെ ഉന്നത ഉദ്യോഗസ്ഥരുമായും ടെലികോം വകുപ്പിലെ പ്രധാനികളുമായും എൻ സി എസ് സി നിർണായക ചർച്ചകൾ നടത്തിക്കഴിഞ്ഞു. സിം കാർഡുകൾ ഉൾപ്പെടെയുള്ള ടെലികോം ഉപകരണങ്ങളുടെ സംഭരണത്തിലെ സുരക്ഷാ വീഴ്ചകൾ അടയ്ക്കുകയും, നിലവിലുള്ള സിം കാർഡുകൾക്ക് പകരം കൂടുതൽ സുരക്ഷിതമായ സംവിധാനം ഏർപ്പെടുത്തുക എന്നതുമാണ് ഈ ചർച്ചകളുടെ പ്രധാന ലക്ഷ്യം.

115 കോടി ഉപയോക്താക്കൾ

ഇന്ത്യയിലെ മൊബൈൽ ഉപയോക്താക്കളുടെ എണ്ണം ഏകദേശം 1.15 ബില്യൺ ആണ്. ഇതിൽ തുച്ഛമായ ഒരു ശതമാനം സിം കാർഡുകളിൽ പോലും ചൈനീസ് ചിപ്പുകൾ ഉപയോഗിച്ചിട്ടുണ്ടെങ്കിൽ അത് രാജ്യത്തിന്റെ ഡാറ്റാ സുരക്ഷയ്ക്ക് ഗുരുതരമായ ഭീഷണിയാണ് ഉയർത്തുന്നത്. ഹവാവെ, സെഡ് ടി ഇ പോലുള്ള ചൈനീസ് ടെലികോം ഉപകരണ നിർമ്മാതാക്കളെ ദേശീയ സുരക്ഷാ കാരണങ്ങളാൽ സർക്കാർ നേരത്തെ തന്നെ വിലക്കിയിട്ടുള്ള സാഹചര്യത്തിൽ ഈ കണ്ടെത്തൽ അതീവ ഗൗരവത്തോടെയാണ് അധികൃതർ കാണുന്നത്. സർക്കാർ അനുമതിയില്ലാതെ ചൈനയിൽ നിന്ന് സിം ചിപ്പ്‌സെറ്റുകൾ വാങ്ങുന്നത് ടെലികോം ഓപ്പറേറ്റർമാരുടെ സിം കാർഡ് സംഭരണ രീതികളെയും, അതിന്റെ സുതാര്യതയെയും ചോദ്യം ചെയ്യുന്നു. ചില ടെലികോം ഓപ്പറേറ്റർമാരുടെ വെണ്ടർമാർ, വിശ്വസനീയമായ ഉറവിടങ്ങളിൽ നിന്നാണ് സിം കാർഡ് ചിപ്പുകൾ വാങ്ങുന്നതെന്ന് ആദ്യം സാക്ഷ്യപത്രം നൽകിയിരുന്നെങ്കിലും, പിന്നീട് നടത്തിയ പരിശോധനയിൽ ചില ചിപ്പുകൾ ചൈനീസ് നിർമ്മിതമാണെന്ന് കണ്ടെത്തുകയായിരുന്നുവെന്ന് ഒരു ഉദ്യോഗസ്ഥൻ വെളിപ്പെടുത്തി. എന്നാൽ ഈ വെണ്ടർമാരെക്കുറിച്ചുള്ള കൂടുതൽ വിവരങ്ങൾ അദ്ദേഹം പുറത്തുവിട്ടില്ല.

വിശ്വസനീയമായ ഉറവിടം ഉറപ്പാക്കാൻ ശക്തമായ നടപടികളുമായി സർക്കാർ

ദേശീയ സുരക്ഷാ ഉപദേശക സമിതിയുടെ (NSCS) കീഴിലാണ് എൻ സി എസ് സി പ്രവർത്തിക്കുന്നത്. ദേശീയ സുരക്ഷയുമായി ബന്ധപ്പെട്ട നിർണായക വിഷയങ്ങളിൽ പ്രധാനമന്ത്രിയുടെ ഓഫീസിന് ഉപദേശം നൽകുന്ന പ്രധാന ഏജൻസിയാണിത്. സൈബർ സുരക്ഷയുമായി ബന്ധപ്പെട്ട് പ്രവർത്തിക്കുന്ന മറ്റ് ദേശീയ ഏജൻസികളുമായി എൻ സി എസ് സി ഏകോപിപ്പിക്കുകയും, ടെലികോം ഉപകരണങ്ങൾ വാങ്ങുന്നതിനുള്ള വിശ്വസനീയമായ ഉറവിടങ്ങൾക്ക് അംഗീകാരം നൽകുകയും ചെയ്യുന്നു. നിലവിൽ ടെലികോം ഓപ്പറേറ്റർമാർ സിം കാർഡുകൾ വാങ്ങുന്നത് അംഗീകൃത വെണ്ടർമാർ വഴിയാണ്. ഈ വെണ്ടർമാർ വിയറ്റ്നാം, തായ്‌വാൻ തുടങ്ങിയ രാജ്യങ്ങളിൽ നിന്ന് ചിപ്പുകൾ ഇറക്കുമതി ചെയ്ത് ഇന്ത്യയിൽ വെച്ച് കൂട്ടിച്ചേർക്കുകയും, പാക്ക് ചെയ്യുകയും, സീരിയൽ നമ്പർ നൽകി മൊബൈൽ സേവനദാതാക്കൾക്ക് വിതരണം ചെയ്യുകയുമാണ് പതിവ്. വിപണിയിൽ എത്തിയ ഇത്തരം ചിപ്പുകളുടെ വ്യാപ്തിയും, ചൈനീസ് ചിപ്പുകളുള്ള സിം കാർഡുകളുടെ എണ്ണവും കൃത്യമായി കണ്ടെത്താൻ എൻ സി എസ് സിയുടെ നേതൃത്വത്തിൽ ടെലികോം വകുപ്പ്, ആഭ്യന്തര മന്ത്രാലയം, മറ്റ് ബന്ധപ്പെട്ട ഏജൻസികളും ചേർന്ന് വിശദമായ അന്വേഷണം നടത്തിക്കൊണ്ടിരിക്കുകയാണ്. 

വെണ്ടർമാർ നടത്തിയ ഈ രഹസ്യ സംഭരണത്തെക്കുറിച്ച് ടെലികോം കമ്പനികൾക്ക് പോലും അറിവുണ്ടായിരുന്നില്ലെന്നാണ് കരുതുന്നത്. ഭാവിയിൽ ഇത്തരം സുരക്ഷാ വീഴ്ചകൾ ഉണ്ടാകാതിരിക്കാൻ വിശ്വസനീയമായ ഉറവിടങ്ങൾക്കുള്ള അംഗീകാര പ്രക്രിയ കൂടുതൽ ശക്തിപ്പെടുത്താനും, രാജ്യത്തേക്ക് വരുന്ന ടെലികോം ഉപകരണങ്ങളുടെ തുടർച്ചയായ പരിശോധന ഉറപ്പാക്കാനും സർക്കാർ ലക്ഷ്യമിടുന്നു.

സുരക്ഷാ മാനദണ്ഡങ്ങളും അധിക സാമ്പത്തിക ഭാരവും വെല്ലുവിളിയാകുന്നു

നിലവിലെ സുരക്ഷാ ചട്ടങ്ങൾ അനുസരിച്ച്, ടെലികോം ഉപകരണങ്ങൾ ഇന്ത്യയിലേക്ക് ഇറക്കുമതി ചെയ്യുന്നതിനും, വിൽക്കുന്നതിനും, ഉപയോഗിക്കുന്നതിനും മുമ്പ് നിർബന്ധിത പരിശോധനയും സർട്ടിഫിക്കേഷനും ആവശ്യമാണ്. ഈ നടപടിക്രമങ്ങൾ ഉപകരണങ്ങൾ സുരക്ഷാ മാനദണ്ഡങ്ങൾ, റേഡിയോ ഫ്രീക്വൻസി എമിഷൻ, നെറ്റ്‌വർക്ക് പ്രകടനം, ദേശീയ സുരക്ഷാ ആവശ്യകതകൾ എന്നിവ പാലിക്കുന്നുണ്ടെന്ന് ഉറപ്പാക്കുന്നു. ടെലികോം വകുപ്പിന് കീഴിലുള്ള നാഷണൽ സെന്റർ ഫോർ കമ്മ്യൂണിക്കേഷൻ സെക്യൂരിറ്റി (NCCS) ആണ് പ്രധാനമായും ഈ പരിശോധനകളും സർട്ടിഫിക്കേഷനുകളും നടത്തുന്നത്. ടെലികമ്മ്യൂണിക്കേഷൻ എഞ്ചിനീയറിംഗ് സെന്റർ (TEC) ഉം ചില ഉപകരണങ്ങൾക്ക് സർട്ടിഫിക്കറ്റ് നൽകുന്നുണ്ട്. എന്നാൽ അംഗീകാര പ്രക്രിയയിലെ ചില പോരായ്മകളും, ഉപകരണങ്ങളുടെ തുടർച്ചയായ പരിശോധനകൾ നടത്താത്തതുമാണ് ഇപ്പോഴത്തെ ഈ ഗുരുതരമായ സാഹചര്യത്തിന് കാരണമെന്ന് ഒരു വ്യവസായ വിദഗ്ധൻ അഭിപ്രായപ്പെട്ടു. വിശ്വസനീയമെന്ന് കരുതുന്ന രാജ്യങ്ങളിൽ നിന്ന് പോലും ചൈനീസ് നിർമ്മിത ഘടകങ്ങൾ ഇന്ത്യയിലേക്ക് എത്തുന്നുണ്ടെന്നും അദ്ദേഹം കൂട്ടിച്ചേർത്തു. പഴയ സിം കാർഡുകൾ പൂർണ്ണമായി മാറ്റുന്നത് ടെലികോം ഓപ്പറേറ്റർമാർക്ക് സാങ്കേതികപരവും നിയമപരവുമായ വലിയ വെല്ലുവിളികൾ സൃഷ്ടിക്കുന്നതിനോടൊപ്പം വലിയ സാമ്പത്തിക ബാധ്യതയും ഉണ്ടാക്കും. 

2021 മാർച്ചിൽ, വിശ്വസനീയമല്ലാത്ത വെണ്ടർമാരിൽ നിന്ന് ടെലികോം ഓപ്പറേറ്റർമാർ ഉപകരണങ്ങൾ വാങ്ങുന്നത് തടയാൻ ടെലികോം വകുപ്പ് യൂണിവേഴ്സൽ ആക്സസ് സർവീസ് ലൈസൻസിൽ ഭേദഗതി വരുത്തിയിരുന്നു. വിശ്വസനീയമായ ഉറവിടങ്ങളെയും, ഉപകരണങ്ങൾ വിതരണം ചെയ്യാൻ കഴിയുന്ന കമ്പനികളെയും അംഗീകരിക്കാനുള്ള ചുമതല എൻ സി എസ് സിക്ക് നൽകുകയും ചെയ്തു. 2023 ലെ പുതിയ ടെലികോം നിയമം അനുസരിച്ച്, സർക്കാർക്ക് വിശ്വസനീയമായ ഉറവിടങ്ങളിൽ നിന്ന് മാത്രമേ ടെലികോം ഉപകരണങ്ങളും സേവനങ്ങളും വാങ്ങാൻ നിർദ്ദേശം നൽകാൻ സാധിക്കൂ.