Centre's new panel | സാമൂഹ്യ മാധ്യമ സ്ഥാപനങ്ങളുടെ തീരുമാനങ്ങൾ മറികടക്കാൻ അധികാരമുള്ള കേന്ദ്ര സമിതി; സർകാർ നീക്കം വൻകിട ടെക്‌നോളജി കംപനികളിൽ നിന്ന് ഉണ്ടാകുന്ന പോരായ്മകളും പ്രശ്‌നങ്ങളും പരിഹരിക്കാൻ

ന്യൂഡെൽഹി: (www.kvartha.com) സാമൂഹ്യ മാധ്യമ കംപനികളുടെയും മറ്റ് ഇന്റർനെറ്റ് സ്ഥാപനങ്ങളുടെയും തീരുമാനങ്ങൾ മറികടക്കാൻ അധികാരമുള്ള പരാതി പാനൽ രൂപീകരിക്കാനുള്ള സർകാർ നിർദേശം വൻകിട ടെക്‌നോളജി കംപനികളിൽ നിന്ന് ഉണ്ടാകുന്ന ചില പോരായ്മകളും പ്രശ്‌നങ്ങളും പരിഹരിക്കാൻ ലക്ഷ്യമിട്ടാണെന്ന് ഔദ്യോഗിക പ്രസ്താവന. ഇൻഫർമേഷൻ ടെക്‌നോളജി നിയമം, 2021-ൽ ഭേദഗതികൾക്കായുള്ള കരട് വിജ്ഞാപനത്തോടൊപ്പമുള്ള വാർത്താ കുറിപ്പിൽ, ജൂൺ മധ്യത്തോടെ ഒരു പൊതു കൂടിയാലോചന നടത്തുമെന്ന് ഇലക്‌ട്രോണിക്‌സ് ആൻഡ് ഇൻഫർമേഷൻ ടെക്‌നോളജി മന്ത്രാലയം അറിയിച്ചു.
                   
ഐടി ചട്ടങ്ങൾ, 2021 ഭേദഗതി ചെയ്യുന്നതിനുള്ള കരട് വിജ്ഞാപനത്തെക്കുറിച്ചുള്ള പൊതുജനാഭിപ്രായങ്ങൾക്കുള്ള സമയം 30 ദിവസത്തേക്ക് നീട്ടി. ജൂൺ ഒന്നിന് പുറപ്പെടുവിച്ച കരട് വിജ്ഞാപനത്തിൽ പൊതുജനാഭിപ്രായം അറിയിക്കാനുള്ള അവസാന തീയതി ജൂൺ 22 ആയി സൂചിപ്പിച്ചിരുന്നു. ജൂൺ രണ്ടിന് മന്ത്രാലയം നീക്കം ചെയ്ത കരട് അതിന്റെ വെബ്‌സൈറ്റിൽ വീണ്ടും അപ്‌ലോഡ് ചെയ്യുകയായിരുന്നു.

എല്ലാ ഇൻഡ്യൻ ഇന്റർനെറ്റ് ഉപയോക്താക്കൾക്കും 'ഡിജിറ്റൽ പൗരന്മാർക്കും' തുറന്നതും സുരക്ഷിതവും വിശ്വസനീയവും ഉത്തരവാദിത്തമുള്ളതുമായ ഇന്റർനെറ്റ് ഉറപ്പാക്കുക എന്ന ലക്ഷ്യത്തോടെ 2021 ഫെബ്രുവരി 25-ന് ഐടി നിയമങ്ങൾ വിജ്ഞാപനം ചെയ്തതായി മന്ത്രാലയം പറഞ്ഞു. നിയമങ്ങൾ പ്രകാരം, പ്രധാന സാമൂഹ്യ മാധ്യമ ഇടനിലക്കാർ (50 ലക്ഷത്തിലധികം ഉപയോക്താക്കളുള്ള) ഒരു പരാതി ഓഫീസറെയും ഒരു നോഡൽ ഓഫീസറെയും ഒരു ചീഫ് കംപ്ലയൻസ് ഓഫീസറെയും നിയമിക്കേണ്ടതുണ്ട്. ഈ ഉദ്യോഗസ്ഥർ ഇൻഡ്യയിലെ താമസക്കാരായിരിക്കണം.

സാമൂഹ്യ മാധ്യമ പ്ലാറ്റ്‌ഫോമുകളിലെ പരാതി ഓഫീസർമാരുടെ തീരുമാനങ്ങൾക്കെതിരെ വ്യക്തികൾ നൽകിയ അപീലുകൾ പരിശോധിക്കാൻ ഒരു പരാതി അപീൽ കമിറ്റി രൂപീകരിക്കാൻ കരട് ഭേദഗതിയിൽ കേന്ദ്രം നിർദേശിച്ചിട്ടുണ്ട്. മാർഗനിർദേശങ്ങൾ ലംഘിച്ചുവെന്നാരോപിച്ച് ട്വിറ്റർ പോലുള്ള സാമൂഹ്യ മാധ്യമ പ്ലാറ്റ്‌ഫോമുകൾ സെലിബ്രിറ്റികൾ ഉൾപെടെയുള്ളവരുടെ അകൗണ്ടുകൾക്കെതിരെ നടപടിയെടുക്കുന്ന പശ്ചാത്തലത്തിൽ നിർദിഷ്ട നീക്കത്തിന് പ്രാധാന്യമുണ്ട്. < !- START disable copy paste -->