ന്യൂഡൽഹി: (KVARTHA) ഡൽഹി നിയമസഭ തിരഞ്ഞെടുപ്പിലെ  ഏറ്റവും വലിയ അട്ടിമറി ബിജെപിയുടെ പർവേഷ് വർമ്മ ആം ആദ്‌മി പാർട്ടി (AAP) ദേശീയ കൺവീനറും മുൻ മുഖ്യമന്ത്രിയുമായ അരവിന്ദ് കെജ്രിവാളിനെ തോൽപ്പിച്ചതാണ്. എന്നാൽ ഇതിന് പിന്നിൽ ഒരു മറ്റൊരു പേര് കൂടിയുണ്ട്, കോൺഗ്രസിന്റെ സന്ദീപ് ദീക്ഷിത് അഥവാ മുൻ മുഖ്യമന്ത്രി ഷീലാ ദീക്ഷിതിന്റെ മകൻ. മൂന്നാം സ്ഥാനത്തേക്കു തള്ളപ്പെട്ടിട്ടും കെജ്രിവാളിന്റെ പരാജയം ഉറപ്പാക്കിയെന്നതാണ് സന്ദീപ് ദീക്ഷിതിന്റെ 'സംഭാവന'.

ന്യൂഡൽഹി മണ്ഡലത്തിൽ 12 വർഷത്തിന് ശേഷം ഇത്തവണ ചരിത്രം ആവർത്തിക്കുകയായിരുന്നു എന്ന് പറയാം. മുൻ മുഖ്യമന്ത്രി ഷീലാ ദീക്ഷിത് 1998, 2003 വർഷങ്ങളിൽ നേരത്തെ ഗോലെ മാർക്കറ്റ് എന്ന പേരിൽ അറിയപ്പെട്ടിരുന്ന ഈ മണ്ഡലത്തിൽ വിജയിച്ചിരുന്നു. പിന്നീട് 2008-ൽ, മണ്ഡല പുനർനിർണയത്തിന് ശേഷം രൂപം കൊണ്ട ‘ന്യൂഡൽഹി’ മണ്ഡലത്തിൽ വീണ്ടും വിജയിച്ച അവർ തുടർച്ചയായി മൂന്നു തവണ നിയമസഭയിലെത്തി. 

എന്നാൽ 2013-ലെ തിരഞ്ഞെടുപ്പിൽ ‘ഇന്ത്യ എഗെയ്ൻസ്റ്റ് കറപ്ഷൻ’ പ്രക്ഷോഭത്തിന് ശേഷം ജനപ്രിയനായിരുന്ന കെജ്രിവാൾ തെരഞ്ഞെടുപ്പ് രംഗത്തെത്തിയപ്പോൾ, മൂന്നുതവണയും വിജയിച്ച ഷീലാ ദീക്ഷിതിന്റെ തോൽപിച്ച് കൊണ്ട് അവരുടെ രാഷ്ട്രീയജീവിതം അവസാനിക്കുകയായിരുന്നു. ആ തിരഞ്ഞെടുപ്പിൽ എഎപി നേടിയ വിജയത്തിലൂടെ ഡൽഹിയിൽ കോൺഗ്രസിന്റെ ഭരണകാലം അവസാനിക്കുകയും ചെയ്തു.

12 വർഷങ്ങൾക്ക് ശേഷം, ആം ആദ്‌മി പാർട്ടിയുടെ ദേശീയ കൺവീനർ തന്നെ ‘ഗോലിയാത്ത്’ ആയിമാറുന്നതാണ് കണ്ടത്, പക്ഷേ അദ്ദേഹത്തെ തോൽപ്പിച്ചത് ബിജെപിയുടെ 47-കാരനായ പർവേഷ് വർമ്മ എന്ന ‘ദാവീദ്’ ആയിരുന്നു. ഇതിന് വേറൊരു അർത്ഥവും ഉണ്ട്. കെജ്രിവാൾ പർവേഷ് വർമ്മയോട് 4,089 വോട്ടുകളുടെ വ്യത്യാസത്തിലാണ് തോറ്റത്. അതേസമയം, സന്ദീപ് ദീക്ഷിത് 4,568 വോട്ടുകൾ നേടി മൂന്നാം സ്ഥാനത്ത് എത്തി. 

ഇതിൽ നിന്നു കണക്കുകൂട്ടുമ്പോൾ, എഎപിയും കോൺഗ്രസും ഒന്നിച്ച് മത്സരിച്ചിരുന്നെങ്കിൽ കെജ്രിവാൾ നേരിയ ഭൂരിപക്ഷത്തോടെ ജയിക്കുമായിരുന്നുവെന്നതിൽ സംശയമില്ല. പക്ഷേ അങ്ങനെയൊരു യോജിപ്പുണ്ടായില്ല. 2020-ലെ തിരഞ്ഞെടുപ്പിൽ, കെജ്രിവാൾ 21,000 വോട്ടുകളുടെ ഭൂരിപക്ഷത്തോടെ ബിജെപിയുടെ സുനിൽ യാദവിനെ തോൽപ്പിച്ചിരുന്നു. ആ സമയത്ത് കോൺഗ്രസ് സ്ഥാനാർത്ഥിയായിരുന്ന റോമേഷ് സബർവാൾ 3,220 വോട്ടുകൾ മാത്രമേ നേടിയുള്ളൂ. 

മദ്യ നയ അഴിമതി ആരോപണങ്ങളും, മുഖ്യമന്ത്രിയുടെ ഔദ്യോഗിക വസതി നവീകരണവുമായി ബന്ധപ്പെട്ട ആരോപണങ്ങളും ഈ തെരഞ്ഞെടുപ്പിൽ വോട്ടർമാരുടെ മനസ്സിൽ സ്വാധീനം ചെലുത്തിയതായാണ് വിലയിരുത്തൽ. തിരഞ്ഞെടുപ്പിൽ, സന്ദീപ് ദീക്ഷിത് കെജ്രിവാളിനെതിരെ ശക്തമായ പ്രചാരണം നടത്തിയിരുന്നു. ഡൽഹി സർക്കാരിന്റെ പരാജയങ്ങൾ കോൺഗ്രസ് ഉന്നയിക്കണമെന്ന് അദ്ദേഹം ആവർത്തിച്ച് പറഞ്ഞിരുന്നു. അദ്ദേഹത്തിന്റെ സഹോദരിയായ ലതിക ദീക്ഷിത് പ്രചാരണത്തിൽ പങ്കെടുത്തപ്പോൾ, ‘ഡൽഹിയെ വികസിപ്പിച്ചതിൽ അമ്മ ഷീലാ ദീക്ഷിത് എന്നും ജനങ്ങളുടെ മനസ്സിലുണ്ടാകും’ എന്ന് ഓർമ്മിപ്പിച്ചിരുന്നു.

സവിശേഷതയായി കാണേണ്ട മറ്റൊരു കാര്യവുമുണ്ട്, പർവേഷ് വർമ്മയും മുൻ മുഖ്യമന്ത്രിയുടെ മകനാണ്. ബിജെപിയുടെ മുതിർന്ന നേതാവും 1996 മുതൽ 1998 ഒക്ടോബർ വരെ ഡൽഹിയിയുടെ  മുഖ്യമന്ത്രിയായിരുന്ന സഹിബ് സിംഗ് വർമ്മയുടെ മകനാണ് പർവേഷ് വർമ്മ. രണ്ട് മുൻ മുഖ്യമന്ത്രിമാരുടെ മക്കളും ഒരു മുൻ മുഖ്യമന്ത്രിയുടെയും പോരാട്ടമാണ് ഇത്തവണ ഡൽഹി കണ്ടതെന്ന് സാരം. 12 വർഷങ്ങൾക്ക് മുമ്പ് ഷീല ദീക്ഷിതിന് ഉണ്ടായ അതേ അനുഭവമാണ് ഇന്ന് അരവിന്ദ് കേജ്‌രിവാളിന് സംഭവിച്ചിരിക്കുന്നത്.

നിങ്ങളുടെ അഭിപ്രായങ്ങൾ താഴെ കമന്റിലൂടെ പങ്കുവയ്ക്കുക. 

12 years later, history repeats in New Delhi as BJP’s Parvesh Verma defeats AAP’s Arvind Kejriwal, similar to how Kejriwal ended Sheila Dikshit’s political career in 2013.Hashtags in English for Social Shares:

#DelhiElections #AAP #BJP #Congress #ArvindKejriwal #ParveshVerma