● സ്പീക്കർ എ.എൻ. ഷംസീറിൻ്റെ അധ്യക്ഷതയിലാണ് യോഗം ചേർന്നത്.
● ടൂറിസം വകുപ്പിൻ്റെ ഹെറിറ്റേജ് പദ്ധതിയുടെ ഭാഗമാണിത്.
● ഡി.പി.ആർ ഒക്ടോബർ അവസാനത്തോടെ തയ്യാറാക്കും.
● ശ്രീനാരായണ ഗുരു പ്രതിഷ്ഠ നടത്തിയ ക്ഷേത്രമാണിത്.
തലശ്ശേരി: (KVARTHA) ജഗന്നാഥ ക്ഷേത്രത്തിലെ നവോത്ഥാന മ്യൂസിയം കെട്ടിടത്തിൻ്റെ പണി പൂർത്തിയാക്കുന്നതിനോടൊപ്പം മ്യൂസിയം ക്യൂറേറ്റ് ചെയ്യുന്നതിനുള്ള നടപടികളും സമാന്തരമായി പൂർത്തിയാക്കാൻ കേരള മ്യൂസിയത്തെ ചുമതലപ്പെടുത്തി.
നിയമസഭാ സ്പീക്കർ എ.എൻ. ഷംസീറിൻ്റെ അധ്യക്ഷതയിൽ അദ്ദേഹത്തിൻ്റെ ചേംബറിൽ ചേർന്ന യോഗത്തിലാണ് ഇതു സംബന്ധിച്ച് തീരുമാനമെടുത്തത്.
ശ്രീനാരായണ ഗുരുദേവൻ പ്രതിഷ്ഠ നടത്തിയ തലശ്ശേരി ജഗന്നാഥ ക്ഷേത്രത്തിന് കേരളത്തിൻ്റെ നവോത്ഥാന ചരിത്രത്തിൽ നിർണ്ണായക സ്ഥാനമാണുള്ളത്. സാമൂഹിക നവീകരണത്തിൻ്റെയും മാറ്റത്തിൻ്റെയും ചരിത്രപരമായ അടയാളപ്പെടുത്തലുകൾ രേഖപ്പെടുത്തുന്ന നവോത്ഥാന മ്യൂസിയം ഉത്സവത്തിന് മുൻപ് ജനുവരി മാസത്തിൽ പൂർത്തിയാക്കണമെന്ന് സ്പീക്കർ നിർദ്ദേശിച്ചു.
3 കോടിയാണ് പദ്ധതിയുടെ പ്രതീക്ഷിക്കുന്ന ചെലവെന്നും ഡി.പി.ആർ ഒക്ടോബർ അവസാനത്തോടെ തയ്യാറാക്കുമെന്നും കേരള മ്യൂസിയം എക്സിക്യൂട്ടീവ് ഡയറക്ടർ ചന്ദ്രൻപിള്ള അറിയിച്ചു.
തുടർന്ന് മൂന്ന് മാസത്തിനുള്ളിൽ സന്ദർശകർക്ക് നവോത്ഥാന ചരിത്രത്തിൻ്റെ പുതിയ അനുഭവം നൽകുന്ന തരത്തിൽ ആകർഷകമായി മ്യൂസിയത്തിൻ്റെ ഡിസൈൻ പൂർത്തിയാക്കുമെന്നും അദ്ദേഹം കൂട്ടിച്ചേർത്തു. ടൂറിസം വകുപ്പിൻ്റെ തലശ്ശേരി ഹെറിറ്റേജ് പദ്ധതിയിൽ ഉൾപ്പെടുത്തിയാണ് ജഗന്നാഥ നവോത്ഥാന മ്യൂസിയം യാഥാർഥ്യമാക്കുന്നത്.
യോഗത്തിൽ മ്യൂസിയം ഡയറക്ടർ പി.എസ്. മഞ്ജുളാ ദേവി, കിഫ്ബി അസി. പ്രോജക്ട് മാനേജർ നന്ദു ടി., സ്പീക്കറുടെ പ്രൈവറ്റ് സെക്രട്ടറി ടി. മനോഹരൻ നായർ, അഡീഷണൽ പ്രൈവറ്റ് സെക്രട്ടറിമാരായ എം. കുഞ്ഞിമോൻ, അർജുൻ എസ്.കെ. തുടങ്ങിയവർ പങ്കെടുത്തു.
തലശ്ശേരി ജഗന്നാഥ ക്ഷേത്രത്തിലെ ഈ പുതിയ മ്യൂസിയം പദ്ധതിയെക്കുറിച്ച് നിങ്ങളുടെ അഭിപ്രായം അറിയിക്കൂ. നിങ്ങളുടെ സുഹൃത്തുക്കളുമായി ഇത് ഷെയർ ചെയ്യൂ.
Article Summary: Renaissance museum at Jagannath Temple, Thalassery, to be completed by January.
#Thalassery #KeralaTourism #RenaissanceMuseum #JagannathTemple #ANShamseer #KeralaHeritage
