ജമാഅത്തെ ഇസ്ലാമിയുടെ മതരാഷ്ട്രവാദത്തിനെതിരെ സമസ്ത; മലപ്പുറം ജില്ല വിഭജിക്കണമെന്നും പ്രമേയം

കാസർകോട്: (KVARTHA) ജമാഅത്തെ ഇസ്ലാമിയുടെ മതരാഷ്ട്രവാദത്തിനെതിരെയും സംസ്ഥാനത്തെ ജില്ലകളുടെ പുനർനിർണയം ആവശ്യപ്പെട്ടും സമസ്ത കേരള ജംഇയ്യത്തുൽ ഉലമയുടെ ശതാബ്ദി സമ്മേളനത്തിൽ സുപ്രധാന പ്രമേയങ്ങൾ. 

കുണിയയിൽ നടക്കുന്ന സമ്മേളനത്തിലാണ് ജമാഅത്തെ ഇസ്ലാമിയുടെ തീവ്രപ്രബോധന ശൈലിയെയും രാഷ്ട്രീയ ഇസ്ലാമിനെയും രൂക്ഷമായി വിമർശിച്ചുകൊണ്ട് പ്രമേയം പാസാക്കിയത്. കൂടാതെ, മലപ്പുറം ഉൾപ്പെടെയുള്ള വലിയ ജില്ലകൾ വിഭജിക്കണമെന്നും സമ്മേളനം ആവശ്യപ്പെട്ടു.

ജമാഅത്തെ ഇസ്ലാമിക്കെതിരെ രൂക്ഷ വിമർശനം

ഇസ്ലാമിൻ്റെ സമാധാനപരമായ പ്രബോധന ശൈലിയെയും മഹത്തുക്കളായ മുൻഗാമികൾ കാണിച്ചുതന്ന പാതയെയും അട്ടിമറിക്കാൻ ശ്രമിക്കുന്ന പാന്‍ ഇസ്ലാമിസ്റ്റ് തീവ്രചിന്താഗതികൾക്കെതിരെ ജാഗ്രത പാലിക്കണമെന്ന് പ്രമേയം ആഹ്വാനം ചെയ്തു. 

മതരാഷ്ട്രവാദം ഒളിച്ചുകടത്തുന്ന വൈകാരിക പ്രകടനങ്ങളിലൂടെയും രാഷ്ട്രീയ ഇസ്ലാം എന്ന അപകടകരമായ ആശയത്തിലൂടെയും മുസ്ലിം യുവാക്കളെ മുഖ്യധാരയിൽ നിന്ന് വഴിതെറ്റിക്കാൻ ശ്രമിക്കുന്ന മൗദൂദിസ്റ്റ് വിചാരധാരകൾ ഗൗരവതരമായ വെല്ലുവിളിയാണ്.

നിഷ്പക്ഷ മാധ്യമങ്ങൾ എന്ന വ്യാജേന പ്രവർത്തിക്കുന്ന ചില മാധ്യമങ്ങൾ നടത്തുന്ന ബൗദ്ധികമായ കടന്നുകയറ്റങ്ങളെയും സമുദായത്തെ ഭിന്നിപ്പിക്കാനുള്ള അജണ്ടകളെയും തിരിച്ചറിയണം. 

അഹ്ലുസ്സുന്ന വല്‍ ജമാഅത്തിന്റെ പൈതൃകമായ സഹിഷ്ണുതയും സൗഹൃദവും ഉയർത്തിപ്പിടിച്ച് ഇത്തരം വിഘടനവാദ ചിന്താഗതികളെ ആശയപരമായി പ്രതിരോധിക്കാനും സമുദായത്തിന്റെ തനിമ നിലനിർത്താനും എല്ലാവരും രംഗത്തിറങ്ങണമെന്നും സമസ്ത ആവശ്യപ്പെട്ടു.

മലപ്പുറം വിഭജിക്കണം: തമിഴ്നാട് മാതൃക

കേരളത്തിലെ വർധിച്ചുവരുന്ന ജനസംഖ്യയും ഭരണനിർവ്വഹണത്തിലെ വെല്ലുവിളികളും പരിഗണിച്ച് ജില്ലകളുടെ പുനർനിർണയം അനിവാര്യമാണെന്ന് മറ്റൊരു പ്രമേയത്തിലൂടെ സമസ്ത ആവശ്യപ്പെട്ടു.

 45 ലക്ഷത്തിലധികം ജനങ്ങളുള്ള മലപ്പുറം ഉൾപ്പെടെയുള്ള വലിയ ജില്ലകളിൽ ഭരണയന്ത്രം കാര്യക്ഷമമാക്കാനും വിഭവങ്ങൾ തുല്യമായി വിതരണം ചെയ്യാനും പുതിയ ജില്ലാരൂപീകരണം അത്യാവശ്യമാണ്. ഭൂപ്രകൃതിയും യാത്രാക്ലേശവും കണക്കിലെടുത്ത് ഇടുക്കി, എറണാകുളം, പാലക്കാട് ജില്ലകളിലും ഇത്തരം പ്രശ്നങ്ങൾ നിലനിൽക്കുന്നുണ്ട്.

39 പാർലമെൻറ് മണ്ഡലങ്ങളുടെ പരിധിയിൽ 38 ജില്ലകൾ നിലനിൽക്കുന്ന തമിഴ്നാടിനെ കേരളത്തിന് ഈ വിഷയത്തിൽ മാതൃകയാക്കാവുന്നതാണ്. പുതിയ ജില്ലകൾ വരുന്നതോടെ സിവിൽ സ്റ്റേഷനുകളും ആശുപത്രികളും ജനങ്ങളിലേക്ക് കൂടുതൽ അടുക്കുമെന്നും ഇത് പിന്നാക്ക പ്രദേശങ്ങളുടെ വളർച്ചയ്ക്ക് വേഗത കൂട്ടുമെന്നും പ്രമേയം ചൂണ്ടിക്കാട്ടി. 

രാഷ്ട്രീയ താൽപ്പര്യങ്ങൾക്കപ്പുറം ശാസ്ത്രീയ പഠനങ്ങളുടെ അടിസ്ഥാനത്തിൽ ജില്ലകളുടെ പുനർനിർണയം യാഥാർത്ഥ്യമാക്കാൻ ഭരണ-പ്രതിപക്ഷ കക്ഷികൾ തയ്യാറാകണം.

മദ്ഹബീ പാരമ്പര്യം കാത്തുസൂക്ഷിക്കണം

കർമശാസ്ത്രപരമായി നാലിൽ ഒരു മദ്ഹബ് പിൻപറ്റുകയും വിശ്വാസപരമായി അശ്അരി-മാതുരീദി സരണികളിൽ ഒന്ന് സ്വീകരിക്കുകയും ചെയ്യുന്നതിലാണ് യഥാർഥ അഹ്ലുസ്സുന്നത്തി വല്‍ ജമാഅത്തിന്റെ പാരമ്പര്യവും സമസ്തയുടെ മൻഹജും നിലനിൽക്കുന്നത്.

സ്വന്തം താൽപ്പര്യങ്ങൾക്കു വേണ്ടി പ്രാമാണികരായ പൂർവിക പണ്ഡിതന്മാരുടെ അഭിപ്രായങ്ങളെ അവഗണിച്ച്, സ്വയം 'ഇജ്തിഹാദികൾ' (ഗവേഷകർ) ആകുന്ന പ്രവണത ഇസ്ലാമിക വിരുദ്ധമാണ്. മഖാസ്വിദുശ്ശരീഅ:, ഫിഖ്ഹുല്‍ അഖല്ലിയാത്ത് തുടങ്ങിയ സാങ്കേതിക പദങ്ങളെ ദുരുപയോഗം ചെയ്ത് ചിലർ നടത്തിക്കൊണ്ടിരിക്കുന്ന പുതിയ ഗവേഷണ രീതികൾ പൂർണമായും തള്ളിക്കളയണമെന്നും സമ്മേളനം ആവശ്യപ്പെട്ടു.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത

Article Summary: Samastha passes key resolutions against Jamaat-e-Islami and for the bifurcation of Malappuram district.

#Samastha #Malappuram #JamaatEIslami #KuniyaConference #KeralaPolitics #DistrictBifurcation #KVARTHA